S
sacerdöti Israel sacerdötikunaqa Aarón castapitami templucho Tayta Diosta sirviqkuna kayarqan. Paykunami templupa punkun altarcho uywakunata rupatsiyaq runakunapa jutsankunata Tayta Dios perdonananpä. Tsaynöpis inciensiuta templu rurincho rupatsirmi Tayta Diosta mañakuyaq. Sacerdötikunarämi niyaq pipis lepra qeshyapita alliyaykanqanta o mana alliyaykanqantapis. Sacerdötikunami diezmuta y ofrendakunatapis chaskiyaq (Lev. 1.3-9; Mar. 1.44; Luc. 1.8-10).
sacrificiu Sacrificiuqa Tayta Diospä pishtayanqan uywami karqan. Rupatsina sacrificiuta rurarqa llapan aytsantami altarcho rupatsiyaq (Lev. 1; 6.8-13). Alli päsakuy sacrificiuta rurarqa wirallantami rupatsiyaq y aytsantaqa runakunami mikuyaq (Lev. 3). Purificatsina sacrificiuta rurarqa (Lev. 4; 5.1-13; 6.24-30) y consagratsina sacrificiuta rurarqa (Lev. 5.14-19; 6.1-7; 7.1-10) wirallantami altarcho rupatsiyaq y aytsantaqa sacerdötikunami mikuyaq (Lev. 7.6-7). Jesucristo shamunqanpitaqa manami sacrificiuta rupatsintsiknatsu, sinöqa kikin Jesucristumi noqantsik raykuq wanur sacrificiu karqan (Rom. 8.3; Heb. 9.11—10.18).
saduceo runa Saduceo runakunaqa Moisés qellqanqankunalla Tayta Diospa yachatsikuynin kanqanta yarpaq runakunami kayarqan. Paykunaqa manami criyiyarqantsu runakuna wanuyanqanpita kawariyämunanpä kanqanta ni alman kanqanta ni angelkuna kanqantapis. Saduceukunaqa mas rïcu runakunami kayarqan. Fariseo runakunapitapis mas munayyuqmi kayarqan (Luc. 20.27-40).
sagrädu Liyinki santupita tantiyatsikuyta.
Sagrädu Toldu Liyinki Tinkuna Toldupita tantiyatsikuyta.
salteriu Salteriuqa taksha arpa niraqmi kaykan (1Sam. 10.5; 2Sam. 6.5; 1Rey. 10.12; 1Crón. 13.8; 15.28; 2Crón. 5.12; Sal. 33.2; 57.8; 81.2; Isa. 5.12).
Samaria runa Samaria runakunaqa kayarqan Samaria provinciacho taq runakunami. Tsay provinciaqa Israel nacionpa chawpinchömi karqan. Israel runakuna Jerusaléncho Diosta adorayänanpä niyaptinpis Samaria runakunaqa niyarqan Samariacho kaykaq Gerizim jirkachörä Tayta Diosta adorayänanpä kanqantami. Tsaynö yarparmi Israel runakunawan chikinakuyaq (2Rey. 17.24-41; Juan 4.9, 20).
Sanedrín juezkuna Sanedrín juezkunaqa Israel nacioncho mas mandaq juezkunami kayarqan. Tsay juezkunapa mandaqninqa mas mandaq sacerdötimi karqan. Sanedrín juezkunami juzgayarqan Jesústa (Mat. 26.57-68), Pedruta y Juanta (Hech. 4) y apóstol Pabluta (Hech. 22.30—23.20).
santu; sagrädu Tayta Dios santu kanqanta nirqa jutsaynaq kanqanta y pipis ni imapis payman mana tinkunqantami nikan (Isa. 5.16; 6.3; Apoc. 4.8; 15.4).
Runakuna santu kayanqanta nirqa Tayta Dios akranqan runakuna kayanqanta (Deut. 7.6) y pay munanqannö jutsaynaq kawayanqantami nikan (Lev. 20.7-8).
Sitiukuna y manëjukuna Tayta Diospä kaptinqa sagrädu kanqantami nikan. Tsaymi Israel nación (Zac. 2.12), Jerusalén marka (Isa. 48.2) y templu (Sal. 68.5) sagrädu kaykan. Tsaynöllami jamay junaq (Éxo. 31.14) y fiestakunapis (Lev. 23.2) sagrädu kaykäyan.
Satanás Satanásqa supaykunapa mandaqninmi kaykan. Payqa manami Diosnötsu maytsaychöpis kaykan. Satanáspa wakin jutinkunami kaykan diablu y Beelzebú (Mar. 1.13; Hech. 13.10).
Satanásqa supayninkunawanmi (1) runakunata pantakätsiyan llutanta willakuyänanpä y Tayta Diospa willakuyninta mana chaskikuyänanpä (1Rey. 22.19-23; Juan 8.44; 2Cor. 4.4; 11.14), (2) Tayta Diospa contran pelyayan (Dan. 10.13-14; Efe. 6.12) y (3) Diosman yärakuqkunata tentayan (Mat. 4.1-11), tumpayan (Apoc. 12.10) y jutsaman ishkitsiyan (Gén. 3.1-7).
Tsaynö kaptinpis Jesucristuqa Satanásta vincishqanami (Juan 16.11; Col. 2.15). Satanás ajanashqa puriykaptinqa ichipänantsikpä maya mayalla kashun (1Ped. 5.8-9). Ichipashqaqa qeshpikunqami (Stg. 4.7). Satanástawan supaykunataqa imaypis mana upiq ninamanmi Jesucristo qaykunqa (Mat. 25.41; Apoc. 20.10).
Sefela Sefelaqa Israel nacioncho jirkan jirkan partimi kaykan. Sefelapita rupay jeqanan kaqlächömi Mediterraneo lamar kaykan. Sefelapita rupay yarqamunan kaqlächönami jirkakuna kaykäyan. Norti kaqläpita sur kaqläyaqmi Sefela kaykan chusku chunka pitsqa kilömetrunö. Rupay yarqamunanläpita rupay jeqananläyaqmi chunka soqta kilömetrunö kaykan. Sefelacho chakrakuna alli kaptinmi mikuykuna alli wayun. Filisteo runakunawan pelyarmi Israel runakuna Sefelacho kaykaq markakunata y chakrakunata qechunakuyarqan (Jos. 10.40; 12.8; 1Rey. 10.27; 2Crón. 28.18).
Semäna Fiesta Liyinki Pentecostés fiestapita tantiyatsikuyta.
señalakunqan Señalakuyqa penqayninpa punta qaranta roqurir jipinqanmi. Abrahamwan Tayta Dios conträtuta ruranqanta yarparmi Israel runakunaqa tsaynö señalakuyan. Tsaymi ollqu wamrakunata yurinqanpita puwaq junaqyuq kaykaptin señalayan. Tsaytami castellänucho “circuncisión” niyan (Gén. 17.9-14; Col. 2.11; 1Cor. 7.18-20).
sepultüra Sepultüraqa qaqacho uchkushqami karqan. Tsay uchkuchömi patakta ruraykur ayata sutayaq. Nirkurmi jatunkaray rumiwan punkunta tsaparkuyaq. Aya ismurkuptinnami tullunkunata qorirkur urpuman wiñayaq. Tsaynö sepultüramanmi Jesucristupa ayantapis sutayarqan (Mar. 15.46; Juan 11.38).
sinagöga Sinagögaqa Israel runakuna qorikäyänan wayimi karqan. Tsaychömi qorikäyaq Tayta Diosta mañakuyänanpä, Moisés qellqanqan leykunata yachakuyänanpä, sesionkunata rurayänanpä y wamrakuna liyiyta yachakuyänanpä (Mar. 1.21; Juan 9.34; Hech. 15.21).
Sión Siónqa Jerusaléncho jirkanmi kaykan. Siónchömi Davidpa Markan karqan y templuta shäritsiyarqan (1Crón. 5.2; Sal. 2.6; 9.10-11; 132.13). Tsaymi Jerusalén markapa jukaq jutin Sión kaykan (2Crón. 5.2). Bibliachömi Siónta parlapan warmita parlapaqnö (Isa. 49.15, 22; Lam. 2.1).
supay Supaykunaqa Tayta Diosta mana cäsukuq angelkunami kaykäyan. Paykunami Satanás mandanqanta rurar runakunata qeshyatsiyan, löcuyätsiyan, chikinakatsiyan y yarpayninta pantakätsiyan Tayta Diospa alli willakuyninta mana tantiyayänanpä (Mat. 12.43-45; Mar. 1.23-26; Luc. 8.2; 2Cor. 4.4). Masta musyanaykipä liyinki Satanáspita tantiyatsikuyta.