Qanchis angelkuna runakunata ñakatsiyänanpä ninqan
15
Tsaypitanami ciëlucho juk mantsariypa señalta rikarqä. Tsay señalmi karqan castïgukunata apamuq qanchis angelkuna. Tsay angelkunawan castigatsiptinmi Tayta Diospa ajanaynin qallqunqa.2 Tsaynöllami rikarqä ninawan tallushqa vidriunö lamarta. Tsay lamar jananchömi Tayta Diosman yärakuqkuna arpankuna aptashqa ichiraykäyarqan. Tsay arpakunataqa Tayta Diospitami chaskiyarqan. Paykunaqa manami anticristuta cäsuyarqantsu, ni ïdulunta adorayarqantsu ni jutinpa nümeruntapis churakuyarqantsu. 3 Tayta Diospa sirviqnin Moisés cantanqanta† y Carnish cantanqanta cantarmi niyarqan:
“Llapanpä munayyuq Tayta Dios,
qam ruranqaykikunaqa pasaypa allimi.
Llapan nacionkunapa mandaqnin rey,a
alli kaqllatami imaypis ruranki.
Ninqaykitaqa imaypis cumplinkimi.
4 ¿Pirä mana mantsapakushunkimantsu?†
¿Pirä mana alabashunkimantsu?
Qamllami santu kanki.
Runakunata shumaq juzganqaykita pïmaymi musyayan.
Tsaymi llapan nación runakunapis ñöpaykiman shamur adorayäshunki”.†
5 Tsaypitanami ciëlucho kaq Pactu Tolducho Lugar Santïsimu kicharaykaqta rikarqä. 6 Tsaypitami castïgukunata apamuq qanchis angelkuna yarqayämurqan. Paykunaqa lïnupita rurashqa chipipiykaq limpiu latsapashqami kayarqan. Pëchunkunachömi qoripita rurashqa wachukun wachakashqa kayarqan.
7 Tsaymi Tayta Diospa trönuncho kaq chusku kawaykaqkunapita juk yarqamurqan. Paymi qanchis angelkunata qoripita rurashqa cöpata aypurqan. Tsay cöpakunachömi imayyaqpis kawaq Tayta Diospa ajanaynin junta wiñaraykarqan. 8 Ciëlucho kaq templuman Tayta Diospa chipipiynin juntaptinmi qoshnipis juntarqan.† Qanchis castïgukunata angelkuna jichamur ushayanqanyaq tsay templuman manami pipis yaykuyta kamäpakurqantsu.