Salvashqa kaqkuna cantayanqan
14
Tsaypitanami Sión jirkancho Carnish ichiraykaqta rikarqä. Paypa ñöpanchömi juk pachak chusku chunka chusku waranqa (144,000) runakuna kaykäyarqan. Paykunapa urkunkunachömi Carnishpa jutin y Carnishpa Taytanpa jutin qellqaraykan.† 2 Ciëlupitanami wiyakämurqan bunyaypa bunyar atska yaku raqrapa aywaqnö y maqakuy bunruruqnö. Tsaynöllami tsaytsika arpakunata tukayämunqannö wiyakämurqan. 3 Tsayqa mushuq alabanzata cantayanqanmi karqan. Tsaytami cantayarqan Tayta Diospa trönun ñöpancho, chusku kawaykaqkunapa ñöpancho y tsaycho kaq ishkay chunka chusku (24) mayor runakunapa ñöpancho.Wakin runakuna manami tsay cantuta yachakuyta kamäpakuyarqantsu. Tsaypa trokinqa tsay juk pachak chusku chunka chusku waranqa (144,000) salvashqa runakunallami yachayarqan. 4 Paykunaqa warmiwan mana kakuq runakuna karmi virgen jipashnö püru kaykäyan.a Imanö ñakarpis Carnish munanqannömi kawayarqan. Paykunatami salvarqan Tayta Diospä y Carnishpä primicianö kayänanpä.† 5 Imaypis mana llullakur jutsaynaqmi kaykäyan.b †
Kimsa angelkuna willakuyanqan
6 Tsaypitanami rikarqä juk ángel junishpa pajaykaqta. Paymi mana ushakaq alli willakuyta apamurqan. Tsay willakuymi kaykan maytsay nación runakunapä, maytsay trïbu runakunapä, ima idiömata parlaqkunapä y maycho taqkunapäpis. 7 Tsay angelmi jinchi nimurqan: “¡Tayta Diospita mantsapakur payta alabayay! ¡Höra chämushqanami llapan runakunata juzgananpä! ¡Ciëluta, kay patsata, lamarta y pashtaq yakukunatapis kamaq Tayta Diosta adorayay!”
8 Tsay angelpa qepanta juk angelpis aywarmi nirqan: “¡Ushakashqanami, ushakashqanami jatunkaray Babilonia marka!† ¡Babiloniami vïnuwan machätsiqnöpis llapan nación runakunata mana alli costumbrinkunata yachatsirqan!”
9 Tsay angelpa qepantanami mas juk angelpis aywar jinchi nirqan: “Mayqanpis anticristuta y ïdulunta adorar señalninta urkunman o makinman churatsikuq kaqkunataqa 10 cöpa junta wiñaraykaq ajanaynintami Tayta Dios mana kuyapaypa uputsinqa.† Carnish y santu angelninkunapis rikaykäyaptinmi tsay runakuna azufrintin nina rupaykaqcho rupar ñakayanqa.† 11 Paqaspa junaqpa mana upiypa rupaptinmi imaypis qoshni shäriykanqa.† Tsaynöllami anticristuta y ïdulunta adorar señalninta churatsikuq kaqkunapis paqaspa junaqpapis ñakayanqa”.
12 Tsay ángel ninqannö kananpä kaykaptinqa Jesucristuman yärakuqkuna Tayta Diospa mandamientunkunata cäsukur mana ajayaypa payman yärakuyätsun.
13 Tsaypitanami ciëlupita nimuqta wiyarqä: “Kay ninqäta qellqay: ‘Kananpitaqa Jesucristuman yärakuykar wanuqkuna kushishqami kayanqa’ ”.
Espíritu Santumi nirqan: “¡Awmi, paykunaqa mananami ñakayanqanatsu, tsaypa trokinqa añawmi kawayanqa! Payman yärakur allita rurayanqankunata Tayta Dios manami qonqanqatsu”.
Juiciu final kananpä willakunqan
14 Rikachakunqächömi rikarqä yuraq pukutay janancho runapa tsurinnö jamaraykaqta.† Paymi qori corönashqa y afilashqa ösin aptashqa kaykarqan. 15 Tsaypitanami ciëlucho kaykaq templupita juk ángel yarqaskamur pukutay janancho jamaraykaqta jinchi nirqan: “¡Cosëcha poqushqanami! ¡Cosechanaykipä tiempu chämushqanami! ¡Ösikita aptakurkur cosechamunaykipä ayway!”†
16 Tsaynö niptinmi pukutay janancho jamaykanqanpita shamur ösinta aptakurkur kay patsacho runakunata qorimurqan.
17 Tsaypitanami mas juk ángel ciëlucho kaykaq templupita alli afilashqa ösin aptashqa yarqamurqan. 18 Altarcho kaykanqanpitanami yapay mas juk angelpis yarqamurqan. Paymi altarcho ninata cuidaq karqan. Tsay angelmi ösin aptashqa angelta jinchi qayar nirqan: “¡Üva poqushqanami kaykan! ¡Ösikiwan llapanta qorimuy!”
19 Tsaynö niptinmi ösinwan tsay ángel kay patsacho üvata qorirqan.c Qoriskirnami üvata jarukunan jatunkaray pözuman wiñarqan. Tsay pözuqa Tayta Diospa ajanayninmi kaykan. 20 Markapita jukläman jipiskirmi üvata jaruqnö runakunata wanutsirqan.† Runakunapa yawarninmi cawallupa shiminman töpanqanyaq y soqta chunka (60) lëwayaq aywarqan.