Anticristo shamunanpä kanqan
13
Tsaypitanami lamarpita anticristo yarqaykämuqta rikarqä.† Payqa qanchis umayuq y chunka waqrayuqmi karqan. Cada waqranchömi coröna karqan. Cada umankunachönami Tayta Diospa contran qellqararqan.† 2 Cuerpunqa leopardupanömi karqan. Chakinkunami ösupanö karqan. Y shiminnami leonpanö karqan.† Paytami munayninta dragón qorqan llapanta mandananpä.3 Anticristupa juk uman pasaypa pakishqa kaykaqtami rikarqä. Pakishqa kaykarpis wanunanpa trokinmi alliyarqan. Alliyaptinmi runakuna mantsakar ninqankunata cäsukuyarqan. 4 Anticristuta munayninta qaranqanpitami dragonta runakuna adorayarqan. Tsaynöllami anticristutapis adorar niyarqan: “¡Paynö munayyuqqa manami pipis kantsu! ¡Manami pipis payta vinciyta kamäpakuntsu!”
5 Anticristutami Tayta Dios kachaparqan yachaq tukur paypa contran rimananpä. Tsaynöllami munaynin qorqan chusku chunka ishkay (42) killa munanqannö imatapis rurananpä. 6 Tsaymi anticristuqa Tayta Diospa contran, ciëlucho kaykaq templupa contran y ciëlucho kaykaqkunapa contran imaykatapis nirqan.†
7 Tsaynöllami anticristuta Tayta Dios kachaparqan payman yärakuqkunata atacar vincinanpä.† Tsaymi munaynincho tsarararqan maytsay trïbu runakunata, maytsay marka runakunata, ima idiömata parlaq runakunata y may nacioncho taq runakunatapis. 8 Llapan runakunami anticristuta adorayarqan. Tsay adoraq runakunapa jutinkunaqa Libru de la Vïdacho manami qellqashqatsu karqan. Tsay libruqa wanutsiyanqan Carnishpa librunmi. Tsay librutami Tayta Dios qellqarqan kay patsata kamanqan witsan.† 9 Rinriyuq kaqkunaqa ninqäkunata wiyakuyätsun.
10 Carcelcho wichqaräyänanpä kaqkunaqa carcelchömi wichqaräyanqa.†
Wanutsishqa kayänanpä kaqkunaqa wanutsishqami kayanqa.
Tsaynö päsaptinpis Diosman yärakuqkunaqa pacienciakuyätsun. Imanö ñakarpis payman yärakuyätsun.
Anticristupa profëtan shamunanpä kanqan
11 Tsaypitanami anticristupa profëtan patsa rurinpita yarqaykämuqta rikarqä. Payqa carnishpa waqrannö waqrashqami karqan. Itsanqa dragonnömi parlarqan. 12 Anticristunömi munayyuq karqan. Paymi llapan runakunata nirqan anticristuta adorayänanpä. Anticristuqa uman pakishqa kanqanpita alliyashqanami kaykarqan.
13 Tsaynöllami anticristupa profëtan milagrukunata rurarqan. Runakuna rikaykäyaptinmi ciëlupita ninatapis ishkitsimurqan. 14 Anticristupa ñöpancho milagrukunata rurarmi runakunata engañarqan.† Nirkurnami runakunata mandarqan ïduluta rurayänanpä. Tsay ïduluqa uman pakishqa kanqanpita alliyashqa anticristo niraqmi karqan. 15 Anticristupa profëtanqa munayyuq karmi ïduluta kawayta qorqan. Tsaymi tsay ïdulu parlar payta mana adoraq kaqkunata wanutsiyänanpä nirqan.
16 Tsaynöllami anticristuqa yachaq runata y mana yachaq runatapis, imaykayuq runata y muchuq runatapis, wätaykunata y mana wätaykunatapis llapanta derëcha kaq makincho o urkuncho karpis señalatsirqan. 17 Tsay señal karqan anticristupa jutinpa nümerunmi. Señalanni kaq runakunaqa manami rantipakuyta ni rantikuyta kamäpakuyarqantsu. 18 Anticristupa ima nümerun kanqantapis shumaq tantiyayay. Tsay nümerunqa soqta pachak soqta chunka soqtami (666). Runapa jutinmi tsay nümeru kaykan. Pipis yachaq kaqqa tantiyakutsun pï runapa jutin tsay nümeru kanqantapis.