Warmipa wamranta Satanás wanutsiyta munanqan
12
Tsaypitanami ciëlucho rikakämurqan rupaynö chipipiykaq warmi. Tsay warmipa chakinchömi killa kaykarqan. Jatiranqan corönachömi chunka ishkay qoyllurkuna karqan. 2 Tsay warmimi qeshyakuy nanaywan pasaypa qayaraykarqan.3 Tsaypitanami ciëlucho rikakämurqan qanchis umayuq y chunka waqrayuq jatunkaray puka dragón.† Cada umanchömi corönata jatirarqan. 4 Chupanwan qaracharmi cäsi pullan qoyllurkunata kay patsaman jitariskamurqan.† Warmi qeshyakunanpä kaykaptinmi ñöpanman ichikuykurqan wamra yuriskiptin mikukurkunanpä.
5 Tsaypitanami tsay warmi qeshyakurqan ollqu wamrata. Paymi llapan nacionkunata fiërru värawan mandananpä yurirqan.† Tsay wamratanami ñöpanman Tayta Dios pushakurqan. 6 Warminami qeshpirqan Tayta Dios kamarinqan tsunyaq jirkaman. Tsaychömi Tayta Dios mikuyta kamariparqan juk waranqa ishkay pachak soqta chunka (1,260) junaq mikunanpä.a
Ciëlupita Satanásta qarqamunqan
7 Ciëluchönami Miguel jutiyuq angelwan† tsay puka dragón guërrata rurayarqan. Migueltami yanapayarqan angelninkuna y dragontanami yanapayarqan qatiraqnin angelkuna. 8 Dragonta y qatiraqnin angelkunatapis guërracho vinciskirmi ciëlupita qarqayämurqan. 9 Tsay jatunkaray dragonqa diablu ninqan Satanásmi. Paymi maytsaychöpis runakunata engañaq unay culebra kaykan.† Payta y qatiraqnin angelkunata vinciskiyaptinnami kay patsaman Tayta Dios qarqamurqan.†
10 Tsaypitanami wiyarqä ciëlupita jinchi nimuqta:
“¡Kananqa yärakuqkunata Tayta Diosnintsik salvananpä kaq höra chämushqanami!
¡Tayta Diosnintsikpa mandakuyninqa munayninwanmi shamushqana!
¡Kananpitaqa Jesucristunami llapantapis munaynincho tsararanqa!
¡Satanásqa ciëlupita qarqushqanami kaykan!
¡Tayta Diosman yärakuqkunata paqaspa junaqpa tumpaq Satanás† vincishqanami kaykan!
11 Tayta Diosman yärakuqkunami payta vinciyarqan yawarninta Carnish jichar wanunqanpita
y Tayta Diospa willakuynin ninqannö kawayanqanpita.
Manami wanuytapis mantsayarqantsu.
Tsaypa trokinqa listumi kayarqan Carnishman yärakuyanqanpita wanuyänanpäpis.
12 ¡Ciëlucho taqkuna, kushikuyay!
¡Allaw, kay patsacho y lamarcho kaqkuna!
Ciëlupita qarqamushqa karmi pasaypa ajanashqa diablu puriykan.
Pay musyaykanmi wallka tiempullana runakunata engañananpä kanqanta”.
Jesucristuman yärakuqkunata Satanás ñakatsinqan
13 Kay patsaman jitaskamuptinmi dragonqa ollqu wamrata qeshyakuq warmita qatikacharqan. 14 Tsaymi ankapa älantanö tsay warmita Tayta Dios kamariparqan tsunyaq jirkaman qeshpir aywakunanpä. Tsaychömi kimsa wata y soqta killa ministinqanta Tayta Dios kamariparqan.† 15 Tsaymi dragonqa mayutanörä yakuta aqtumurqan warmita apananpä.† 16 Warmita mana apananpämi patsapa shimin kichakaskir tsay yakuta ultaskirqan.