Tayta Diospa ishkay willakuqninkuna
11
Tsaychömi shoqushpita rurashqa värata ángel aptarkatsimar nimarqan: “Jerusalénman ayway Tayta Diospa templunta y altarta tupumunaykipä.† Nirkur yupamunki tsaycho adoraq runakunata. 2 Templu waqtancho kaykaq patiuta itsanqa ama tupumunkitsu. Tsay patiuta kachaykushqä mana cäsukamaq runakuna munaynincho tsararäyänanpämi. Paykunami chusku chunka ishkay (42) killaa sagrädu Jerusalén markata munaynincho tsararäyanqa.† 3 Tsay witsanmi ishkay willakuqnïkunata noqa nishä juk waranqa ishkay pachak soqta chunka (1,260) junaqb willakuynïta willakuyänanpä. Paykunaqa qachqa latsapankuna jatishqami willakuyanqa”.†4 Tsay ishkay willakuqkunaqa kay patsata kamaq Tayta Diospa ñöpancho ishkay olïvukuna y ishkay candelabrukunami kayan.† 5 Pipis paykunata wanutsiyta munayaptinqa shiminkunapita nina yarqamurmi rupar ushanqa. Paykunawan churakaqkunaqa tsaynömi wanuyanqa. 6 Tsay ishkay willakuqkunaqa munayyuqmi kayanqa tamyatapis mana tamyatsiyämunanpä,† yakutapis yawarman tikratsiyänanpä† y munayanqan höra runakunata pestiwan ushakätsiyänanpä.
7 Tayta Dios munanqannö willakuyninta willakur ushaskiyaptinnami wanwanyaykaqpita anticristo yarqamur† paykunapa contran shärir wanutsinqa.† 8 Wanutsiptinmi ayankuna jatun markapa pläzancho jitaräyanqa. Tsay markachömi Señornintsik Jesucristutapis wanutsiyarqan. Tsay markatami Sodomanö† y Egiptunö kanqanta niyan. 9 Kimsa junaq pullanyaqmi maytsay marka runakuna, maytsay trïbu runakuna, ima idiömata parlaq runakuna y maytsay nación runakunapis wanushqa jitaraykaqta rikayanqa. Ayankunatapis pampayänanta manami munayanqatsu. 10 Tsay willakuqkuna runakunata alläpa ajanätsishqa kayaptinmi kushikur imatapis juknin jukninpis qaranakuyanqa.
11 Wanushqa jitaraykäyanqanpita kimsa junaq pullantami tsay ishkay willakuqninkunata Tayta Dios kawaritsimunqa. Tsayta rikaqkunami pasaypa mantsakäyanqa. 12 Kawarirkamurnami wiyayanqa “¡kayman shayämuy!” nir ciëlupita qayakamuqta. Chikiqninkuna rikaraykäyaptinmi pukutay rurinpa ciëluman aywakuyanqa.† 13 Tsay höra patsa pasaypa kuyuptinmi† tsay markacho cada chunka wayipita juk wayi juchunqa y qanchis waranqa (7,000) runakuna wanuyanqa. Kawaykar quëdaqkunaqa pasaypa mantsakashqami Tayta Diosta alabayanqa.
14 Ishkay kaq ñakay päsaptinpis juk masrämi chämunanpä kaykan.
Qanchis kaq ángel cornëtata tukamunqan
15 Qanchis kaq ángel cornëtata tukamuptinmi ciëlucho angelkuna jinchi niyämunqan wiyakämurqan:
“¡Llapan nacionkunapis Señornintsik Tayta Diospa y Cristupa munayninchönami kaykäyan!
¡Paymi imayyaqpis mandaq rey kanqa!”†
16 Tsaymi Diospa ñöpancho kaykaq ishkay chunka chusku (24) mayor runakuna trönunkunacho jamaraykäyanqanpita lätakaykur Tayta Diosta adorarnin 17 niyarqan:
“Llapanpä munayyuq Tayta Dios, qamtami agradëcikuyä.
Unaypitami kaykanki, kananpis kaykankimi [y shamunaykipänami kaykanki].
Llapantami munaynikicho tsararaykanki.
Kananqa qamnami mandakur qallaykushqayki.
18 Qamta cäsukuyta mana munarmi maytsaychöpis runakuna pasaypa ajanäyarqan.
Kananqa kikikimi ajanar wanushqakunata juzganki.†
Tiempu chämushqanami sirvishuqniki profëtakunata y qamman yärakur mantsapakushuqnikikunata imaykayuq kayaptinpis imaynaq kayaptinpis premiuta qonaykipä.†
Runa mayinta wanutsiqkunataqa ushakätsinkimi”.
19 Tsaymi ciëlucho kaykaq templu kichakaskiptin rikarqä tsaycho kaykaq Pactu Babulta. Illaqukuypis, maqakuypis y runtu tamyapis pasaypami karqan. Kay patsapis pasaypami tsuktsukyarqan.†