Qellqaraykaq taksha rölluta ángel tsararanqan
10
Tsaypitanami rikarqä munayyuq ángel pukutay rurincho ciëlupita uraykämuqta. Uman jananchömi tseqyaw ichiraykarqan. Qaqllanpis rupaynömi chipipirqan. Chankankunapis junishpa nina shäriqnörämi karqan. 2 Kicharaykaq taksha röllun aptashqami shamurqan. Derëcha kaq chakinmi lamarman jarurarqan y itsuq kaq chakinnami patsaman jarurarqan. 3 Paymi leonnörä pasaypa qayararqan. Tsaynö qayaraptinmi maqakuypis qanchis kuti bunrurumurqan. 4 Tsay qanchis maqakuykuna bunrurumur ninqankunata qellqayta munaptïmi ciëlupita nimarqan: “Tsay wiyanqaykita ama qellqaytsu. Imata niyämunqantapis ama pitapis willaytsu”.5 Tsaymi lamarcho y patsacho ichiraq ángel derëcha kaq makinta ciëluman joqarirqan. 6 Tsaynö joqarkurmi ciëlutapis, kay patsatapis, lamartapis kamaq y imayyaqpis kawaq† Tayta Diospa jutincho jurar nirqan: “¡Tayta Dios mananami mas shuyanqanatsu! 7 ¡Qanchis kaq ángel cornëtata tukaskiptinmi llapantapis Tayta Dios cumplir qallaykunqa! ¡Sirviqnin profëtakunata willanqannöllami llapanpis päsanqa!”†
8 Tsaypitanami ciëlupita yapay nimarqan: “Lamarta y patsata jaruraykaq angelman ayway kicharaykaq rölluta chaskinaykipä”.
9 Tsaynö nimaptinmi ángel kaqman aywar tsay rölluta mañakurqä. Tsaymi ángel nimarqan: “Kay rölluta mikuy. Mikuptiki abëjapa mishkinnömi mishkinqa. Pachaykichömi itsanqa pasaypa ayanqa”.
10 Tsaymi rölluta chaskiskir mikurqä. Mikuptïmi shimïcho abëjapa mishkinnörä mishkirqan. Pachächönami pasaypa ayarqan.† 11 Mikuskiptïmi nimarqan: “Runakunata ima päsananpä kaqkunata yapay willakuy. Tayta Dios ninqannöllami runakunata päsanqa pï casta kayaptinpis, may nacionpita kayaptinpis, ima idiömata parlayaptinpis y rey kayaptinpis”.