Pitsqa kaq ángel cornëtata tukamunqan
9
Tsaypitanami pitsqa kaq ángel cornëtata tukamuptin kay patsaman qoyllur shushumuqta rikarqä. Tsay qoyllurmi supaykuna wichqaräyanqan wanwanyaykaq patsapa shiminpa llävinta chaskirqan. 2 Patsapa shiminta kichaskiptinmi jatun jornupita qoshni yarqamuqnörä qoshni yarqamurqan.† Tsay qoshni rupayta tsapaptinmi patsa tsakaskirqan.3 Tsay qoshnipitanami kay patsaman juntaqpä chukllushkuna yarqayämurqan.† Tsay chukllushkunami alacrannö pasaypa venënuyuq kayarqan. 4 Qewatapis ni jachatapis mana ushakätsiyänanpämi paykunata nirqan. Tsaypa trokinqa Tayta Diospa sëllunwan urkuncho mana señalaraq runakunallata ñakatsiyänanpämi nirqan.† 5 Tsaynöpis nirqan runakunata ñakatsirpis mana wanutsiyänanpämi. Wanutsiyänanpa trokinqa pitsqa killa nanaywan ñakatsiyänanpämi nirqan. Tsay nanayqa alacrán kaninqannörämi nanarqan. 6 Tsay witsan runakuna pasaypa ñakarnin wanuyta munarpis manami imanöpapis wanuyanqatsu. Wanuyta ashirpis manami tariyanqatsu.†
7 Tsay chukllushkunami guërraman aywayänanpä kamarishqa cawallukunanö kayarqan.† Umankunacho qori corönan jatishqanömi kayarqan. Qaqllankunapis runapa qaqllannömi karqan. 8 Aqtsankunanami imayka warmipa aqtsannö y kirunkunanami imayka leonpa kirunnö karqan.† 9 Cuerpunkunaqa läta chalëcushqanömi karqan. Pajayaptin älankuna sapsapyanqanpis wiyakarqan carrëtan qarachashqa cawallukuna guërraman aywaqnörämi.† 10 Chupannami alacranpa chupannö awja punta karqan. Chupanwan tuksiptinmi runakuna pitsqa killa qeshyar ñakayarqan. 11 Tsay chukllushkunapa mandaqnin karqan wanwanyaykaq raqracho angelmi. Tsay angelpa jutinmi hebreo idiömacho Abadón y griego idiömacho Apolión.a
12 Tsay punta kaq ñakay päsaskiptinpis ishkay ñakaykunarämi chäyämunanpä kaykäyan.
Soqta kaq ángel cornëtata tukamunqan
13 Soqta kaq ángel cornëtata tukamuptinmi wiyarqä Tayta Diospa ñöpancho kaykaq qori altarpa chuskun waqran† chawpinpita parlamuqta. 14 Tsaychömi tsay cornëta tukamuq angelta nirqan: “Éufrates mayu kuchuncho wataraykaq chusku angelkunata paskamuy”.
15 Paskaskamuptinmi tsay chusku angelkuna mayu kuchunpita aywayarqan kay patsacho cäsi pullan runakunata wanutsiyänanpä. Tsay angelkunami kamarikushqa kayarqan tsay höra, tsay junaq, tsay killa, tsay wata runakunata wanutsiq yarquyänanpä. 16 “¡Tsay angelkunawanmi ishkay pachak millón (200,000,000) soldädukuna cawallunkuna muntashqa aywaykäyan!” nimuqtami wiyarqä.
17 Soldädukunapa chalëcunkunami karqan ninanö puka, zafirunö azul y azufrinö qarwash. Cawallunkunapa umankunami karqan leonpa umannö. Shiminpitami yarqamurqan ninapis, qoshnipis y azufripis. Tsaytanömi soldädukunata y cawallunkunata revelacioncho rikarqä. 18 Shiminpita yarqamuq azufri, nina y qoshnimi kay patsacho cäsi pullan runakunata ushakätsirqan. 19 Manami shiminpita yarqamuqkunallawantsu runakunata cawallukuna wanutsiyarqan, tsaypa trokinqa culebra niraq umayuq chupankunawanpis kanirmi wanutsiyarqan.
20 Tsaynö kaptinpis mana wanuq runakunaqa jutsa rurayanqankunata manami kachariyarqantsu. Tsaypa trokinqa supaykunata y ïdulukunatami imaypis adorayarqan. Tsay ïdulukunaqa qoripita, qellaypita, broncipita, rumipita y qerupita rurashqa karmi rikayantsu ni wiyayantsu ni puriyantsu.† 21 Tsaynöpis wanutsikuq kayta, brüju kayta, fornicación jutsata y suwakuytapis manami kachariyarqantsu.†