3 Tsaypitanami Tayta Diospa trönun ñöpancho kaykaq altarman juk ángel charqan^† inciensiu qoshnitsikunan aptashqa. Altarpis inciensiu qoshnitsikunanpis qoripitami karqan. Tsaychömi atska inciensiuta chaskirqan Diosman yärakuqkuna mañakuyanqantawan^† altarman churananpä. 4 Altarcho inciensiuwan qoshnitsiptinmi yärakuqkuna mañakuyanqanwan inciensiupa qoshnin Tayta Diosman charqan.

5 Tsay angelmi inciensiu qoshnitsikunanman altarcho kaykaq shanshata wiñarkur kay patsaman jitaskamurqan.^† Tsaymi chipipirrä illaqukurqan, illaqukuypis pasaypami bunrurumurqan y patsapis pasaypami kuyurqan.^†

6 Tsaypitanami cornëtata chaskiq qanchis angelkuna tukayänanpä kamarikuyarqan.

7 Punta kaq ángel cornëtata tukamuptinmi ninawan yawar tallushqa runtu tamya kay patsaman tamyamurqan.^† Tsaywanmi cäsi pullan patsa rupar ushakarqan. Tsay runtu tamya chanqan kaqqa jachapis y qewapis llapanmi ushakarqan.

8 Tsaypita ishkay kaq ángel cornëtata tukamuptinmi jatunkaray jirkanö rupaykar lamarman jeqarqan. Tsaymi cäsi pullan lamar yawarman tikrarqan.^† 9 Yawarman tikranqan kaqchöqa llapanmi wanuyarqan. Tsaycho kaykaq büquikunapis jundikarmi ushakäyarqan.

10 Kimsa kaq ángel cornëtata tukamuptinmi jatunkaray rupaykaq qoyllur shushumurqan.^† Tsay qoyllurmi cäsi pullan mayukunaman y cäsi pullan pukyukunaman charqan. 11 Qoyllurpa jutinmi karqan Iwjiq. Iwjiq kaptinmi tsay qoyllur chanqan kaq yakuqa iwjiq tikrarqan.^† Tsay yakuta upuq kaqkunaqa atskaqmi wanuyarqan.

12 Chusku kaq ángel cornëtata tukamuptinmi rupaypis killapis qeshyarqan. Tsaymi rupaypis ni killapis shumaq atsikyämurqantsu.^† Tsaynöllami cäsi pullan qoyllurkunapis atsikyarqannatsu.

13 Tsaypitanami rikarqä juk anka^a junishpa tumaykaqta. Tsay hörami wiyarqä tsay anka jinchi kaynö nimuqta: “¡Wawallanay wawa! Patsacho kawaqkuna ¡imanörä kayanqa! ¡Kimsa angelkunarämi cornëtata tukayämunan pishin!”