Payman yärakuqkunata Tayta Dios señalanqan
7
Tsaypitanami chusku angelkuna kay patsapa chuskun kuchuncho ichiraykäyaqta rikarqä.† Tsay angelkunami wayrata tsaparäyarqan kay patsamanpis ni lamarmanpis ni ima jachamanpis mana wayramunanpä. 2 Paykunami munayyuq kayarqan kay patsatapis lamartapis castigayänanpä.Tsaynöllami rikarqä rupay yarqamunan kaqpita imayyaqpis kawaq Tayta Diospa sëllun aptashqa juk ángel shamuykaqta. Tsay angelmi patsapa kuchunkunacho kaykaq chusku angelkunaman jinchi qayakur 3 nirqan: “¡Tayta Diosnintsikpa sirviqninkunata urkunkunacho manarä señalaptïqa† kay patsacho kaqkunata, lamarcho kaqkunata ni jachakunatapis ama ushakätsiyayrätsu!”
4 Tsaypitanami ayka runakunata señalanqantapis wiyarqä. Tsay runakunami kayarqan juk pachak chusku chunka chusku waranqa (144,000) runakuna. Llapanpis Israel trïbu runakunapitami kayarqan:
5 Judá trïbupitami chunka ishkay waranqa (12,000) kayarqan.
Rubén trïbupitami chunka ishkay waranqa (12,000) kayarqan.
Gad trïbupitami chunka ishkay waranqa (12,000) kayarqan.
6 Aser trïbupitami chunka ishkay waranqa (12,000) kayarqan.
Neftalí trïbupitami chunka ishkay waranqa (12,000) kayarqan.
Manasés trïbupitami chunka ishkay waranqa (12,000) kayarqan.
7 Simeón trïbupitami chunka ishkay waranqa (12,000) kayarqan.
Leví trïbupitami chunka ishkay waranqa (12,000) kayarqan.
Isacar trïbupitami chunka ishkay waranqa (12,000) kayarqan.
8 Zabulón trïbupitami chunka ishkay waranqa (12,000) kayarqan.
José trïbupitami chunka ishkay waranqa (12,000) kayarqan.
Benjamín trïbupitami chunka ishkay waranqa (12,000) kayarqan.
Tsaytsika runakuna yuraq latsapashqa ciëlucho kayanqan
9 Tsaypitanami rikarqä Tayta Dios jamaranqan trönupa ñöpancho y Carnishpa ñöpancho yupaytapis mana atipaypä tsaytsika runakuna palman aptashqa y yuraq latsapankuna jatishqa kaykäyaqta. Paykunami kayarqan maytsay nación runakuna, maytsay trïbu runakuna, maytsay marka runakuna y imaykaläya idiömata parlaq runakuna. 10 Paykunami jinchi niyarqan: “¡Trönucho jamaraykaq Tayta Dios y ñöpaykicho kaykaq Carnish, qamkunami salvayämashqayki!”
11 Tsaymi Tayta Diospa ñöpancho kaykaq chusku kawaykaqkuna, ishkay chunka chusku (24) mayor runakuna y llapan angelkunapis lätakaykur Tayta Diosta alabar 12 niyarqan:
“¡Amén!
¡Tayta Diosnintsik alabashqa kaykullätsun!
¡Payllami llapantapis musyan!
¡Imayyaqpis payta agradëcikushun!
¡Payllami llapanpä munayyuq!
¡Imayyaqpis payta alabashun!
¡Amén!”
13 Tsaymi Tayta Diospa ñöpancho kaykaq ishkay chunka chusku (24) mayor runakunapita juknin tapumarqan: “¿Pikunatä tsay yuraq latsapan jatishqakuna kaykäyan? ¿Maypitatä shayämushqa?” nir.
14 Tsaymi nirqä: “Taytay, qammi musyanki”.
Tsaynö niptïmi nimarqan: “Paykunaqa pasaypa ñakaykunata päsaq runakunami kaykäyan.† Yawarninta jichar carnish wanunqanpitami perdonashqana kayan. Carnishpa yawarninwan taqshakushqa kayaptinmi latsapankunapis yuraq kaykan.† 15 Tsay runakunaqa Tayta Dios jamaranqan trönun ñöpanchömi kaykäyan.
“Paqaspis junaqpis templunchömi alabayan.
Trönucho jamaraykaq Tayta Diosmi paykunata imaypis rikanqa.
16 Paykunaqa imaypis mananami mallaqäyanqatsu ni yakunäyanqatsu.
Rupaypis paykunata manami rupanqatsu.
Achaypis mananami ajayätsinqatsu.†
17 Tayta Dios jamaranqan trönun ñöpancho Carnishmi paykunata mitsinqa.†
Imaypis mana yakunäyänanpämi kawatsikuq yakuman pushanqa.†
Kikin Tayta Diosmi shoqar weqinkunatapis pitsanqa”.†