Qanchis cöpakunacho kaykaq castïgukunata jichayämunqan
16
Tsaypitanami wiyarqä ciëlucho kaykaq templupita qanchis angelkunaman jinchi qayakur niqta: “Tsararaykäyanqayki cöpakunapita Tayta Diospa castïgunta patsaman jichayämuy”.2 Tsaynö niptinmi punta kaq ángel tsararaykanqan cöpacho kaykaq castïguta patsaman jichamurqan. Tsaymi anticristupa señalninwan señalashqa kaqkunata y ïdulunta adoraqkunata qeri pasaypa usharqan. Tsay qeriwanmi pasaypa ñakayarqan.†
3 Ishkay kaq angelnami tsararaykanqan cöpacho kaykaq castïguta lamarman jichamurqan. Tsaymi yawarman lamar tikraptin tsaycho kaqkunaqa llapan wanuyarqan.
4 Kimsa kaq angelnami tsararaykanqan cöpacho kaykaq castïguta llapan mayukunaman y pukyukunamanpis jichamurqan. Tsaymi mayupis pukyupis yawarman tikrayarqan.† 5 Tsaypitanami wiyarqä yakupä munayyuq ángel kaynö nimuqta:
“[Tayta Dios,] runakunata tsaynö castigar allitami ruraykanki.
Unaypita patsami imayyaqpis kaykanki.
Qamqa santumi kanki.
6 Qamman yärakuqkunatapis y profëtaykikunatapis wanutsirmi yawarninta jichayarqan.
Tsaymi kikinkunapis yawarta upuyänanpä yakuta yawarman tikratsishqayki”.
7 Tsaynöllami wiyarqä ciëlucho kaykaq altarpita kaynö nimuqta: “Llapanpä munayyuq Tayta Dios, allimi juzgaykanki”.
8 Chusku kaq angelnami tsararaykanqan cöpacho kaykaq castïguta rupayman jicharqan. Tsaymi rupay alläpa achaptin runakuna pasaypa ñakayarqan. 9 Tsaynö ñakarpis Tayta Diosta manami adorayarqantsu ni jutsankunatapis kachariyarqantsu. Tsaypa trokinqa castiganqanpitami Tayta Diospa contran imaykatapis parlayarqan.
10 Pitsqa kaq angelnami tsararaykanqan cöpacho kaykaq castïguta anticristupa trönunman jichamurqan. Tsaymi anticristo mandanqan llapan markakuna tsakaskiyarqan.† Runakunanami nanaywan qalluntapis kaniyarqanrä. 11 Qeri qeshyawan pasaypa ñakarmi Tayta Diospa contran imaykatapis parlayarqan. Tsaynö ñakarpis y qeri ushaptinpis jutsa ruraykunata manami kachariyarqantsu.
12 Soqta kaq angelnami tsararaykanqan cöpacho kaykaq castïguta Éufrates jatun mayuman jichamurqan. Tsaynami mayu tsakiskirqan† rupay yarqamunan kaqpita shamuq reykuna soldädunkunawan päsayämunanpä.
13 Tsaypitanami rikarqä säpu niraq kimsa supaykunata. Tsay supaykunami yarqayämurqan dragonpa shiminpita, anticristupa shiminpita y llullakuq profëtapa shiminpitapis. 14 Tsay kimsa supaykunaqa milagrukunatapis rurayarqanmi. Maytsaypapis aywarmi mandaq reykunata y soldädunkunata qoriyarqan llapanpä munayyuq Tayta Dios juzganan junaq pelyayänanpä.
15 “Mana musyayanqayki hörami suwanö illaqpita shamushä.† Kushishqami kayanqa latsapashqalla maya mayalla shuyämaqkunaqa. Kutimur mana kamarikushqata tariptï qallapächulla kar penqakuyanqaykinömi pasaypa penqakuyanki”.
16 Tsaypitami tsay kimsa supaykuna llapan reykunata soldädunkunatawan juk patsaman qoriyarqan. Hebreo idiömacho tsay patsapa jutinmi kaykan Armagedón.†
17 Qanchis kaq angelnami tsararaykanqan cöpacho kaykaq castïguta wayraman jichamurqan. Tsaymi [ciëlucho kaykaq] templupita y Diospa trönunpita jinchi nimuqta wiyarqä: “¡Kananqa llapanpis cumplishqanami!”
18 Tsaynö nimuptinmi chipipirrä illaqukuy rikakämurqan y maqakuy bunrurumunqanpis wiyakämurqan. Patsapis pasaypami kuyurqan.† Runakunata Tayta Dios kamanqanpita patsa manami imaypis tsaynö kuyurqantsu.
19 Jatunkaray Babilonia markacho taq runakuna jutsata rurayanqanpitami cöpa junta wiñaraykaq ajanayninta Tayta Dios uputsir pasaypa castigarqan.† Tsaynö castigaptinmi tsay marka kimsaman rakikarqan. Wakin markakunanami pasaypa juchur ushakäyarqan. 20 Llapan islakunapis y jirkakunapis illakaskiyarqanmi.† 21 Ciëlupitami chusku arröbanö jatusaq runtu tamya† tamyamurqan. Tsay runtu tamyawan ñakarmi runakuna imaykatapis Tayta Diospa contran parlayarqan.