Prostitüta warmita rikanqan
17
Tsaypitanami cöpata jichamuq qanchis angelkunapita juk ángel shamuykur nimarqan: “Aku aywashun yaku† janancho jamaraykaq prostitüta warmita Tayta Dios imanö castigananpä kanqantapis rikatsinäpä. 2 Tsay warmiwanqa mana penqakuypami reykuna kakuyashqa. Mana alli costumbrinkunaqa machätsikuq vïnunömi kaykan. Tsay vïnuta upurmi kay patsacho runakuna machäyarqan”.3 Tsaypitanami revelacioncho tsunyaq jirkaman ángel pushamarqan. Tsaychömi rikarqä juk warmi mantsariypä puka uywata muntaraykaqta. Tsay uywami karqan qanchis umayuq y chunka waqrayuq. Uywapa jananchömi Tayta Diospa contran qellqaraykarqan.† 4 Warmipa latsapanmi karqan granäti y puka püru tëlapita. Qoriwan, kuyayllapä rumikunawan y perlaskunawanpis adornashqami karqan. Tsararanqan qori cöpachömi wiñararqan llapan jutsata ruranqankuna. Tsayqa pasaypa melanaypämi karqan. 5 Urkunchömi runakuna mana musyayanqan jutin qellqaraykarqan:
“Babilonia jatun markami kä.
Prostitütakunapa mamanmi kä.
Jutsa ruraqkunapa mamanmi kä”.a
6 Tsaypita rikaykunäpämi tantiyaskirqä Jesucristuman yärakuqkunata wanutsir yawarninta upunqanwan tsay warmi shinkashqa kaykaqta. Tsayta rikaykurmi pasaypa mantsakar ima ruraytapis kamäpakurqätsu.
7 Tsaymi ángel nimarqan: “¿Imanirtä mantsakashqa kaykanki? Kanan tantiyatsishayki tsay warmipä y tsay qanchis umayuq y chunka waqrayuq muntaraykanqan uywapäpis. 8 Tsay rikanqayki uywaqa ñöpata kawashqa karpis kananqa manami kawannatsu. Tsaynö karpis wanwanyaykaqpitami yarqamunqa.† Nirkurmi ushakanqa. Shamuqta rikarmi runakuna pasaypa mantsakäyanqa. Tsay runakunapa jutinkuna manami Libru de la Vïdacho† qellqarantsu. Tsay librutami Tayta Dios qellqarqan kay patsata kamanqan witsan.
9 “Tantiyakuq kaqqa shumaq tantiyakuyätsun. Tsay uywapa qanchis umankuna kaykan prostitüta warmi jamaranqan qanchis jirkankunami.b 10 Tsaynöllami tsay umankuna kaykan mandaq qanchis reykuna. Tsay qanchis reykunapita pitsqa reykuna maynami ushakäyashqa. Kananqa juknami mandaq kaykan. Qanchis kaq rey yurimur manami unayyaqqa mandanqatsu. 11 Ñöpata kawaq puka uywaqa puwaq kaq reymi kanqa. Qanchis kaq reykunanömi kanqa. Nirkurmi paypis ushakanqa.
12 “Chunka waqrakunata rikanqaykiqa chunka reykunami kaykäyan.† Paykuna manarämi mandar qallaykuyanrätsu. Juk tiempullapämi mandaq kayta chaskiyanqa mantsariypä uywawan juntu mandayänanpä. 13 Mandarnami tsay chunka reykuna willanakur munayninta tsay uywata qoyanqa. 14 Tsaymi tsay uywawan Carnishpa contran shärir pelyayanqa. Contran shäriyaptinpis llapan mandaqkunapa y reykunapa mandaqnin karmi† paykunata Carnish vincinqa. Carnishwanmi kayanqa qayanqan, akranqan y imaypis cäsukuq runakuna”.
15 Tsaypitanami ángel nimarqan: “Prostitüta jamaranqan yakuqa maytsay marka runakuna, maytsay nación runakuna y imaykaläya idiömata parlaq runakunami kaykäyan. 16 Rikanqayki chunka waqrakuna y uywapis tsay prostitütata pasaypami chikiyanqa. Tsaymi llapan imankunatapis apar qallapächullata jaqiykuyanqa. Tsaypitanami aytsanta mikuyanqa y sobraq kaqtana rupatsiyanqa. 17 Tsaypitanami Tayta Dios yarpayta qonqannölla tsay chunka waqrakuna willanakur munayninta uywata qoyanqa. Tsaymi tsay uywa munayyuq kanqa Tayta Dios ninqannölla llapanpis cumplinqanyaq.
18 “Rikanqayki warmiqa jatunkaray markami. Tsay markaqa kay patsacho kaykaq reykunatami munaynincho tsararaykan”.