Babilonia marka ushakänanpä ninqan
18
Tsaypitanami rikarqä munayyuq juk ángel ciëlupita uraykämuqta. Chipipiyninmi entëru patsata atsikyaparqan. 2 Tsay angelmi jinchi nimurqan:“¡Ushakashqanami, ushakashqanami jatunkaray Babilonia marka!†
Kananqa supaykunallanami tsaycho taykäyan.
Tsaychöqa melanaypä impüru wiskurkuna y tukukunallami waqaykäyan.†
3 Babiloniapa mana alli costumbrinkuna machätsikuq vïnunömi karqan.
Tsay vïnutami entëru patsacho runakuna upuyarqan.
Kay patsacho reykuna mana alli costumbrinkunata Babiloniapita yachakurmi ïdulukunata adorayarqan.†
Imatapis rikanqan kaqta Babilonia rantiptinmi negociantikuna pasaypa imaykayuq rikakuyarqan”.
4 Tsaypitanami wiyarqä ciëlupita nimuqta:
“¡Kuyanqä runakuna, Babiloniapita aywakuyay!†
¡Jutsata mana rurayänaykipä witikuyay!
Mana witikuyaptikiqa Babiloniaman castïgu chämunqannömi qamkunamanpis chämunqa.
5 Babiloniapa jutsankunaqa ciëluyaqmi chashqa.†
Llapan jutsantami Tayta Dios musyaykan.
6 Tayta Dios, jukta ñakatsiyanqannölla kikintapis castigar ñakaykatsillay.
Jutsata ruranqanman tupu yapa yapaykur castigaykullay.†
7 Imaykayuq karmi pasaypa allish tukur kawarqan.
Imanöpis kanqanman tupu ñakaykatsillay y llakikuyman churaykullay.
Babiloniami shonquncho nirqan:
‘Noqaqa reinanömi kaykä.
Manami viüdatsu kä.
Manami imaypis llakikur waqashätsu’.
8 Tsaynö kanqanpitami pasaypa ñakanqa.
Wanuypis, ñakaypis y mallaqaypis illaqpitami payman chanqa.
Tsaynö ñakaykaqtami nina rupar ushanqa.
Babiloniataqa llapanpä munayyuq Tayta Diosmi castiganqa”.†
9 Rupanqanpita qoshni shäriykaqta rikarmi llapan nacionkunapa mandaqnin reykuna llakikur waqayanqa. Tsay reykunaqa Babilonia runakunawan riquëzankunata qaranakurmi ïdulukunatapis adorayarqan. 10 Castiganqanta rikarmi mantsakashqa karullapita rikarar niyanqa:
“¡Allaw, Babilonia jatun marka!
¡Munayyuqmi karqayki!
¡Kananqa illaqpitami ushakashqayki!”†
11 Tsaymi negociunkunata rantiyänanpä pipis manana kaptin llapan negociantikunapis pasaypa waqayanqa.† 12 Paykunami rantikuyänanpä apayaq qorita, qellayta, kuyayllapä rumikunata, perlaskunata, lïnupita y sëdapita rurashqa granäti y puka püru tëlakunata, tukuyläya fïnu tablakunata, kuyayllapä marfilpita, qerupita, broncipita, fiërrupita y marmolpita rurashqa adornukunata. 13 Tsaynöllami rantikuq apayaq canëlata, inciensiuta, mïrrata y tukuyläya mushkuq jachakunatapis. Tsaynöllami apayaq vïnuta, aceitita, jarinata, trïguta, wäkakunata, üshakunata, cawallukunata y carrëtakunatapis. Tsaynöllami runakunatapis rantikuyaq watay kayänanpä.†
14 Tsaymi negociantikuna llakikur tsay markata niyanqa:
“¡Imaykanöpapis qorinqayki riquëzaykikuna manami kannatsu!
¡Kuyayllapä tsararanqaykikuna ushakashqanami!
¡Imaykayuq kanqaykinöqa manami imaypis kankinatsu!”
15 Tsay markacho imaykayuq rikakuq negociantikunami rupaykaqta karullapita rikarnin mantsakashqa waqar† 16 niyanqa:
“¡Allaw, Babilonia jatun marka!
Tsay markaqa kuyayllapä karmi lïnupita rurashqa puka püru y granäti latsapashqa warminö karqan.
Qoriwan, kuyayllapä rumikunawan y perlaskunawan adornashqa warminömi karqan.
17 ¡Riquëzankunapis illaqpitami ushakashqa!”
Büqui manijaqkuna y büquicho llapan arupakuqkunami karullapita rikaräyanqa.† 18 Tsay markapita qoshni shäriqta rikarmi pasaypa waqar niyanqa: “Manami may markapis tsay markanö pasaypa kuyayllapäqa kashqatsu”.†
19 Pasaypa waqar qayararmi allpatapis umankunaman wiñakur niyanqa:
“¡Allaw, Babilonia jatun marka!
Tsaychömi büquiyuqkuna negociunta rantikur llapanpis imaykayuq tikrayashqa.
Kananqa illaqpitami pasaypa ushakashqa”.†
20 Ciëlucho kaqkuna, ¡kushikuyay! Apostolkuna, profëtakuna y Diosman llapan yärakuqkunapis, ¡kushikuyay! Qamkunata wanutsiyäshunqaykipitami tsay markata Tayta Dios chipyaq ushakätsishqa.†
21 Tsaypitanami munayyuq juk ángel mulinunö rumita joqarkur lamarman jitar nirqan:
“Babilonia marka, kaynömi ushakanki.†
Qamtaqa manami imaypis rikayäshunkinatsu.†
22 Runakuna cantayanqankunapis manami qamcho wiyakanqanatsu.
Manami arpata, flautata ni cornëtata tukayanqanpis wiyakanqanatsu.†
Ima aruyta yachaqkunapis manami kayanqanatsu.
Mulinu taqraranqanpis manami wiyakanqanatsu.
23 Pipis mana taptinmi aktsipis kanqanatsu.
Majatsakay fiestapis mananami kanqanatsu.†
Qamcho taq negociantikuna maytsay negociantikunapitapis mas munayyuqmi kayarqan.
Brüju karmi maytsaychöpis taq runakunata criyitsishqayki.
24 Qamchömi profëtakunapa, Diosman yärakuqkunapa y maytsaycho runakunapa yawarnin mashtaraykan”.†