Ciëlucho alabayanqan
19
Tsaypitanami wiyarqä ciëlucho atskaq runakuna jinchi nimuqta:“¡Aleluya!
¡Tayta Diosnintsikmi munayninwan runakunata salvan!
¡Payqa llapanpä munayyuqmi kaykan!
[¡Pïmaypis payta alabayätsun!]
2 ¡Payqa pitapis shumaqmi juzgan!
Llapan runakunata jutsa ruratsiq prostitütata castigashqanami.
Tayta Diospa sirviqninkunata wanutsinqanpitami kikintana ushakätsishqa”.†
3 Nirkurnami yapay niyämurqan:
“¡Aleluya!
Tsay marka rupaptinmi mana ushakaypa qoshni shärinqa”.†
4 Tsaypitanami trönuncho jamaraykaq Tayta Diosta adorayänanpä puntancho kaykaq ishkay chunka chusku (24) mayor runakuna y tsaycho kaykaq chusku kawaykaqkunapis lätakaykur niyarqan: “¡Amén! ¡Aleluya!”
5 Tsaynö niyaptinnami Tayta Dios jamaraykanqan trönunpita nimuqta wiyarqä: “¡Tayta Diosnintsikpita mantsapakur sirviqkuna, imaykayuq karpis imaynaq karpis llapayki alabayay!”
Gloriacho majatsakay fiesta kanqan
6 Tsaypitanami atskaq runakuna alabaykäyaqta wiyarqä. Tsay alabayanqanmi atska yaku aywar qayaraqnö† y maqakuy bunruruqnö wiyakarqan. Tsay runakunami niyarqan:
“¡Aleluya!
¡Llapanpä munayyuq Tayta Diosnintsik mandakuykannami!†
7 ¡Payta kushishqa alabashun!
Chämushqanami Carnish majatsakänan fiesta.
Majatsakänanpä kaq jipashpis kamarikushqanami kaykan.†
8 Tsay jipashtami fïnu lïnupita rurashqa chipipiykaq limpiu latsapata jatikunanpä Tayta Dios kamaripashqa”.
(Tsay latsapaqa Tayta Diosman yärakuqkuna allikunata rurayanqanmi.)
9 Tsaymi ñöpächo kaykaq ángel nimarqan: “Kay ninqäta qellqay: ‘Tsay majatsakay fiestaman qayatsinqan runakuna kushishqami kayanqa’ ”.†
Nirkurnami nimarqan: “Kay ninqäkunaqa Tayta Dios ninqankunami”.
10 Tsaynö nimaptinmi angelta adoranäpä lätakaykurqä. Tsaymi nimarqan: “¡Noqata ama adoramaytsu! Noqapis qamnölla y yärakuq mayikikunanöllami Tayta Diospa sirviqnin kaykä. ¡Tayta Diosllata adoray! Llapan willakunqäpis Jesucristo alabashqa kananpämi kaykan”.
Kay patsaman Jesucristo kutimunqan
11 Tsaypitanami ciëlu kichakaskiptin† rikarqä yuraq cawalluta. Muntaraqninpa jutinmi karqan Ninqanta Rasunpaypa Cumpliq. Paymi mayqanpapis mana janan shärir juzgan. Mana alli ruraqkunata ushakätsinanpämi guërratapis ruran.† 12 Ñawinkunapis ninanörämi atsikyarqan.† Umanchömi atska corönakunata jatirarqan. Tsaychömi juk jutin qellqararqan. Tsay jutitaqa kikillanmi musyarqan. 13 Yawarllana latsapan jatishqami kaykarqan. Jutinmi kaykan Diospa Palabran.†
14 Paytami ciëlupita kaq soldädukuna yuraq cawallunkuna muntashqa qatiräyarqan. Paykunami fïnu lïnupita rurashqa yuraq y limpiu latsapankuna jatishqa kayarqan.
15 Yuraq cawallu muntaraqpa shiminpitami afilashqa espäda yarqamurqan. Nacionkunata tsay espädawan vinciskirmi fiërru värata aptarkur mandanqa. Nacionkunata castigarmi üvata jarukunan pözucho jaruqnö castiganqa. Tsaynö castigarmi llapanpä munayyuq Tayta Dios pasaypa ajananqanta musyatsinqa.† 16 Sotänancho y raku chankancho qellqaraq juk jutinmi nirqan: “Reykunapa Reynin y mandaqkunapa Mandaqnin”.†
17 Tsaypitanami rupay janancho juk ángel ichiraykämuqta rikarqä. Tsay angelmi wiskurkunata qayar nirqan: “¡Tayta Dios kamarinqan mikuyta mikuyänaykipä llapayki shayämuy! 18 ¡Runakunapa aytsantami mikuyanki! ¡Reykunapa, soldädukunapa, soldädupa mandaqninkunapa y muntaräyanqan cawallunkunapa aytsankunatapis mikuyankimi! ¡Wätaypatapis, mana wätaypatapis, imaykayuqpatapis, imaynaqpatapis llapan runakunapa aytsantami mikuyanki!”†
19 Tsaychömi rikarqä anticristuta y llapan nacionkunapa mandaqnin reykuna soldädunkunawan kaykaqta. Paykunami yuraq cawallun muntashqa runawan y soldädunkunawan pelyayänanpä qorikäyarqan. 20 Tsaychömi yuraq cawallun muntashqa runa anticristuta y llullakuq profëtatapis prësu tsarirqan. Manarä prësu tsariptinmi tsay llullakuq profëta anticristupa ñöpancho milagrukunata rurar anticristupa señalninta chaskiqkunata y ïdulunta adoraqkunatapis criyitsirqan.†