Kawarimuqkuna Jesucristuwan juk waranqa wata mandayänanpä ninqan
20
Tsaynöllami rikarqä ciëlupita juk ángel uraykämuqta. Tsay angelmi wanwanyaykaq patsapa shiminpa llävinta y jatunkaray cadënata aptashqa urämurqan. 2 Dragonta tsariskirmi juk waranqa (1,000) wata wataränanpä watarqan. Tsay dragonmi diablu niyanqan Satanás y unay culebra karqan.† 3 Wanwanyaykaq patsapa shiminpa jitarpurmi pitapis manana engañananpä punkunta wichqaskir sellaskirqan. Juk waranqa wata cumpliskiptinnami pöcu tiempulla libri kananpä kachaykunqa.4 Tsaypitanami trönukunata rikarqä. Tsay trönukunamanmi juzgaqkuna jamakuyarqan.† Tsaynöllami tsaytsika almakunatapis rikarqä. Tsay almakunami kayarqan Jesucristuman yärakur Tayta Diospa willakuyninta willakuyanqanpita umankunatapis jipiypa wanutsiyanqan runakunapa almankuna.† Paykuna manami anticristuta ni ïduluntapis adorayarqantsu. Tsaynöpis manami anticristupa señalninwan urkunmanpis ni makinmanpis señalatsikuyarqantsu.†
Tsay runakuna kawariskamurmi juk waranqa (1,000) wata Jesucristuwan mandayanqa. 5 Paykunaqa puntatami kawariyämunqa. Wakin wanuqkunami itsanqa juk waranqa wata cumpliskiptinrä kawariyämunqa. 6 Puntata kawarimuqkunaqa kushishqami kayanqa. Paykunaqa Tayta Dios kuyanqan santu runakunami kayanqa. Tsaymi qepa kaq wanuyman chäyanqatsu.† Tsaypa trokinqa Tayta Diosta y Jesucristuta sirviq sacerdötikuna karmi† Jesucristuwan juk waranqa wata mandayanqa.
Satanásta infiernuman qaykunanpä ninqan
7 Juk waranqa (1,000) wata päsaskiptinnami prësu kaykaq Satanásta kachaykunqa. 8 Tsaymi llapan nación runakunata engañananpä maytsaypapis purir Gog nacionpa y Magog nacionpa† soldädunkunatapis guërrata rurayänanpä qorinqa. Lamar kuchuncho aqushanömi tsay soldädukunapis tsaytsika kayanqa.
9 Tsay soldädukuna maytsaypita shamurmi Dios kuyanqan markacho yärakuq runakunapa campamentunta tumaypa jirurupäyanqa. Tsaynö jiruruparaykäyaptinmi Tayta Dios ciëlupita ninata ishkitsimur tsay soldädukunata ushakätsinqa. 10 Nirkurnami runakunata engañaq diabluta azufriyuq nina rupaykaq qochaman qaykunqa. Tsaychömi anticristo y llullakuq profëtapis mayna qaykuraykäyanqa. Tsaychömi diablupis paqaspa junaqpa imayyaqpis paykunawan ñakanqa.
Llapan runakunata Tayta Dios juzgananpä ninqan
11 Tsaypitanami rikarqä jatunkaray yuraq trönuncho Tayta Dios jamaraykaqta. Paypa ñöpanpitami kay patsapis y ciëlupis illakaskiyarqan. Mananami mas rikakäyarqannatsu. 12 Tsaynöllami rikarqä llapan wanuq runakuna, yachaq mana yachaqpis, Tayta Diospa ñöpancho ichiraykäyaqta. Tsaypitami librukunata kichar Libru de la Vïdatapis Tayta Dios kicharqan.† Tsay librukunata rikaykurmi allita o mana allita rurayanqanman tupu runakunata juzgarqan.† 13 Tsay runakunami kayarqan lamarcho wanuqkuna, pamparaqkuna y maytsaycho wanuqkunapis. Llapantami imatapis rurayanqanman tupu Tayta Dios juzgarqan. 14 Tsaypitanami wanuytapis Hadestapis nina qochaman jitarirqan. Tsay nina qochaqa qepa kaq wanuymi kaykan.† 15 Tsaymanmi Libru de la Vïdacho jutinkuna mana qellqaraq kaq runakunatapis qaykurirqan.