Apocalipsis 21

Kay patsapis y ciëlupis mushuq kayänanpä ninqan

Tsaypitanami mushuq patsata y mushuq ciëluta^† rikarqä. Unay kaq ciëlupis y unay kaq patsapis manami karqannatsu. Lamarpis mananami karqannatsu. 2 Tsaynöllami [noqa Juan] rikarqä mushuq Jerusalén sagrädu markatapis^† Tayta Diospa ñöpanpita uraykämuqta.^† Tsay markami majatsakänanpä mushuq latsapan jatishqa jipashnö kuyayllapä karqan.^† 3 Tsay hörami wiyarqä Tayta Diospa trönunpita jinchi nimuqta:

“¡Kananqa runakuna kaqchönami Tayta Dios tanqa!^†

Paykunami kuyanqan runakuna kayanqa.

Kikin Tayta Diosmi paykunawan kanqa.^†

4 Paykunata shoqarmi weqinkunatapis pitsanqa.^†

Wanuypis, waqaypis, llakikuypis y ñakaykunapis mananami kanqanatsu.^†

Tsaykunaqa llapanmi ushakanqa”.

5 Trönucho jamaraykaqnami nimurqan: “Llapantami mushuqta ruraykä”.

Tsaypitanami nimarqan: “Kay ninqäkunaqa rasun kaqmi. Tsaynö kaptinqa llapan ninqäkunata qellqay”.

6 Tsaypitanami nimarqan: “Llapanpis cumplishqanami. Alfa y Omegami noqa kä.^a Qallanan y ushananmi kaykä.^† Yakunaqkunataqa debaldillami kawatsikuq yakuta qarashä.^† 7 Imanö ñakarpis mana ajayaypa yärakamuqkunaqa^† llapan herenciantami chaskiyanqa. Noqami paykunapa Diosnin kashä. Paykunami wamräkuna kayanqa.^† 8 Noqapita penqakuqkunata, mana yärakamaqkunata, jutsasapakunata, wanutsikuqkunata, fornicación jutsata ruraqkunata, brüjukunata, ïdulukunata adoraqkunata y llullakuqkunatapis azufriyuq nina lunyaykaq qochamanmi qaykushä. Tsay nina qochaqa qepa kaq wanuymi kaykan”.^†

Mushuq Jerusalén imanö kananpä ninqan

9 Tsaypitanami cöpakunawan castïgukunata jichamuq qanchis angelkunapita^† juk ángel shamuykur nimarqan: “Carnishwan majatsakänanpä kaq jipashta rikatsinäpä aku aywashun”.

10 Tsaynö nirmi revelacioncho jatun jirka jananman pushamarqan.^† Tsaychömi rikatsimarqan mushuq Jerusalén sagrädu marka Tayta Diospa ñöpanpita uraykämuqta.

11 Tsay markaqa Tayta Diospa chipipiyninwanmi chipipirqan. Jaspe ruminö y cristal vidriunömi kuyayllapä karqan. 12 Markataqa jatunkaray murällami tumaypa tsapararqan. Tsay murällami chunka ishkay punkuyuq karqan. Cada punkuchömi juk ángel karqan. Tsaynöllami cada punkucho juk juti qellqararqan. Tsay jutikunami Israelpa tsurinkunapa jutinkuna kayarqan. 13 Kimsa punkukunami kayarqan rupay yarqamunan kaqläpa, kimsa kaqna norti kaqläpa, kimsa kaqnami sur kaqläpa y kimsa kaqna rupay jeqanan kaqläpa.^† 14 Murälla kaqchömi chunka ishkay rumikuna karqan. Cada rumikunachömi juk juti qellqararqan. Tsay jutikunaqa Carnishpa chunka ishkay apostolninkunapa jutinkunami karqan.^†

15 Noqawan parlaq angelmi qoripita rurashqa värata aptarkur tsay markata, punkunkunata y murällantapis tupumurqan.^† 16 Tupuptinmi tsay markapa altunpis, anchunpis y largunpis tsay tamäñulla karqan. Tsaymi tsay markapa cada lädun karqan chunka ishkay waranqa (12,000) estadio.^b 17 Nirkurmi murällanpa anchunta tupurqan. Tupuptinmi anchun karqan chusku chunka chusku (144) kukush.^c

18 Tsay murällaqa jaspe rumikunawan pirqashqami karqan. Markaqa qorillapita rurashqa karmi limpiu vidriunö chipipirqan. 19 Tsay murällapa cimientunmi tukuy niraq kuyayllapä rumikunawan pirqashqa karqan:

Punta kaqmi karqan jaspe rumi,

ishkay kaqmi karqan zafiro rumi,

kimsa kaqmi karqan ágata rumi,

chusku kaqmi karqan esmeralda rumi,

20 pitsqa kaqmi karqan ónice rumi,

soqta kaqmi karqan cornalina rumi,

qanchis kaqmi karqan crisólito rumi,

puwaq kaqmi karqan berilo rumi,

isqun kaqmi karqan topacio rumi,

chunka kaqmi karqan crisopraso rumi,

chunka juk kaqmi karqan jacinto rumi

y chunka ishkay kaqnami karqan amatista rumi.

21 Tsay murällapa chunka ishkay punkunkunami cada ünun juk perlaspita rurashqa karqan.^† Markapa jatun kaq cällinmi chipipiykaq qoripita rurashqa karqan. Imayka vidriunömi karqan.

22 Tsay markachöqa templuta manami rikarqätsu. Tsaychöqa llapanpä munayyuq Tayta Dios y Carnishmi templu kaykan. 23 Kikin Tayta Dios^† y Carnish^† atsikyaptinmi rupaypis ni killapis kanqanatsu.

24 Maytsay nacionkunacho salvashqa runakunatami aktsipanqa.^† Nacionkunapa mandaqnin reykunapis kuyayllapä riquëzankunatami tsayman apayanqa. 25 Tsay markacho patsa mana tsakaptinmi imaypis punkunkunata wichqayanqatsu. 26 Maytsay nacionpitapis tsay markamanmi riquëzankunata apayanqa.^† 27 Tsayman manami yaykuyanqatsu jutsasapakuna,^† llutanta ruraqkuna ni llullakuqkuna. Tsayman yaykuyanqa Libru de la Vïdacho jutinkuna apuntashqa kaqkunallami. Tsay libruqa Carnishpa librunmi kaykan.