22
Tsaypitanami ángel rikatsimarqan imayyaqpis kawatsikuq y kuyayllapä cristal vidriunö chipipiykaq [chuya] mayuta.† Tsay mayumi yarqamurqan Tayta Dios y Jesucristo jamaranqan trönu chakinpita. 2 Jatun kaq cälli chawpinpami tsay mayu päsarqan. Mayupa kuchunkunachömi imayyaqpis kawatsikuq jachakuna kayarqan.† Tsay jachakunami killa killa wayuyaq. Raprankunanami llapan nación runakunapä jampi karqan.3 Kay patsata Tayta Dios maldicionashqa karpis tsay markataqa mananami maldicionanqanatsu.† Tsaychöqa Tayta Diospa y Carnishpa trönunmi kanqa. Sirviqninkunanami Diosta adorayanqa. 4 Tsaychömi Tayta Diospa qaqllanta rikayanqa.† Urkunkunachömi Tayta Diospa jutinpis qellqaranqa. 5 Tsay markachöqa paqaspis mananami kanqanatsu. Chipipiyninwan Tayta Dios atsikyaptinmi† rupaytapis ni ima aktsitapis ministiyanqanatsu. Tsay runakunami imayyaqpis mandayanqa.†
Jesucristo kutimunanpäna ninqan
6 Tsaymi ángel nimarqan: “Profëtakunata tantiyatsiq Tayta Diosmi kachamashqa imapis pasananpä kaqkunata sirviqninkunata willanäpä. Kay willakunqäkunaqa rasun kaqllami”.
7 Tsaynöllami Jesucristo nin: “Shamunäpänami kaykä. Kushishqami kawayanqa kay librucho qellqaraykaqkunata cäsukuqkuna”.
8 Noqa Juanmi tsaykunata wiyashqä y rikashqä. Tsaymi llapanta rikatsimaq angelpa ñöpanman adoranäpä lätakaykurqä. 9 Tsaymi nimarqan: “¡Noqata ama adoramaytsu! Profëta mayikikunanölla y qellqanqaykikunaman chaskikuqkunanöllami noqapis Tayta Diosta sirvï. Tayta Diosllata adoray”.
10 Tsaypitanami nimarqan: “Llapanpis cumplinanpäna kaykaptinqa revelacioncho rikanqaykikunata ama pakarätsiytsu, tsaypa trokinqa libruman qellqaykur runakunaman apatsiy. 11 Mana alli ruraqkuna jina mana allita rurar kawayätsun. Jutsa ruraqkunaqa jina jutsata rurar kawayätsun. Alli runakunaqa allita rurar kawayätsun. Tayta Dios munanqannö santu kawaqkunaqa pay munanqannö santu kawayätsun”.†
12 Jesucristumi nin: “Shamunäpänami kaykä. Shamurmi runakunata kawayanqanman tupu juzgar premiuta qoshä o castigashä.† 13 Alfa y Omegami noqa kä.a Qallanan y ushananmi kä.†
14 “Kushishqami kayanqa mushuq Jerusalénman yaykuyänanpä y imayyaqpis kawatsikuq jachapa† wayuyninta mikuyänanpä latsapankunata taqshakuqkuna.† 15 Tsay markamanqa manami yaykuyanqatsu mana alli ruraqkuna, brüjukuna, fornicación jutsata ruraqkuna, runa mayinta wanutsiqkuna, ïdulukunata adoraqkuna y llapan llullakuqkunapis.
16 “Noqa Jesúsmi yärakamuqkunaman angelnïta kachamushqä imapis kananpä kaqkunata musyatsinäpä. Noqaqa Davidpita aywaraqmi† y Waraq Lucërumi† kaykä”.
17 Espíritu Santupis y Jesucristuwan majatsakänanpä jipashmi† niyan: “¡Taytay, juklla shamuyna!” Kay librucho qellqaraykaqkunata liyimunqanta wiyaqkunapis niyätsun: “Taytay, shamuykullay”. Yakunaqkunaqa shayämutsun. Imayyaqpis kawatsikuq yakuta debaldilla upuyätsun.†
18 Kay librucho qellqaraykaqta wiyaqkunatami nï: Mayqanpis kay qellqaraykaqkunaman yarpayninkunata yapaq kaqtaqa pasaypami Tayta Dios castiganqa. Kay librucho qellqaraykanqannömi tsay runakuna ñakayanqa. 19 Kay librucho qellqaraykaqpita juk yachatsikuyllatapis jipiyaptinqa† Tayta Dios manami kachapanqatsu imayyaqpis kawatsikuq jachapa wayuyninta mikuyänanpä.b Tsaymi mushuq sagrädu Jerusalén markaman yaykuyanqatsu ni kay librucho qellqaraykaq bendicionkunatapis chaskiyanqatsu.
20 Kay libruta qellqanäpä tantiyatsimaq Jesucristumi nin: “Shamunäpänami kaykä”.
“¡Amén! ¡Shamuykullay, Señor Jesús!”
21 Señornintsik Jesucristo llapaykita imaypis yanapaykuyälläshuy. [Amén.]