3 Oseas rey kanqan witsanmi Asiria nacionpa mandaqnin rey Salmanasar soldädunkunawan shamur Israel nacionta atacayarqan. Mas puntapitanami Oseasqa impuestuta Asiriaman apatsirqan. 4 Tsaymi Salmanasarpa contran shärir Oseasqa impuestuta pägarqannatsu. Tsaynöpis Egipto nacionpa mandaqnin reyman kacharqan soldädunkunawan shamur yanapayänanpä. Tsay reypa jutinmi karqan So.

Tsaynö ruranqanta musyaskirmi Salmanasarqa rey Oseasta prësu tsaritsir carcelman wichqatsirqan. 5 Nirkurmi Asiriapa mandaqnin rey^a entëru Israelcho markakunata vinciskir Samaria markata soldädunkunawan kimsa wata jiruruypa tsaparäyarqan. 6 Oseas isqun wata rey kaykaptinmi Samaria markata vinciskir Israel runakunata Asiriaman prësu apakuyarqan. Chaykatsirmi Halah markaman, Gozáncho kaykaq Habor mayu kuchuncho kaykaq markakunaman y Media runakunapa markankunaman churayarqan.^†

7 Tsaynö päsarqan Israel runakuna Tayta Diospa contran jutsata rurayanqanpitami. Paykunatami rey Faraónpa munaynincho kaykäyaptin Egiptupita Tayta Dios jipimurqan. Tsaynö jipiykämuptinmi Israel runakunaqa juk dioskunata adorar 8 Tayta Dios unay qarqunqan mana Israel runakunanölla kawayarqan. Israel runakunapa mandaqnin reykuna kawayanqannöllami llutankunata rurar kawayarqan.

9 Tsaynöllami Israel runakuna Tayta Diosta manakaqman churar rikachakuna törriyuq taksha markakunacho y corralashqa jatun markakunachöpis juk dioskunata adorayänanpä altarkunata rurayarqan. 10 Tsaynöllami tsay dioskunata adorayänanpä jirkanchöpis y raprasapa jacha chakinkunachöpis wankakunata ichïtsiyarqan y Asera diösata adorayänanpä raku qerukunatapis jawitsiyarqan.^† 11 Tsay altarkunacho inciensiuwan qoshnitsirmi Tayta Dios unay qarqunqan runakuna mana allita rurayanqannölla rurayarqan. Llutankunata tsaynö rurarmi Tayta Diosta pasaypa ajanätsiyarqan. 12 Ïdulukunata mana adorayänanpä Tayta Dios nikaptinmi paykunaqa mana cäsukuypa ïdulukunata adorayarqan.^†

13 Tsaymi llapan profëtankunawan y willakuqninkunawan Israel runakunata y Judá runakunata Tayta Dios tantiyatsir nirqan: “Jutsa ruraykunata kacharir mandamientükunata y leynïkunata cumpliyay. Unay castaykikunatapis tsay leykunata cumpliyänanpämi sirvimaqnï profëtakunawan tantiyatsirqä”.

14 Profëtakuna tsaynö willakuyaptinpis paykunaqa manami cäsukuyarqantsu. Tsaypa trokinqa unay castankunanö chukru shonqu karmi Tayta Diosman yärakuyarqantsu. 15 Tsaynö mana yärakurmi unay castankunawan Tayta Dios pactu ruranqanta manakaqman churayarqan. Leyninkunata y mandamientunkunata mana cäsukur mana väliq ïdulukunata adorarmi paykunapis mana väliq rikakuyarqan. Jutsata mana rurayänanpä Tayta Dios nikaptinpis wakin nación runakuna jutsata rurayanqannöllami paykunapis jutsata rurayarqan.

16 Paykunaqa Tayta Diospa mandamientunkunata mana cäsukurmi adorayänanpä qoripita ishkay torïtukunata rurayarqan. Asera diösata adorayänanpämi raku qerukunata jawitsiyarqan. Tsaynöllami rupayta, killata, qoyllurkunata y Baaltapis adorayarqan. 17 Paykunami tsurinkunata ollqutapis warmitapis sacrificiupä altarcho rupatsiyarqan. Tsaynöllami brüju kayman y suerti qatiq kaymanpis churakäyarqan.^† Tayta Diosta mana cäsukurmi jutsa ruraykunallacho kayarqan.

18 Tsaymi Tayta Diosqa pasaypa ajanarnin Israel runakunata ñöpanpita jukläman qarqurqan. Judá trïbu runakunallatami nacionnincho kachaykurqan. 19 Judá runakunapis Tayta Diospa mandamientunkunata mana cumplirmi Israel runakunanölla jutsata rurar mana alli costumbrikunata rurayarqan. 20 Tsaymi Tayta Dios kamakätsirqan juklä soldädukuna Israel runakunata vincir ñöpanpita qarquyänanpä.^b

21 Mas unaynami David casta reykunapa munayninpita Israel nacionta Tayta Dios jipiptin Nabatpa tsurin Jeroboamta rey kananpä Israel runakuna churayarqan. Rey kaykarnami Tayta Diosta mana cäsukuyänanpä. Jeroboam yätsirqan. Yätsinqanta cäsukurmi Israel runakuna pasaypa jutsata rurayarqan. 22 Jeroboam wanuskiptinpis Israel runakunaqa mana kachaypami jutsata rurayarqan. 23 Tsaynö kayanqanpita sirviqnin profëtakunawan willakatsinqannöllami^† Israel runakunata Tayta Dios ñöpanpita qarqurqan. Tsaymi Asiria nación runakuna aywaykur Israel runakunata prësu apakuyarqan. Tsaypita patsami Israel runakunaqa Asiriacho kananyaqpis taykäyan.

24 Israel runakunata prësu apaskirmi paykuna jaqiyanqan markakunacho täyänanpä Asiria nacionpa mandaqnin rey apatsimurqan Babilonia runakunata, Cuta runakunata, Ava runakunata, Hamat runakunata y Sefarvaim runakunata. Tsay runakunaqa Samariacho kaykaq markakunachönami^c täyarqan. 25 Tsaycho taykar Tayta Diosta mana adorayaptinmi Tayta Diosqa leonkunata yuritsimurqan. Tsay leonkunami wakin runakunata wanutsiyarqan. 26 Tsaymi Asiria nacionpa mandaqnin reyman willakuqkuna aywaykur willar niyarqan: “Samaria markakunacho täyänanpä churanqayki runakunaqa manami musyayantsu tsay nacionpa Diosnin imata munanqantapis. Tsaymi leonkuna paykunata wanuykätsiyan”.

27 Tsaynö willayaptinmi rey nirqan: “Kayman prësu pushamunqantsik sacerdötikunapita jukta kutitsiyay tsay nacionpa Diosninta imanö adorayänanpä kanqantapis paykunata yachatsinanpä”.

28 Tsaynö niptinmi Samariapita prësu apayanqan sacerdötikunapita jukta Bet-elman kutitsiyarqan. Tsaychömi tsay runakunata yachatsirqan Tayta Diosta imanö adorayänanpäpis.

29 Tsaynö yachaykätsiptinpis cada markachömi ïdulunkunata rurayarqan nacionnincho adorayanqan ïdulun niraqta. Tsay ïdulunkunatami markakunacho altarkunaman churayarqan. 30 Babiloniapita shamuq runakunami Sucot-benot diosninta adorayänanpä ïdulukunata ruratsiyarqan. Cuta markapita shamuq runakunami Nergal diosninta adorayänanpä ïdulukunata ruratsiyarqan. Hamatpita shamuq runakunami Asima diosninta adorayänanpä ïdulukunata ruratsiyarqan. 31 Ava runakunami Nibhaz diosninta y Tartac diosninkunata adorayänanpä ïdulukunata ruratsiyarqan. Sefarvaimpita shamuq runakunanami Adramelec y Anamelec diosninkunata adorar wamrankunata altarcho rupatsiyarqan.

32 Tsaynöllami tsay runakunaqa Tayta Diosta adorayarqan. Itsanqa sacrificiukunata rupatsiyänanpämi kikinkuna yarpäyanqannö pitapis llutalla sacerdöti kananpä churayaq. Tsaymi kikinkunapa altarninkunacho sacrificiukunata rupatsiyarqan. 33 Tayta Diosta adorarpis ñöpata täyanqan markankunacho diosninkunata adorayanqannöllami Samaria markakunachöpis diosninkunata adorayarqan. 34 Tsay runakunaqa kananyaqpis diosninkunata tsaynöllami adoraykäyan. Tsaynö karmi Tayta Diosta mana mantsapakur estatütunkunata, leyninkunata y mandamientunkunata cäsukuyantsu. Tsay leykunatami Jacobpita aywaraqkunata Tayta Dios entregarqan imaypis cäsukuyänanpä. Tsaynöllami Jacobpa jutinta Tayta Dios trukatsirqan Israel jutin kananpä.^†

35 Israel runakunawan pactuta ruranqan hörami Tayta Dios nirqan: “Juk dioskunataqa ama adorayankitsu ni sirviyankitsu ni ima sacrificiutapis tsay dioskunapä ama rupatsiyankitsu.^† 36 Tsaypa trokinqa noqallata adorayämanki y noqa japalläta sirviyämanki.^† Llapanpä munayyuq karmi qamkunata Egiptupita jipimurqä. Tsaymi noqallata sirviyämänayki, adorayämänayki y noqallapä sacrificiukunatapis rupatsiyänayki. 37 Tsaynöllami mana qonqaypa cumpliyanki qellqaykur entreganqä estatütukunata, yachatsikuykunata, leykunata y mandamientukunata. Juk dioskunataqa ama adorayaytsu. 38 Qamkunawan pactu ruranqäta qonqaykur paqtä juk dioskunata adorayankiman. 39 Noqallata adorayämaptikiqa contraykikunapa munayninpitami salvashayki”.

40 Tayta Dios tsaynö yachaykätsiptinpis Samaria markakunacho taq runakunaqa mana cäsukurmi mana alli costumbrinkunata imaypis rurayaq. 41 Tsaymi paykunaqa Tayta Diosta adorarpis ïdulukunata adorar kawayarqan. Tsaynöllami kananyaqpis paykunapita aywaraqkuna kawaykäyan.