Judá nacioncho Acaz rey kanqan
16
Chunka qanchis wata Israel nacioncho Remalíaspa tsurin Peka rey kaykaptinmi Judá nacioncho Jotampa tsurin Acaz rey kayta qallaykurqan. 2 Mandayta qallaykunqan witsanmi ishkay chunka (20) watayuq kaykarqan. Payqa chunka soqta watami Jerusalénpita mandarqan.Acazqa manami unay castan Davidnötsu Tayta Dios munanqanta rurarqan. 3 Tsaypa trokinqa Israel nación reykunanöllami juk dioskunata adorarqan. Tsaymi Canaáncho taq unay runakunapa mana alli costumbrinkunata rurar sacrificiupä tsurintapis altarcho rupatsirqan. Tsaynöpami Tayta Dios unay qarqunqan mana Israel runakunanölla pasaypa jutsata rurarqan.† 4 Tsaynöllami markakunacho kaq altarkunacho, jirkankunacho y raprasapa jachakuna chakinkunachöpis sacrificiukunata rupatsir inciensiuwan qoshnitsirqan.
5 Tsay witsanmi Siria nacionpa mandaqnin rey Rezín y Israel nacionpa mandaqnin rey Peka soldädunkunawan Acazta atacayänanpä Jerusalénman chäyarqan. Ishkan reykuna atacarpis manami vinciyta kamäpakuyarqantsu.†
6 Tsaynöpis Acaz mandanqan witsanmi Judá runakunata Elat markapita Edom nacionpa mandaqnin rey qarqurqan. Nirkurmi Elat markata qorirqan Edom nacionpana kananpä. Tsaymi edomita runakuna kananyaq tsaycho taykäyan.
7 Siria runakuna y Israel runakuna atacayaptinmi rey Acazqa willakuqkunata kacharqan Asiria nacionpa mandaqnin rey Tiglat-pileserman soldädunkunawan shamur yanapayänanpä. Chaykurmi Tiglat-pileserta niyarqan: “Noqaqa qampa wätaynikinö y tsurikinömi kaykä. Siria nacionpa mandaqnin rey y Israel nacionpa mandaqnin reymi conträ shärir atacaykäyäman. Taytay, paykuna mana ushakätsiyämänanpä shamur salvaykayällämay”.
8 Asiria nacionpa mandaqnin reyta pägananpämi rey Acazqa Tayta Diospa wayinpitapis y palaciupitapis qellaytawan qorita qoriskir willakuqkunawan apatsirqan. 9 Acaz apatsinqankunata chaskiskirmi Asiria nacionpa mandaqnin rey soldädunkunawan Siria nacionpa capitalnin Damascuta atacayänanpä aywayarqan. Damascuman yaykurmi rey Rezínta wanutsiyarqan. Nirkurmi Damascucho taq runakunata Kir markacho täyänanpä prësu apayarqan.
10 Tsaypitanami rey Acazqa Damascuman aywarqan Asiria nacionpa mandaqnin rey Tiglat-pileserwan tinkunanpä. Damascuman chaykurmi kuyayllapä altarta rikarqan. Tsaytami imanö kanqantapis shumaq dibujaykur Urías sacerdötiman apatsirqan. 11 Tsayta chaskiskirmi sacerdöti Uríasqa altarta ruratsirqan rey Acaz apatsinqan dibüjutanölla. Rey Acaz Damascupita manarä kutiptinmi altarta ruratsiyta usharqan.
12 Damascupita kutirnami mushuq altar rurashqatana tariykur tsay altarcho sacrificiukunata rupatsirqan. 13 Sacrificiuta rupatsirmi tsaki mikuykunatapis tsay altarcho rupatsirqan y vïnutapis tsayman wiñaparqan. Tsaynöllami alli päsakuy sacrificiukunata rupatsinanpä uywakunata pishtar yawarnintapis altar jananman tsaqtsuparqan.
14 Tsaynö ruraskirmi broncipita rurashqa unay altarta† wititsiyarqan Tayta Diospa templun ñöpancho kaykanqanpita mushuq kaq altarpa norti kaqläninman. 15 Nirkurmi sacerdöti Uríasta rey Acaz nirqan: “Tutapa rupatsinqayki sacrificiutawan tardipa rupatsinqayki tsaki mikuykunata jatun kaq mushuq altarchöna rupatsinki. Tsaynöpis tsay altarchöna rupatsinki apamunqä sacrificiuta y tsaki mikuykunata. Tsaynölla runakuna apayämunqan sacrificiukunata y tsaki mikuykunatapis tsaychöna rupatsinki. Vïnuta apayämuptinpis tsay altarmanna wiñapanki. Sacrificiukunata rupatsinaykipä uywakunata pishtar qorinqayki yawarta tsay altarmanna tsaqtsupanki. Bronci altarqa Tayta Diosta tapukunalläpämi kanqa”.
16 Sacerdöti Uríasqa llapanta rurarqan rey Acaz ninqannöllami.
17 Nirkurnami rey Acazqa templupa carrëtankunacho kaykaq lavatoriunkunata y carrëtacho clävaraykaq tablakunatapis jipitsirqan. Tsaynöpis broncipita rurashqa törukuna janancho† kaykaq lamar niyanqan lavatoriuta jipiskatsirmi rumikuna jananmanna jamatsiyarqan. 18 Tsaynöllami Asiria nacionpa mandaqnin reypa gustunta rurar jamay junaqcho Tayta Diosta adorayänanpä armayanqan tablakunatapis jipitsirqan. Tsay tablakunaqa templupa patiunchömi karqan. Tsaynöllami templupa patiunman reykunalla yaykukunan punkutapis jipitsirqan.