Judá nacioncho Acaz rey kanqan
28
Mandayta qallaykunqan witsanmi Acazqa ishkay chunka (20) watayuq kaykarqan. Payqa chunka soqta watami Jerusalénpita mandarqan. Acazqa manami unay castan Davidnötsu Tayta Dios munanqanta rurarqan. 2 Tsaypa trokinqa Israel nación reykunanöllami Baal ïdulukunata metalpita fundiykatsir adorarqan. 3 Tsay ïdulukunapämi Ben-hinom raqracho inciensiuta rupatsirqan. Tsaynöllami tsurinkunatapis sacrificiupä tsaycho rupatsirqan. Tsaynö rurarmi Tayta Dios unay qarqunqan mana Israel runakunanölla pasaypa jutsata rurarqan. Tsay runakunatami markankunapita Tayta Dios qarqurqan Israel runakuna chäyanqan witsan. 4 Tsaynöllami Acazqa markakunacho kaq altarkunacho, jirkankunacho y raprasapa jachakuna chakinkunachöpis sacrificiukunata rupatsir inciensiuwan qoshnitsirqan.5 Tsaynö jutsata ruranqanpitami Siria nacionpa mandaqnin reypa munayninman Tayta Dios churaykurqan. Tsaymi Siria runakuna atacarnin vincirkur Judá runakunata Damascuman prësu apakuyarqan.
Tsaynöllami Israel nacionpa mandaqnin reypa munayninmanpis Judá runakunata Tayta Dios churaykurqan. Tsaymi tsay reypis soldädunkunawan atacar Judá runakunata wanutsirqan. 6 Tsaynöpami Remalíaspa tsurin Peka soldädunkunawan juk junaqllacho juk pachak ishkay chunka waranqa (120,000) Judá runakunata wanutsiyarqan. Tsay wanuq runakuna alli chölu kaqllami kayarqan. Paykuna tsaynö wanuyarqan unay castankuna yärakuyanqan Tayta Diosta mana cäsukuyanqanpitami.†
7 Pelyay yachaq Zicripis wanutsirqan Judá nacionpa mandaqnin reypa tsurin Maasíasta, palaciuncho mandaq Azricamta y reypa capitannin Elcanatami. Zicriqa Efraín trïbu runami karqan. 8 Israel soldädukuna prësu tsariskirmi apakuyarqan ishkay pachak waranqa (200,000) Judá runakunata. Tsay prësukunami kayarqan Judá runakunapa warminkuna, ollqu tsurinkunapis, warmi tsurinkunapis. Tsaynöllami paykunapa llapan imaykankunatapis apakur Samaria markaman kutikuyarqan.
9 Israel nacionchömi Tayta Diospa profëtan Obed kaykarqan. Paymi Israel soldädukuna Samariaman kutiykäyaptin taripaykur nirqan: “Unay castaykikuna yärakuyanqan Tayta Diosmi Judá runakunawan pasaypa ajanashqa kar munaynikikunaman churamushqa. Mana kuyapaypa wanutsiyanqaykitapis Tayta Dios rikashqami. 10 Kananqa yarpaykäyanki Judápita y Jerusalénpita apayämunqayki warmitapis ollqutapis wätaynikikunapä tsararaytami. Tsaynö rurarqa ¿manatsurä qamkunapis Tayta Diosnintsikta ajanaykätsiyanki? 11 Kanan ninqäta shumaq wiyayay. Castaykikuna kaykaptinqa prësu apayämunqayki runakunata kutitsiyay. Tayta Dios qamkunawan pasaypa ajanashqami kaykan”.
12 Tsaynö niptinmi Johanánpa tsurin Azarías, Mesilemotpa tsurin Berequías, Salumpa tsurin Ezequías y Hadlaipa tsurin Amasa tantiyakuyarqan llutanta rurayanqanta. Paykunaqa Efraínchoa autoridäkunami kayarqan. Tsaymi guërrapita kutimuq soldädukunaman aywaykur 13 niyarqan: “Prësu apayämunqayki runakunata ama yaykatsiyämuytsu. Yaykatsiyämuptikiqa pasaypa jutsayuq rikakushqami Tayta Dios ajanar castigamäshun”.
14 Tsaynö niptinmi soldädukunaqa prësu apaykäyanqan runakunata yaykatsiyarqannatsu. Tsaynöllami apaykäyanqan imaykankunatapis autoridäkunapa y mayor runakunapa ñöpanman churaykuyarqan. 15 Tsaymi soldädukuna prësu apayämunqan runakunata kuyapar tsay chusku autoridäkuna kamaripäyarqan latsapatapis llanqitapis jatikuyänanpä. Tsay latsapakunaqa soldädukuna guërrapita apayämunqanmi karqan. Nirkurmi mikuytapis yakutapis kamaripaskir guërracho malograkayämunqankunata aceitiwan jampiyarqan. Aywayta mana puëdiqkunataqa ashnuman muntarkatsirmi castankunaman kutitsiyarqan palmërakuna kayanqan Jericó markayaq. Tsaynö kutiskatsirmi Samaria markaman kutikuyarqan.
16 Tsay witsanmi rey Acaz kachata kacharqan Asiria nacionpa mandaqnin rey yanapananpä rugakuq. 17 Tsaynö rugakurqan edomita runakuna Judá nacionman yaykuykur wakin runakunata wanuskatsir wakinta prësu apakushqa kayaptinmi. 18 Tsaynöllami filisteo runakunapis Judá nacionman yaykur Sefelacho kaykaq markakunata y Neguevcho kaykaq markakunata qechuyarqan. Tsaynöpami qechuyarqan Bet-semes markata, Ajalón markata, Gederot markata, Soco markata, Timna markata, Gimzo markata y ñöpancho kaykaq markakunatapis. Nirkurmi tsay markakunacho täyarqan. 19 Tsaynöpami Judá runakunata Tayta Dios penqakuyman churarqan Acaz mana cäsukunqanpita y jutsata rurayänanpä Judá runakunata shakyätsinqanpita.
20 Asiria nacionpa mandaqnin rey Tiglat-pileserpis yanapananpa trokinmi Acazta atacarqan. 21 Tsaynö atacarqan yanapananpä Acaz pägashqa kaykaptinmi. Payta pägananpämi qellayta y wakin kuyayllapä kaqkunatapis jipirqan Tayta Diospa wayinpita, kikinpa palaciunpita y autoridäkunapa wayinkunapita. 22 Asiriapita shamuq rey tsaynö atacaptin pasaypa ñakaykarpis rey Acazqa Tayta Diosta mana cäsukuypami mas jutsata rurarqan. 23 Tsaynö karmi Damasco runakuna adorayanqan dioskunapä sacrificiukunata rupatsir nirqan: “Siria runakunatab yanapaykarqa noqatapis sacrificiukunata rupatsiptï yanapamanqami”. Tsaynö ruranqanpitami Acazta y Israel runakunata pasaypa desgracia päsarqan.
24 Tsaynöllami Acazqa Tayta Diosta templuncho pipis mana adorananpä tsaycho kaq manëjukunata qoriskir llapanta pakir usharqan. Templu patiuman yaykuna punkukunatapis wichqatsirqanmi. Nirkurmi juk dioskunata adorayänanpä Jerusalén markapa esquïnankunacho altarkunata ruratsirqan. 25 Tsaynöllami Judá nacioncho kaykaq llapan markakunachöpis juk dioskunata inciensiuwan qoshnitsiyänanpä altarkunata ruratsirqan. Tsaykunata rurarmi unay castankuna yärakuyanqan Tayta Diosta pasaypa ajanätsirqan.
26 Rey Acaz imata ruranqanpis qallaykunanpita ushananyaqmi qellqaraykan Judá runakunapa y Israel runakunapa mandaqnin reykunapa acta libruncho. 27 Wanuskiptinmi Jerusaléncho kaykaq panteonman pampayarqan. Itsanqa Israel nacionpa mandaqnin reykuna pamparäyanqan panteonmanqa manami pampayarqantsu. Acazpa trokinmi tsurin Ezequíasna rey karqan.†