Judá nacioncho Jotam rey kanqan
27
Mandayta qallaykunqan witsanmi Jotamqa ishkay chunka pitsqa (25) watayuq kaykarqan. Payqa chunka soqta watami Jerusalénpita mandarqan. Mamanmi Sadocpa tsurin Jerusa karqan. 2 Jotamqa taytan Uzíasnömi Tayta Dios munanqannö kawarqan. Tayta Diospa templunmanmi itsanqa taytannö yaykurqantsu. Tayta Dios munanqannö Jotam kawaptinpis mandanqan nacioncho taq runakunaqa jutsa rurayllachömi kawayarqan.3 Jotammi Tayta Diospa templun jana waqtan murällapa punkunta churatsirqan. Tsaynöllami Ofel jirkancho pirqatapis allitsatsirqan. 4 Judá nación jallqakunachöpis markakunatami shäritsirqan. Muntikunachöpis amparakuna wayikunata y törrikunatami ruratsirqan.
5 Tsaynöpis amonita runakunapa mandaqnin reytami soldädunkunawan Jotam vincirqan. Vinciykurmi amonita runakunata kimsa watayaq impuestuta pägatsirqan. Tsaymi cada wata pägayarqan kimsa waranqa kimsa pachak (3,300) kïlu qellayta, chunka waranqa (10,000) säcu trïguta y chunka waranqa säcu cebädatapis. 6 Tayta Dios munanqannö kawarmi Jotamqa munayyuq rikakurqan.
7 Jotam imata ruranqan y soldädunkunawan yarqur guërrata ruranqanpis llapanmi qellqaraykan Judá nacionpa y Israel nacionpa mandaqnin reykunapa acta libruncho. 8 Mandayta qallaykunqan witsanmi Jotamqa ishkay chunka pitsqa (25) watayuq kaykarqan. Payqa chunka soqta watami Jerusalénpita mandarqan. 9 Jotam wanuskiptinmi Davidpa Markanman pampayarqan. Paypa trokinnami tsurin Acazna rey karqan.