Judá nacioncho Azarías rey kanqan
15
Ishkay chunka qanchis (27) wata Israel nacioncho Jeroboam rey kaykaptinmi Judá nacioncho Amasíaspa tsurin Azaríasa rey kayta qallaykurqan. 2 Mandayta qallaykunqan witsanmi chunka soqta watayuq kaykarqan. Payqa pitsqa chunka ishkay (52) watami Jerusalénpita mandarqan. Mamannami Jerusalénpita Jecolías karqan.3 Azaríasqa taytan Amasíasnömi Tayta Dios munanqannö kawarqan. 4 Markakunacho altarkunatami itsanqa juchutsirqantsu. Tsay altarkunachömi sacrificiukunata imaypis rupatsiyarqan y inciensiuwan qoshnitsiyarqan.
5 Tayta Dios castigaptinmi Azaríasqa wanunqanyaq leprawan qeshyarqan. Tsaynö qeshyarmi palaciupita juklächöna taptin tsurin Jotamna mandarqan.
6 Azarías imata ruranqankunapis llapanmi qellqaraykan Judá nacionpa mandaqnin reykunapa acta libruncho. 7 Azarías wanuskiptinnami† Davidpa Markancho unay castankuna pamparäyanqanman pampayarqan. Paypa trokinnami tsurin Jotamna rey karqan.
Israel nacioncho Zacarías rey kanqan
8 Azarías kimsa chunka puwaq (38) wata Judá nacioncho rey kaykaptinmi Israel nacioncho Jeroboampa tsurin Zacarías rey kayta qallaykurqan. Payqa soqta killallami Samariapita mandarqan. 9 Paypis Tayta Diosta mana cäsukurmi Nabatpa tsurin Jeroboamnö y wakin unay reykunanölla Israel runakunata jutsata ruratsirqan.†
10 Jabespa tsurin Salummi Ibleam markacho atacar Zacaríasta wanutsirqan. Nirkurmi Zacaríaspa trokin rey karqan.
11 Zacarías imata ruranqanpis llapanmi qellqaraykan Israel nacionpa mandaqnin reykunapa acta libruncho. 12 Zacarías rey kaykaptinmi Jehúta Tayta Dios kaynö ninqan cumplirqan: “Israel nacionpa trönuncho qampita aywaraqkuna hasta chusku generacionyaqmi rey kayanqa”.b †
Israel nacioncho Salum rey kanqan
13 Kimsa chunka isqun (39) wata Judá nacioncho Uzías rey kaykaptinmi Israel nacioncho Jabespa tsurin Salum rey kayta qallaykurqan. Payqa juk killallami Samariapita mandarqan. 14 Juk killa rey kaykaptinmi Tirsa markapita Samaria markaman Gadipa tsurin Manahem chaykur Salumta wanutsirqan. Nirkurnami Salumpa trokin rey karqan.
15 Salum imata ruranqankuna y Zacaríaspa contran shärinqanpis llapanmi qellqaraykan Israel nacionpa mandaqnin reykunapa acta libruncho.
16 Manahemmi Tirsa markapita soldädunkunawan yarquskir Tifsa markata atacayänanpä aywarqan. Marka punkuta mana kichapuyaptinmi Tifsa markapita hasta Tirsa markayaq llapan runakunata wanutsiyarqan. Tsaynöllami qeshyaq warmikunatapis pachankunata qashar wanutsiyarqan.
Israel nacioncho Manahem rey kanqan
17 Azarías kimsa chunka isqun (39) wata Judá nacioncho rey kaykaptinmi Israel nacioncho Gadipa tsurin Manahem rey kayta qallaykurqan. Payqa chunka watami Samariapita mandarqan. 18 Paypis Tayta Diosta mana cäsukurmi rey kayta qallaykunqanpita hasta wanunqanyaq Nabatpa tsurin Jeroboamnölla Israel runakunata jutsata ruratsirqan.†
19 Manahem rey kanqan witsanmi Asiria nacionpa mandaqnin rey Pulc Israel nacionman soldädunkunawan atacayänanpä chäyarqan. Atacayänanta mana munarmi Manahem pägarqan kimsa chunka kimsa waranqa (33,000) kïlu qellayta. Tsaynöpis nirqan imapis kaptin payta yanapananpä. 20 Tsaynö pägananpämi Manahemqa Israel nacioncho taq llapan imaykayuqkunata cobrarqan mediu kïlu qellayta. Tsay qellqayta qoriskir Asiria nacionpa mandaqnin Pulta pägaykuptinmi soldädunkunawan kutikuyarqan.
21 Manahem imata ruranqanpis llapanmi qellqaraykan Israel nacionpa mandaqnin reykunapa acta libruncho. 22 Manahem wanuskiptinnami paypa trokin tsurin Pekaíana rey karqan.
Israel nacioncho Pekaía rey kanqan
23 Pitsqa chunka (50) wata Judá nacioncho Azarías rey kaykaptinmi Israel nacioncho Manahempa tsurin Pekaía rey kayta qallaykurqan. Payqa ishkay watami Samariapita mandarqan. 24 Paypis Tayta Diosta mana cäsukurmi Nabatpa tsurin Jeroboamnölla Israel runakunata jutsata ruratsirqan.†
25 Pekaía rey kaykaptinmi soldädunkunapa capitannin karqan Remalíaspa tsurin Peka. Paymi pitsqa chunka (50) Galaad runakunawan Samariacho palaciuman yaykuykur Pekaíata wanutsiyarqan. Tsaynöllami tsaycho wanutsirqan Argobta y Arieta. Nirkurmi Pekaíapa trokin Pekana rey karqan.
26 Pekaía imata ruranqanpis llapanmi qellqaraykan Israel nacionpa mandaqnin reykunapa acta libruncho.
Israel nacioncho Peka rey kanqan
27 Azarías pitsqa chunka ishkay (52) wata Judá nacioncho rey kaykaptinmi Israel nacioncho Remalíaspa tsurin Peka rey kayta qallaykurqan. Payqa ishkay chunka (20) watami Samariapita mandarqan. 28 Paypis Tayta Diosta mana cäsukurmi Nabatpa tsurin Jeroboamnölla Israel runakunata jutsata ruratsirqan.†
29 Israel nacioncho Peka rey kaykaptinmi Asiria nacionpa mandaqnin Tiglat-pileser soldädunkunawan atacar vinciyarqan Ijón markacho taq runakunata, Abel-bet-maacacho taq runakunata, Janoa markacho taq runakunata, Cedes markacho taq runakunata, Hazor markacho taq runakunata, Galaad particho taq runakunata, Galilea particho taq runakunata y Neftalí particho taq runakunatapis. Nirkurmi tsaycho taq runakunata Asiriaman prësu apakuyarqan.
30 Tsaypitanami Elapa tsurin Oseasqa Remalíaspa tsurin Pekapa contran shärir wanutsirqan. Nirkurnami Pekapa trokin rey karqan. Tsayqa karqan Uzíaspa tsurin Jotam ishkay chunka (20) wata Judácho rey kaykaptinmi.
31 Peka imata ruranqanpis llapanmi qellqaraykan Israel nacionpa mandaqnin reykunapa acta libruncho.
Judá nacioncho Jotam rey kanqan
32 Ishkay wata Israel nacioncho Remalíaspa tsurin Peka rey kaykaptinmi Judá nacioncho Uzíaspa tsurin Jotam rey kayta qallaykurqan. 33 Mandayta qallaykunqan witsanmi ishkay chunka pitsqa (25) watayuq kaykarqan. Payqa chunka soqta watami Jerusalénpita mandarqan. Mamanmi Sadocpa tsurin Jerusa karqan.
34 Jotamqa taytan Uzíasnömi Tayta Dios munanqannö kawarqan. 35 Paymi Tayta Diospa templun jana waqtan murällapa punkunta churatsirqan. Markakunacho altarkunatami itsanqa juchutsirqantsu. Tsay altarkunachömi sacrificiukunata imaypis rupatsiyarqan y inciensiuwan qoshnitsiyarqan.
36 Jotam imata ruranqanpis llapanmi qellqaraykan Judá nacionpa mandaqnin reykunapa acta libruncho.
37 Jotam rey kanqan witsanmi Siria nacionpa mandaqnin rey Rezínta y Remalíaspa tsurin Pekata Tayta Dios kacharqan Judá nacionta atacayänanpä.
38 Jotam wanuskiptinmi Davidpa Markancho unay castankuna pamparaykäyanqanman pampayarqan. Paypa trokinnami tsurin Acazna rey karqan.