Judá nacioncho Amasías rey kanqan
14
Joacazpa tsurin Joás ishkay wata Israel nacioncho rey kaykaptinmi Judá nacioncho Joáspa tsurin Amasías rey kayta qallaykurqan. 2 Mandayta qallaykunqan witsanmi ishkay chunka pitsqa (25) watayuq kaykarqan. Payqa ishkay chunka isqun (29) watami Jerusalénpita mandarqan. Mamannami Jerusalénpita Joadán karqan.3 Amasíasqa Tayta Dios munanqannö kawarpis manami unay castan Davidnötsu kawarqan, tsaypa trokinqa taytan Joásnöllami. 4 Tsaynö kawarmi markakunacho altarkunata juchutsirqantsu. Tsay altarkunachömi sacrificiukunata imaypis rupatsiyarqan y inciensiuwan qoshnitsiyarqan.
5 Amasíasqa rey kaykarnami taytan wanutsiq capitankunata wanutsirqan. 6 Itsanqa manami tsay capitankunapa tsurinkunataqa wanutsirqantsu. Tsaynö mana wanutsinanpämi Moisés qellqanqan leykunacho Tayta Diospa mandamientun qellqaraykan: “Tsurinpa jutsanpita ama mamanta ni taytanta wanutsiyankitsu. Tsaynöpis mamanpa o taytanpa jutsanpita tsurinta ama wanutsiyankitsu. Tsaypa trokinqa jutsa ruraq kaqta wanutsiyanki”.†
7 Kachi Pampacho pelyarmi Amasías wanutsirqan chunka waranqa (10,000) edomita runakunata. Sela markachöpis vincirmi tsay markapa jutinta trukatsirqan Jocteel jutin kananpä. Tsaymi kananyaqpis tsay jutiwan reqiyan.
8 Tsaypitanami Amasíasqa willakuqkunata kacharqan Israel nacionpa mandaqnin rey Joás kaqman. Joásqa Joacazpa tsurin y Jehúpa willkanmi karqan. Willakuqkuna chaykurmi niyarqan: “Alli chölu karqa soldäduykikunata qoriskirshi aywanki Amasíaspa soldädunkunawan pelyayänaykipä”.
9 Tsaynö niyaptinmi willakuq aywaqkunata Joás nirqan: “Kutiykur mandashuqniki reyta niyanki: ‘Cardón kashashi kachanä Líbanucho kaq cedru qeruta ninanpä: “Tsurïwan warmi tsurikita tätsishun”. Tsaynö parlaykaptinshi munti uywa päsar cardón kashata pakikaqpä lanqurinä. 10 Tsay kashanöllami qampis kaykanki. Edomita runakunata ushakätsinqallaykipitaqa ama alläpa runa tukuytsu. Tsaynö runa tukur pelyaq shamunaykipa trokinqa mejor wayikicho kakuy. Tsaynölla wajupämaptikiqa kikikitapis y Judá runakunatapis ushakätsiyäshaykimi’ ”.
11 Rey Joás tsaynö niptinpis Amasíasqa manami cäsurqantsu. Mana cäsuptinmi Joásqa Israel soldädunkunawan Judácho kaq Bet-semesman aywayarqan Amasíaspa soldädunkunawan pelyayänanpä. 12 Israel soldädukuna vinciyaptinmi Judá soldädukunaqa qeshpir wayinkunapa kutikuyarqan.
13 Israel nacionpa mandaqnin rey Joásnami Judá nacionpa mandaqnin rey Amasíasta Bet-semescho prësu tsariskir Jerusalénman aparqan. Tsaychömi marka murällata juchutsiyarqan Efraín punkupita qallaykur hasta Esquïna niyanqan punkuyaq. Tsay juchutsiyanqan murällaqa juk pachak puwaq chunka (180) metru largumi karqan. 14 Tsaynöllami Tayta Diospa wayincho kaqtapis palaciucho kaqtapis qellayta y qorita apakuyarqan. Runakunata prësu apar Samariaman kutirninmi niyarqan: “Castaykikuna pägayämaptinrämi kachäyäshayki”.
15 Rey Joás imata ruranqanpis y Judá nacionpa mandaqnin rey Amasíaswan pelyanqanpis llapanmi qellqaraykan Israel nacionpa mandaqnin reykunapa acta libruncho. 16 Joás wanuskiptinnami Israel nacionpa mandaqnin reykuna pamparäyanqan Samaria markaman pampayarqan. Paypa trokinnami tsurin Jeroboamna rey karqan.
17 Judá nacionpa mandaqnin rey Amasíasqa Israel nacionpa mandaqnin rey Joás wanunqanpita chunka pitsqa wata masrämi kawarqan. Rey Amasíasqa Joáspa tsurinmi karqan.a Rey Joásnami Joacazpa tsurin karqan. 18 Rey Amasías imata ruranqanpis llapanmi qellqaraykan Judá nacionpa mandaqnin reykunapa acta libruncho.
19 Jerusalén runakuna contran shäriyaptinmi Amasíasqa Laquis markaman qeshpir aywakurqan. Tsaynö qeshpiptinpis qatipaykurmi wanutsiyarqan. 20 Ayantanami cawalluman chaqnakurkur Jerusalénman apayarqan. Tsaychömi Davidpa Markanman unay castankuna pamparaykäyanqan kaqman pampayarqan.
21 Tsaypitanami Judá runakuna qorikaykur Amasíaspa tsurin Azaríastab churayarqan rey kananpä. Tsay witsan Azarías chunka soqta watayuqmi kaykarqan. 22 Paymi taytan wanunqanpita qepatana Elat markata† qoriskir yapay shäritsirqan. Tsaynöpami Judá nación runakunapäna tsay marka karqan.
Israel nacioncho qepa kaq Jeroboam rey kanqan
23 Judá nacioncho kaq Joáspa tsurin Amasías chunka pitsqa wata rey kaykaptinmi Israel nacioncho kaq Joáspa tsurin Jeroboam rey kayta qallaykurqan. Paymi chusku chunka juk (41) wata Samariapita Israel runakunata mandarqan. 24 Tayta Diosta mana cäsukurmi Jeroboampis Nabatpa tsurin Jeroboamnölla Israel runakunata jutsata ruratsirqan.†
25 Jeroboammi qorirqan Israel nacionpa lindërunta Hamatpita hasta Arabá Lamaryaq. Tsaynö rurarqan Amitaipa tsurin profëta Jonás† Tayta Diospa willakuyninta willakunqannöllami. Jonásqa Gat-hefer markapitami karqan. 26 Tsaynö qorinanpämi Jeroboamta Tayta Dios yanaparqan Israel nacioncho runakuna pasaypa ñakar llakikuyanqanta rikar. Israel runakunata yanapananpä manami wätaypis ni libripis karqantsu. 27 Tsaynö kaykaptinpis Israel runakuna ushakäyänanta mana munarmi Joáspa tsurin Jeroboamta Tayta Dios yanaparqan paykunata salvananpä.
28 Rey Jeroboam imata ruranqanpis, guërracho pelyar vincinqanpis y Damascuta y Hamatta qorinqanpis llapanmi qellqaraykan Israel nacionpa mandaqnin reykunapa acta libruncho. 29 Jeroboam wanuskiptinnami Israel nacionpa mandaqnin reykuna pamparäyanqanman pampayarqan. Paypa trokinnami tsurin Zacaríasna rey karqan.