3 Rey kaykarnami taytan wanutsiq capitankunata wanutsirqan. 4 Itsanqa manami tsay capitankunapa tsurinkunataqa wanutsirqantsu. Tsaynö mana wanutsinanpämi Moisés qellqanqan leykunacho Tayta Diospa mandamientun qellqaraykan: “Tsurinpa jutsanpita ama mamanta ni taytanta wanutsiyankitsu. Tsaynöpis mamanpa o taytanpa jutsanpita tsurinta ama wanutsiyankitsu. Tsaypa trokinqa jutsa ruraq kaqta wanutsiyanki”.^†

5 Tsaypitanami Amasíasqa Judá trïbu y Benjamín trïbu runakunata qayaykatsir cada castapa mandaqnin kananpä juk soldäduta churarqan. Nirkurmi runakunata ishkay chunka (20) watayuqpita janaman censatsirqan. Tsay censatsinqan runakunami kayarqan kimsa pachak waranqa (300,000). Paykunaqa guërracho espädawan pelyayta y escüduwan tsapakuytapis allimi yachayaq. 6 Tsaypitanami kimsa waranqa kimsa pachak (3,300) kïlu yuraq qellayta pägaykur juk pachak waranqa (100,000) Israel nación soldädukunata minkakurqan pelyar yanapayänanpä.

7 Tsaymi Tayta Diospa willakuqnin chaykur Amasíasta nirqan: “Rey Amasías, Tayta Dios manami yanapantsu Israel nación soldädukunataqa. Payqa manami Efraín runakunawantsu kaykan.^a Tsaynö kaykaptinqa guërraman paykunata ama pushaytsu. 8 Mana cäsukuypa tsay soldädukunata pushaptikiqa contraykikunatami Tayta Dios yanapanqa vinciyäshunaykipä. Tayta Diosqa munayyuqmi kaykan pitapis munanqan kaqta yanapananpä y ushakätsinanpä”.

9 Tsaynö niptinmi Tayta Diospa willakuqninta rey Amasías nirqan: “Tsaynö kaptinqa ¿imanötä arreglashä kimsa waranqa kimsa pachak (3,300) kïlu qellayta paykunata minkakamur päganqäta?”

Niptinmi Tayta Diospa willakuqnin nirqan: “Kachariptikiqa päganqaykipita masta tarinaykipämi Tayta Dios yanapashunki”.

10 Tsaynö niptinmi rey Amasíasqa Efraínpita shamuq soldädukunata wayinkunapa kutikuyänanpä despacharqan. Tsaymi paykunaqa Judá nación runakunawan ajanarnin wayinkunaman pasaypa ajashqa kutikuyarqan.

11 Amasíasqa Tayta Diosman yärakurmi soldädunkunawan aywar Kachi Pampacho chunka waranqa (10,000) Seir runakunata wanutsiyarqan.^b 12 Nirkurmi prësu tsariyarqan chunka waranqa runakunata. Tsay runakunata qaqa puntanman apaykur jitarpuyaptinmi ushakaqpä chäyarqan.

13 Paykuna guërracho kayanqanyaqmi Amasías kutitsinqan runakuna Samariapita Bet-horónyaq Judá nacioncho kaq markakunata atacar wanutsiyarqan kimsa waranqa (3,000) runakunata. Nirkurmi tsay wanushqa runakunapa imaykankunatapis apakuyarqan.

14 Edomita runakunata ushakaskatsir kutimurmi Amasíasqa Seircho taq runakunapa ïdulunkunata apakurqan. Tsaypitanami tsay ïdulukunaman yärakur inciensiuwan qoshnitsir adorarqan. 15 Tsaynö ruraptinmi Tayta Dios pasaypa ajanarqan. Tsaymi juk profëtata kacharqan ninanpä: “¡Imanirtä juk nacionpa diosninkunaman yärakuykanki! Tsay dioskunaqa manami pitapis salvayta kamäpakuyantsu. Salvakuq karqa atacaptiki salvayanmanmi karqan”.

16 Profëta tsaynö niptinmi reyqa ollqutupar nirqan: “Qamtaqa yätsimaqnï kanaykipä manami churashqätsu. Wanuskatsinäta mana munarqa upällalla aywakuy”.

Profëtanami nirqan: “Noqa yätsinqäta mana cäsukur tsaykunata ruranqaykipitami Tayta Dios ushakätsishunki”.

17 Tsaypitanami yätsiqninkunawan willanakuskir Judá nacionpa mandaqnin rey Amasíasqa willakuqkunata kacharqan Israel nacionpa mandaqnin rey Joás kaqman. Joásqa Joacazpa tsurin y Jehúpa willkanmi karqan. Willakuqkuna chaykurmi niyarqan: “Alli chölu karqa soldäduykikunata qoriskirshi aywanki Amasíaspa soldädunkunawan pelyayänaykipä”.

18 Tsaynö niyaptinmi willakuq aywaqkunata Joás nirqan: “Kutiykur mandashuqniki reyta niyanki: ‘Cardón kashashi kachanä Líbanucho kaq cedru qeruta ninanpä: “Tsurïwan warmi tsurikita tätsishun”.

“ ‘Tsaynö parlaykaptinshi munti uywa päsar cardón kashata pakikaqpä lanqurinä. 19 Tsay kashanöllami qampis kaykanki. Edomita runakunata ushakätsinqallaykipitaqa ama alläpa runa tukuytsu. Tsaynö runa tukur pelyaq shamunaykipa trokinqa mejor wayikicho kakuy. Tsaynölla wajupämaptikiqa kikikitapis y Judá runakunatapis ushakätsiyäshaykimi’ ”.

20 Rey Joás tsaynö niptinpis Amasíasqa manami cäsurqantsu. Tsaynö cäsurqantsu edomita runakunapa ïdulunkunata adoranqanpita ushakätsinanpä Tayta Dios destinashqa kaptinmi. 21 Mana cäsuptinmi Joásqa Israel soldädunkunawan Judácho kaq Bet-semesman aywayarqan Amasíaspa soldädunkunawan pelyayänanpä. 22 Israel soldädukuna vinciyaptinmi Judá soldädukunaqa qeshpir wayinkunapa kutikuyarqan.

23 Israel nacionpa mandaqnin rey Joásnami Judá nacionpa mandaqnin rey Amasíasta Bet-semescho prësu tsariskir Jerusalénman aparqan. Tsaychömi marka murällata juchutsiyarqan Efraín punkupita qallaykur hasta Esquïna niyanqan punkuyaq. Tsay juchutsiyanqan murällaqa juk pachak puwaq chunka (180) metru largumi karqan. 24 Tsaypitanami templucho Obed-edom cuidanqan qellayta, qorita y llapan manëjukunata apakuyarqan. Tsaynöllami palaciucho kaq tesörukunatapis apakuyarqan. Runakunata prësu apar Samariaman kutirninmi niyarqan: “Castaykikuna pägayämaptinrämi kachäyäshayki”.

25 Judá nacionpa mandaqnin rey Amasíasqa Israel nacionpa mandaqnin rey Joás wanunqanpita chunka pitsqa wata masrämi kawarqan. Rey Amasíasqa Joáspa tsurinmi karqan.^c Rey Joásnami Joacazpa tsurin karqan. 26 Rey Amasías ruranqankunaqa qallaykunanpita ushananyaq qellqaraykan Judá nacionpa y Israel nacionpa mandaqnin reykunapa acta librunchömi.

27 Rey Amasías Tayta Diosta mana cäsukur juk dioskunaman yärakunqanpitami runakuna Amasíaspa contran Jerusaléncho shäriyarqan. Tsaymi Laquis markaman qeshpiptinpis qatipaykur wanutsiyarqan. 28 Ayantanami cawalluman chaqnakurkur Jerusalénman apayarqan. Tsaychömi Davidpa Markanman unay castankuna pamparaykäyanqan kaqman pampayarqan.