4 Atska watana rey kaykarmi Joás yarpachakurqan Tayta Diospa templunta allitsatsinanpä. 5 Tsaymi sacerdötikunata y yanapaqnin levitakunata qoriskir nirqan: “Juklla aywayay nacionnintsikcho kaq markakunaman. Tayta Diosnintsikpa templunta allitsatsinäpä tsay markakunacho taq runakuna cada wata ofrenda qoriyanqanta apayämuy”.

Tsaynö niptinpis levitakunaqa manami aywayarqantsu. 6 Tsaymi mandaq sacerdöti Joiadata qayaskatsir rey nirqan: “Pactu Toldupa gastunkunapä ofrendata qorinantsikpämi Tayta Diospa sirviqnin Moiséspis y Israel mayor runakunapis mandayarqan.^† Tsaynö mandaykaptinqa ¿imanirtä Judá nacionnintsikman y Jerusalénman tsay ofrendata apayämunanpä levitakunata kachashqaykitsu? 7 Musyanqaykinöpis Atalíaqa mana allikunata rurarmi wamrankunawan Diospa templunman yaykuskir tsaycho kaykaq sagrädu manëjukunatapis manijayashqa Baal dioskunata adorayänanpä. Tsaymi tsay ofrendata ministintsik templuta allitsatsinantsikpä”.

8 Tsaypitanami juk ichik babulta ruraskatsir ofrendakunata wiñayänanpä Tayta Diospa templun yaykuna punku waqtaläman rey churatsirqan. 9 Nirkurmi Jerusaléncho taq runakunaman y Judá nacioncho taq runakunaman willakatsirqan llapan runakuna ofrendata apayämunanpä. Tsay ofrendata qoriyänanpämi Tayta Diospa sirviqnin Moisés tsunyaq jirkacho kaykar mandarqan.

10 Tsaymi llapan autoridäkunapis y llapan runakunapis templuman qellayta kushishqa apar babulman juntaqpä wiñayarqan. 11 Sacerdötikunapa yanapaqnin levitakunami tsay babulta apayaq reypa yanapaqninkuna rikayänanpä. Babul juntana kaptinqa reypa secretariunta y mandaq sacerdötipa yanapaqnintami willayaq babulta jäkatsiyänanpä. Jäkaskatsirnami kanqallanman yapay kutitsiyaq. Qoyay qoyay tsaynö rurarmi atska qellayta qoriyarqan.

12 Tsay qellaytami rey y sacerdöti Joiada Tayta Diospa templunta allitsatsiqkunata entregayaq. Paykunanami rumi llaqllaqkunata, carpintërukunata, herrërukunata y bronci takaqkunata templuta allitsayänanpä pägayaq. 13 Tsaynö maki maki arurmi templuta raslla allitsayarqan. Tsaynöpami punta kanqannö templu kuyayllapä yapay karqan.

14 Allitsayta ushaskirnami sobraq kaq qellayta entregayarqan reyta y sacerdöti Joiadata. Paykunanami tsay qellaypita manëjukunata ruratsiyarqan. Tsay manëjukunami wakin karqan templucho Tayta Diosta adorar manijayänanpä y wakinna karqan sacrificiukunata rupatsir manijayänanpä. Tsaykunami karqan cucharonkuna, qoripita väsukuna y qellaypita väsukunapis. Mandaq sacerdöti Joiada kawanqanyaqqa Tayta Diospa templuncho rupatsina kaq sacrificiukunatami imaypis rupatsiyaq.

15 Sacerdöti Joiadaqa juk pachak kimsa chunka (130) watayuq kaykarmi pasaypa awkinyashqana wanukurqan. 16 Payqa Tayta Dios munanqannö kawarmi Israel runakunata y templutapis alli rikarqan. Tsaymi wanuskiptin Davidpa Markancho reykuna pamparäyanqanman pampayarqan.

17 Joiada wanuskiptinnami Judá nacionpa autoridäninkuna rey Joásta alli shimillanpa parlapar llutanta yätsir qallaykuyarqan. 18 Unay castankuna adorayanqan Tayta Diosta templucho adorayänanpa trokinmi Asera diösapä jawiyanqan raku qerukunata y ïdulukunata adorayarqan. Tsaynö adorayaptinmi Tayta Dios pasaypa ajanarqan. 19 Tsaynö ajanashqa karpis profëtankunatami Tayta Dios kacharqan paykunata willayänanpä. Tsaynö willayaptinpis paykunaqa manami cäsukuyarqantsu.

20 Tsaymi Tayta Diospa Espïritun tantiyatsiptin sacerdöti Joiadapa tsurin Zacarías juk patakman witsarkur runakunata nirqan: “Tayta Diosmi nin: ‘¡Imanirtä mandamientükunata cumpliyankitsu! ¡Imanirtä desgraciata qayaykäyanki! ¡Noqata kachariyämanqaykinömi qamkunatapis kachariyäshayki!’ ”

21 Tsaynö niptinmi Zacaríaspa contran shäriyarqan. Rey mandaptinmi Tayta Diospa templun patiucho saqmar wanutsiyarqan.^† 22 Tsaynö wanutsiyänanpä mandarmi rey Joás yarparqantsu Zacaríaspa taytan Joiada imanö kuyapanqanta. Tsaynö mal agradecïdu kaptinmi Zacarías wanunanpä kaykarna nirqan: “¡Tayta Dios, kaynö rurayämanqanpita juzgaykullay!”

23 Tsaypita juk wata päsaskiptinmi Siria soldädukuna Jerusalénta y Judácho kaykaq wakin markakunata atacayarqan. Judá nacionpa llapan autoridäninkunata wanuskatsirmi ima tariyanqankunatapis Damascucho taq mandaqnin reyman apatsiyarqan. 24 Siria soldädukunaqa wallkalla karpis Tayta Dios yanapaptinmi Judá nacionpa atska soldädunkunata vinciyarqan. Tsaynö vinciyarqan Judá runakuna unay castankuna yärakuyanqan Tayta Diosta manana cäsukuyanqanpitami. Tsaynöpami Joásta Tayta Dios castigarqan.

25 Judá soldädukunata vinciskirmi Siria soldädukuna aywakuyarqan. Tsay guërrapita kutimur rey Joás antsa ujuraykaptinmi kikinpa yanapaqninkunalla wanuskatsiyarqan. Tsaynö wanuskatsiyarqan sacerdöti Joiadapa tsurin Zacaríasta wanutsinqanpitami. Tsaypitanami Davidpa Markanman Joásta pampayarqan. Itsanqa manami reykuna pamparäyanqanmanqa pampayarqantsu. 26 Joásta wanutsiqkunami kayarqan amonita warmi Simeatpa wamran Zabad y moabita warmi Simritpa wamran Jozabad.

27 Joáspa tsurinkuna rurayanqanpis, Joáspa contran profëtakuna atska kuti willakuyanqanpis y templuta imanö allitsatsinqanpis llapanmi qellqaraykan reykunapa acta libruncho. Joáspa trokinmi tsurin Amasíasna rey karqan.