23
Tsaypita qanchis watachönami sacerdöti Joiada soldädukunapa capitanninkunata qayatsirqan qorikäyänanpä. Qorikaykurmi pactuta rurayarqan reyta churayänanpä. Tsay capitankunami kayarqan Jerohampa tsurin Azarías, Johanánpa tsurin Ismael, Obedpa tsurin Azarías, Adaíapa tsurin Maasías y Zicripa tsurin Elisafat. 2 Willanakurmi entëru Judá nacionman aywar llapan markakunapita Jerusalénman qoriyämurqan levitakunata y Israel runakunapa mandaqninkunatapis. 3 Tayta Diospa templunman qorikaskiyaptinnami paykunapa ñöpanman Joásta sacerdöti Joiada pusharqan. Tsaypitanami nirqan: “¡Paymi Ocozíaspa tsurin! David casta karmi Tayta Dios awninqannö kay wamra rey kanqa”.†Tsaynö niptinmi llapan runakuna pactuta rurar reypa janan shäriyänanpä awniyarqan.
4 Tsaypitanami sacerdöti Joiada yätsir nirqan: “Sacerdötikuna y levitakuna, templuncho Tayta Diosta jamay junaq sirviyänaykipä töcayäshuptiki kimsa grüpuman rakikäyanki. Juk grüpu kanqa templu punkunta täpayänanpä. 5 Juk grüpumi kanqa reypa palaciunta täpayänanpä. Juk grüpunami kanqa Cimientu jutiyuq punkuta täpayänanpä. Wakin kaq runakunaqa templupa patiunchömi kayanqa.
6 “Templuman yaykuyänanpäqa unaypita patsami sacerdötikunallata y levitakunallata Tayta Dios akrarqan. Tsaymi templucho aruyänanpä töcaptin paykunalla tsaymanqa yaykuyanqa. Wakin runakunaqa patiuchömi Tayta Dios ninqannö täpayanqa. 7 Levitakuna, armaykikuna aptashqa llapayki reyta tumaypa cuidayanki. Pipis payta wanutsinanpä yaykuyta munaptinqa juklla wanutsiyanki. Reytaqa maypa aywaptinpis mana kachaypa cuidayanki”.
8 Tsaymi levitakuna y Judá runakuna sacerdöti Joiada mandanqankunata llapanta cumpliyarqan. Tsaynöpami turnunkuna cumpliq täpaqkunata y jamay junaqcho täpayänanpä yaykuqkunatapis wayinkunaman kutikuyänanta capitankuna munayarqantsu. 9 Tsay täpaqkunatami Joiada kamariparqan rey David ruratsinqan lanzakunata, jatun kaq escüdukunata y taksha kaq escüdukunata. Tsaykunaqa templu rurinchömi churararqan.
10 Kamaripaskiptinmi reyman pipis wanutsiq mana yaykunanpä tsay täpaqkuna lanzan aptashqa tumaypa churanakuyarqan. Tsaynö churanakuyarqan templupa sur kaqläninpita qallaykur altar puntanpa tumar norti kaqläyaqmi. 11 Tsaypitanami Joiadaqa reypa tsurinta tsurinkunawan pushaykamur corönata jatitsiyarqan. Jatirkatsirnami Israel runakunawan Tayta Dios ruranqan Pactu Libruta† entregayarqan y aceitita umanman wiñapäyarqan. Wiñapaskiyaptinnami tsaycho kaykaq runakuna niyarqan: “¡Viva mandamaqnintsik rey!”
12 Runakuna cörriyanqanta y kushikur qayaykachäyanqanta wiyarmi Atalíaqa Tayta Diospa templunman aywarqan ima päsanqantapis musyananpä. 13 Chaykurmi reyta rikarqan templu yaykuna parador ñöpancho ichiraykaqta. Reypa ñöpanchömi mayor runakuna y cornëta tukaq runakuna kaykäyarqan. Tsaynömi entëru Judá nación runakunapis kushikur cornëtata tukayarqan. Wakinnami instrumentunkunata tukar cantukunata cantaykätsiyarqan. Tsaynö kaykaqta rikaykurmi Atalíaqa latsapanta rachiskir: “¡Traicionëru! ¡Traicionëru!” nirqan.
14 Sacerdöti Joiadanami soldädukunapa capitanninkunata nirqan: “Atalíata templupita jukläman jipiskir wanutsiyay. Pipis janan shäriptinqa paytapis espädawan wanutsiyay”.
Templupita jukläman apaykur wanutsiyänanpä niptinmi 15 Atalíata prësu tsariskir cawallukuna yaykukunan palaciupa punkunman apayarqan. Tsaychömi wanutsiyarqan.
16 Tsaypitanami Tayta Dioswan pactuta rurar runakunata y reyta Joiada awnitsirqan Tayta Diosta cäsukur kawayänanpä. 17 Tsaymi llapan runakuna aywar Baalpa templunta juchutsiyarqan. Tsaynöllami Baal ïdulukunata y altarninkunata juchutsir ushayarqan. Juchutsiyanqan altarkunapa ñöpanchömi Baalpa sacerdötin Matánta wanutsiyarqan.
18 Tsaypita kutiykurnami Tayta Diospa templunta cuidayänanpä wardiakunata Joiada churarqan. Tsay wardiakunaqa sacerdötikunapa y levitakunapa munayninchömi kayarqan. Moisés qellqanqan leykunacho ninqannöllami sacerdötikunata y levitakunata rey David unay churarqan. Tsaymi Tayta Diospä rupatsina kaq sacrificiukunata templucho trukanakuypa rupatsiyaq y kushishqa alabayaq.
19 Tsaynöllami templupa patiun yaykuna punkukunaman wardiakunata Joiada churarqan pipis impüru kaptin yaykunanta mana kachapäyänanpä.
20 Tsaypitanami capitankunawan, respitashqa runakunawan, autoridäkunawan y tsaycho kaykaq llapan runakunawan rey Joásta templupita palaciuman pushayarqan. Jana kaq punkupa yaykaskatsirmi rey jamakunan trönuman jamatsiyarqan. 21 Tsaymi llapan runakuna pasaypa kushikuyarqan. Atalíata espädawan wanutsiyanqanpitaqa llapanpis añawnami kawakuyarqan.