Judá nacioncho Ocozías rey kanqan
22
Rey Joram wanuskiptinnami Jerusalén runakuna Jorampa tapshi tsurin Ocozíasta churayarqan mandaqnin rey kananpä. Tapshi kaykaptinpis payta churayarqan mayor wawqinkunata Arabia runakunawan asaltantikuna wanutsiyashqa kaptinmi. Tsaynöpami Judá nacioncho Jorampa tsurin Ocozías rey kayta qallaykurqan. 2 Mandayta qallaykunqan witsan Ocozíasqa ishkay chunka ishkay (22) watayuqmi kaykarqan.a Payqa Jerusalénpita mandarqan juk watami. Mamanmi karqan Atalía. Atalíaqa Israel nacionpa mandaqnin rey Omripa willkanmi karqan.3 Jutsata rurananpä maman yätsiptinmi Ocozíasqa Acabnö y Acabpa castankunanö jutsata rurar kawarqan.b 4 Taytanpa yätsiqninkunallami Ocozíaspa yätsiqninkuna kayarqan. Tsay yätsiqninkuna kayarqan Acab casta runakunami. Tsaymi Acab y Acabpa castankuna ajanätsiyanqannö paypis Tayta Diosta ajanätsirqan. Tsaynöpami chölullarä kaykar wanurqan. 5 Acab casta runakuna yätsiyanqanta chaskirmi Ocozíasqa Israel nacionpa mandaqnin rey Joramwan Siria nacionpa mandaqnin rey Hazaelta atacayänanpä willanakuyarqan. Rey Joramqa Acabpa tsurinmi karqan. Atacayänanpä awniptinmi Galaadcho kaykaq Ramot markaman soldädunkunawan aywayarqan. Tsaycho pelyar Siria soldädukuna rey Joramta flëchaskiyaptinmi 6 jampikunanpä Jezreel markaman kutirqan. Qeshyar ujuraykaptinmi rey Ocozías payta watukaq aywarqan.
Rey Ocozíasta Jehú wanutsinqan
7 Joramta watukaqnin aywar Ocozías wanunanpä Tayta Dios destinashqa kaptinmi hörallan atipashqa Jezreelman aywarqan. Chaykullarmi Joramwan yarquyarqan Nimsipa tsurin Jehúwan parlayänanpä. Jehútaqa Tayta Dios akrarqan Acab casta kaqta llapanta ushakätsinanpämi.
8 Jehúqa Acab casta runakunata wanutsirmi Judá autoridäkunawan y Ocozías casta runakunawanpis tinkuskir llapanta wanutsirqan.†
9 Samariacho pakaraykaptinmi rey Ocozíastapis wanutsinanpä ashitsirqan. Tsaycho tariskir prësu apaykuyaptinmi Jehú wanutsirqan. Tayta Dios munanqannö Ocozíaspa awilun Josafat kawashqa kaptinmi Ocozíasta shumaq pampayarqan. Tsaymi Ocozías casta rey kayman yaykunanpänöqa pipis karqantsu.
Judá nacioncho Atalía reina kanqan
10 Atalíaqa wamran Ocozíasta Jehú wanutsinqanta musyaskirmi reina kayta munar Ocozíaspa wawqinkunata y tsurinkunata Judácho wanutsir qallaykurqan.† 11 Wanutsinqanta musyaskirmi Ocozíaspa panin Josabet juk sobrinunta wätaqnintinta juk cuartuman pakaskirqan.c Tsay wamrapa jutinmi Joás karqan. Tsaynöpami Joásta wanutsirqannatsu. Josabetqa rey Jorampa tsurin y sacerdöti Joiadapa warminmi karqan. 12 Soqta watami Tayta Diospa templun cuartucho Joásta pakarätsirqan. Tsayyaqmi Atalíaqa Judá nacionpa mandaqnin reina karqan.