Israel nacioncho rey kananpä Jehúpa umanman aceitita wiñapanqan
9
Juk kutimi profëta mayinkunapita jukninta qayaykur Eliseo nirqan: “Shumaq kamarikuskir kay botëllacho kaykaq aceitita apakurkur Galaad particho kaykaq Ramot markaman ayway. 2 Chaykur ashinki Josafatpaa tsurin y Nimsipa willkan Jehúta. Amïgunkunawan kaykanqanman yaykuskir kikillanta juk cuartuman pushanki. 3 Tsay cuartuchöna apanqayki aceitita umanman wiñaskir ninki: ‘Tayta Diosmi nin: Israel nacionpa mandaqnin rey kanaykipämi aceitita wiñapaykä’. Tsaynö niskirnin punkuta kichaskir juklla qeshpir aywakunki”.4 Tsaynö yätsiskiptinmi chölu profëtaqa Galaadcho kaykaq Ramot markaman aywarqan. 5 Chaykurmi tarirqan soldädukunapa mandaqnin capitankuna qorikashqa kaykäyaqta. Tsaymi tsay profëta nirqan: “Tayta capitán, jukta willanäpämi kayman shamushqä”.
Tsaymi Jehú nirqan: “¿Mayqäta willayämänaykipätä shamushqayki?”
Tsaynö tapuptinmi profëta nirqan: “Tayta capitán, qamta willanäpämi shamushqä”.
6 Tsaynö niptinmi jinan höra juk cuartuman profëtawan Jehú yaykurqan. Tsaychönami Jehúpa umanman aceitita wiñapar profëta nirqan: “Israel runakunata kuyaq Tayta Diosmi nin: ‘Kuyanqä Israel nacionpa mandaqnin rey kanaykipämi churaykä.† 7 Rey karmi patronniki Acabpa castankunata llapanta wanutsinki. Paykunatami wanutsinki sirvimaqnï profëtakunata Jezabel wanutsinqanpita. 8 Acabpita aywaraq kaqtaqa wätay o mana wätay kaptinpis llapantami ollqu kaqtaqa wanutsir ushanki. Ninqänö wanutsiptikimi jukllayllapis Israel nacioncho tsay casta kawaykar quëdayanqatsu. 9 Tsaynö wanutsiptikimi Nabatpa tsurin Jeroboam castata y Ahíaspa tsurin Baasa castata ushakätsinqänölla Acab castatapis ushakätsishä. 10 Jezabeltanami Jezreel marka ñöpan chakrancho allqukuna mikuyanqa.† Paypa ayantaqa manami pipis pampanqatsu’ ”.
Tsaynö willaskirmi punkuta kichaskir profëta qeshpir aywakurqan.
11 Jehú kutiskiptinmi capitán mayinkuna tapuyarqan: “¿Imatä kashqa? ¿Imata nishunaykipätä tsay löcu runa shamushqa?”
Tsaynö niyaptinmi Jehú nirqan: “Musyayankimi löcu kar imatapis llutalla parlanqanta”.
12 Tsaymi capitankuna niyarqan: “¡Ama llullapäyämaytsu! Imata nishunqaykitapis willayämay”.
Tsaynö niptinmi Jehú nirqan: “Tsay runami nimashqa: ‘Israel nacionpa mandaqnin rey kanaykipämi Tayta Dios churashushqayki’ ”.
13 Tsaynö niptinmi capitankunaqa cäpankunata jipiskir grädaman mashtapäyarqan Jehú ichïnanpä. Nirkurmi cornëtata tukar jinchi niyarqan: “¡Viva rey Jehú!”
Rey Joramta Jehú wanutsinqan
14 Tsaypitanami Nimsipa willkan y Josafatpa tsurin Jehúqa rey Jorampa contran shäriyarqan. (Rey Joramqa Galaadcho kaykaq Ramot markacho Siria nacionpa mandaqnin rey Hazaelwan pelyanqanpitami 15 Jezreel markaman kutirqan jampikunanpä.) Jehúnami capitán mayinkunata nirqan: “Rey kanäta munaykarqa paqtä rey Joramman aywar rey kanäpä yaykunqäta pipis willanman”.
16 Tsaypitanami Jehúqa guërra carrëtaman yarkurkur Jezreel markaman aywarqan. Tsaychömi Joramqa guërracho däñakunqanpita jampikuykarqan. Judá nacionpa mandaqnin rey Ocozíaspis Joramta watukananpä aywashqa karmi tsaycho kaykarqan.
17 Soldädunkunawan Jehú chaykanqanta rikarmi Jezreel markata täpaq runa qayakur nirqan: “¡Atska runakunami shamuykäyan!”
Tsayta wiyaykurmi rey Joram nirqan: “Juk soldäduta kachay cawalluta muntakurkur aywar imapä shamuykäyanqantapis tapumunanpä”.
18 Tsaymi cawalluta muntakurkur tsay soldädu aywar Jehúta tapurqan: “Reymi kachamashqa imaq shamunqaykitapis willamänaykipä”.
Tsaymi Jehú nirqan: “Imapä shamunqätapis ¡imapätä musyayta munanki! Tapupämanqaykinöqa aywanantsikpä qepäkunaman churakämuy”.
Mana kutiptinnami marka täpaq soldädu nirqan: “Kachanqantsik soldädu manami kutimuntsu”.
19 Tsaynö niptinmi rey Joramqa juk soldädutana kacharqan cawalluta muntarkur aywananpä. Paypis Jehú kaqman chaykurmi tapurqan: “Reymi kachamashqa ima yarpaywan shamuykäyanqaykitapis willamänaykipä”.
Tsaynö niptinmi Jehú nirqan: “Imapä shamunqätapis ¡imapätä musyayta munanki! Tapupämanqaykinöqa aywanantsikpä qepäkunaman churakämuy”.
20 Tsaynö mana kutiptinnami marka täpaq soldädu nirqan: “Jukaq kachanqantsikpis punta kaqnöllami kutimuntsu. Shamuykaq runaqa Nimsipa willkan Jehúnöllami kaykan. Paynöllami löcuyaypa löcuyar carrëtakunatapis manijaykämun”.
21 Tsaymi Joramqa soldädunkunata nirqan: “Guërra carrëtäta juklla kamaripäyämay”.
Kamaripaskiyaptinmi rey Jorampis y rey Ocozíaspis carrëtankunawan aywayarqan Jehú kaqman. Aywarmi tinkuyarqan Jezreelpita kaq Nabotpa chakrancho.
22 Jehúpa ñöpanman chaykurmi rey Joram nirqan: “Jehú, ¿imatä kashqa shamunaykipä? ¿Llapanpis allillaku kaykäyan?”
Tsaynö niptinmi Jehú nirqan: “¡Imanöpatä llapanpis alli kanqa ïdulukunata adorar brüja mamayki Jezabel llutanta ruraykaptinqa!”
23 Tsaynö niptinmi rey Joramqa jinan höra qeshpir aywakur nirqan: “¡Ocozías! ¡Kay runaqa wanutsimänantsikpämi shamushqa!”
24 Tsaymi flëchanta Jehú aptarkur Joramta waqtanpa flëchaskirqan. Shonqunpa päsaqpä flëchaskiptinmi Joramqa carrëtallancho wanuskirqan.
25 Tsaypitanami yanapaqnin Bidcarta Jehú nirqan: “Tsay ayata kaypita jipiskir Jezreelpita kaq Nabotpa chakranman jitay. Yarpaykämi Jorampa taytan Acabpa carrëtan qepanta aywaykashqa rey Acabta Tayta Diospa profëtan paypä ninqanta: 26 ‘Nabotpa yawarninta y tsurinkunapa yawarninta jichar qäyan wanutsinqaykitami Tayta Dios rikashqa. Tsaymi kay chakrallacho pasaypa desgracia päsashunki.b Kanan ninqänöllami llapanpis päsashunki’.† Tayta Diospa profëtan tsaynö nikaptinqa Nabotpa chakranman apaykur Jorampa ayanta jitariy”.
Rey Ocozíasta Jehú wanutsinqan
27 Rey Joramta wanuskatsiptinmi Judá nacionpa mandaqnin rey Ocozíasqa qeshpir Bet-haganman aywakurqan. Qeshpir aywakuptinmi Jehúqa qepanta qatipar yanapaqninta nirqan: “¡Paytapis wanutsiy!”
Tsaynö niptinmi carrëtancho kaykaqta flëchawan flëchaskirqan. Payta tsaynö flëchaskirqan Ibleam ñöpancho Gur jutiyuq cuestata witsaykaptinmi. Flëchaskiptinpis manami jukllatsu wanurqan, sinöqa Meguiduman chaykurrämi wanurqan. 28 Tsaynö wanuskiptinmi wätayninkuna Jerusalénman carrëtawan apayarqan. Chaykurmi Davidpa Markanman unay castankuna pamparäyanqan kaqman pampayarqan. 29 Ocozíasqa Judá nacionpa mandaqnin rey kayta qallaykurqan Acabpa tsurin Joram chunka juk wata Israel nacioncho rey kaykaptinmi.
Jezabelta Jehú wanutsinqan
30 Tsaypitanami Jehúqa Jezreelman aywakurqan. Tsayta musyaykurmi Jezabelqa ñawinta pintakurqan y aqtsantapis shumaq adornakurqan. Nirkurnami ventänanpa qawararqan. 31 Marka yaykuna punkuman Jehú chaykaptinmi Jezabel nirqan: “¡Allillaku kaykanki, reyta wanutsiq Zimrinö runa!”†
32 Ventänanpa Jezabel qawaraykaqta rikaykurmi Jehú nirqan: “¿Pitä yanapamänanpä tsaycho kaykan?”
Tsaynö niptinmi Jezabelpa juk ishkay yanapaqninkuna ventänapa qawarkuyarqan. 33 Paykunatami Jehú nirqan: “¡Tsay warmita juklla jitarpayämuy!”
Tsaynö niptinmi Jezabelta patsaman jitarpayämuptin yawarninpis pirqaman y cawallukunaman pillchiqpä ishkirqan. Patsacho jitaraykaptinmi cawallukuna jarur jarur päsaskiyarqan.
34 Tsaypitanami Jehúqa aywakurqan mikuq upuq. Tsaypita mas rätuntanami Jehú nirqan: “Reypa tsurin kaykaptinqa tsay maldicionashqa warmita pampayay”.
35 Pampayänanpä aywarmi umanta, chakinta y makinta tullullantana tariyarqan. 36 Tsaynö kaykaqta tariykurmi Jehúman kutiyarqan imanö tariyanqantapis willayänanpä. Tsaynö willayaptinmi Jehú nirqan: “Tsaynö kananpä kaqtaqa maynami Tayta Dios willakatsirqan sirviqnin Elíaswan. Paymi nirqan: ‘Jezabelpa ayantaqa Jezreelcho kaq chakranchömi allqukuna mikuyanqa.† 37 Jezabelpa ayan iskanö chakracho mashtaraptinmi pipis tantiyanqatsu paypa ayan kanqanta’ ”.