Acabpa tsurinkunata Jehú wanutsinqan
10
Samaria markachömi Acabpa qanchis chunka (70) tsurinkuna kaykäyarqan. Tsaymi cartakunata Jehú apatsirqan tsay markacho kaykaq autoridäkunaman, mayor runakunaman y Acabpa tsurinkunata wätaqkunamanpis. Tsay cartakunachömi nirqan: 2 “Qamkunami wätaykäyanki rey Acabpa tsurinkunata. Tsaynöpis qamkunami tsararaykäyanki cawallunkunata, guërra carrëtankunata y armankunatapis. Tsaynöllami pipis mana atacayäshunaykipä murallashqa markacho kaykäyanki. Kay cartata chaskiskir 3 Acabpa tsurinkunapita mas allinnin kaq chöluta rey kananpä churayay. Nirkur kamarikuyay payta washäyänaykipä”.4 Tsay cartata liyiskirnami mantsarirnin kikinkunapura niyarqan: “Ishkay reykunatapis vinciykarqa ¡noqantsiktapis mana mayayllachi vincimäshun!”
5 Tsaynö nirmi palaciucho administraq, marka autoridäkuna, mayor runakuna y Acabpa tsurinkunata wätaqkuna Jehúman willakatsir niyarqan: “Noqakunaqa munaynikichömi kaykäyä. Manami mayqantapis churayäshätsu rey kananpä. Munaynikichöna kaykäyaptïqa yarpanqaykinö ruraykullay”.
6 Tsaynö niptinmi Jehúqa cartata yapay apatsir nirqan: “Rasunpaypa noqapa munaynïcho kayta munarqa y ninqäkunata rasunpaypa rurayta munarqa rey Acabpa tsurinkunapa umankunata waray kaynö höra Jezreelman apayämuy”.
Acabpa qanchis chunka (70) ollqu tsurinkunaqa tsay markacho taq mas respitashqa runakunapa munayninchömi kayarqan.
7 Cartata yapay chaskiskirnami rey Acabpa ollqu tsurinkunata wanutsiyarqan. Nirkurnami canastaman umankunata wiñarkur Jezreel markaman apatsiyarqan. 8 Chaykätsiyaptinmi Jehúta juk runa nirqan: “Rey Acabpa tsurinkunapa umankunatami chätsiyämushqa”.
Tsaynö niptinmi Jehú nirqan: “Tsay runakunapa umankunata marka punku yaykunaman ishkay muntunta qotuskir waray tutayaq jaqiykuyätsun”.
9 Waraynin tutanami Jehúqa marka punkuman aywaykur tsaycho qorikaq runakunata nirqan: “Mandamaqnintsik rey wanunanpä manami qamkunatsu jutsayuq kaykäyanki, tsaypa trokinqa noqami. Itsanqa ¿pirä kay qanchis chunka (70) runakunata wanutsishqa? 10 Imanö kaptinpis Acab casta kaqkunapä Tayta Diospa profëtan Elías willakunqannöllami llapanpis cumpliykan”.
11 Tsaypitanami Acabpa castankunata Jezreel markacho llapanta wanutsir Jehú usharqan.† Tsaynöllami Acabpa yanapaqninkunata, kuyanakuyanqan amïgunkunata y pay churanqan sacerdötikunatapis llapanta ushakätsirqan. Manami ni jukllayllatapis kawaykaqtaqa jaqirqantsu.
12 Tsaypitanami Samaria markata atacananpä Jehú päsarqan. Tsayman aywar mitsikuqkunapa majädan Bet-equedman charmi 13 tarirqan Judá nacionpa mandaqnin rey Ocozíaspa castankunata. Paykunatami tapur nirqan: “Qamkunaqa ¿pitä kaykäyanki?”
Paykunanami niyarqan: “Taytay, noqakunaqa rey Ocozíaspa castankunami kaykäyä. Rey Acabpa tsurinkunata y reina Jezabelpa wamrankunata watukayänäpämi aywaykäyä”.
14 Tsaynö niyaptinmi yanapaqnin runakunata Jehú nirqan: “¡Paykunata tsariyämuy!”
Tsaymi ninqannölla tsariskir pözu ñöpanman apaykur llapanta wanutsiyarqan. Kawaykaqta mana kachaypami chusku chunka ishkay (42) runakunata wanutsiyarqan.
15 Tsaypita päsarnami Recabpa tsurin Jonadabwan tinkurqan. Tsaynö tinkurninmi Jehúqa tapurqan: “¿Favorniki kanqänöku qampis favornï kaykanki?”
Tsaynö tapuptinmi Jonadab nirqan: “Taytay, qampa favornikimi kaykä”.
Tsaymi Jehú nirqan: “Tsaynö kaptinqa makikita qomay”.
Jonadab makinta qoptinnami Jehúqa carrëtanman witsätsir 16 nirqan: “Aku aywashun Tayta Diosta llapan shonqüwan sirvinqäta rikanaykipä”.
Tsaynö niskirmi ishkan aywayarqan. 17 Samaria markaman chaykurmi Jehúqa Acab casta kaqta llapanta wanutsirqan. Tsaynö wanutsirqan profëta Elíasta Tayta Dios ninqannöllami.
Baal adoraqkunata Jehú wanutsinqan
18 Tsaypitanami marka runakunata qoriskir Jehú nirqan: “Baalta Acab adoranqanpita masrämi noqaqa Baalta adorashä. 19 Tsaymi Baalpä atska sacrificiukunata rupatsinäpä shamushqä. Noqawan sacrificiukunata rupatsiyänanpä Baalta sirviq llapan profëtakunata, sacerdötikunata y payman llapan yärakuq runakunata qayatsiyämuy. Baalta sirviq kaqkuna pipis mana shamuptinqa wanutsishqami kanqa”.
Tsaynö llullaparninmi Jehúqa qayatsirqan Baalta adoraq kaqkunata llapanta wanutsinanpä.
20 Nirkurmi marka runakunata nirqan: “Baalpä fiestata rurar sacrificiukunata rupatsinantsikpä shumaq willanakuyay”.
Niptinmi shumaq willanakuyarqan. 21 Tsaypitanami entëru Israel nacioncho willakatsiptin tsaytsika runakuna chäyarqan tsay fiestapä. Baalpa templunchöpis runakuna pasaypa kichkiyparämi qorikäyarqan. 22 Baalta adoraqkuna llapanpis tsaynölla latsapata jatikuyänanta munarmi templu täpaq runakunata Jehú nirqan: “Baalta adoraqkuna jatikuyänanpä templuncho churaraykaq latsapata jipiyämuy”.
Tsaynö niptinmi churaraykaq latsapakunata jipiyämurqan jatikuyänanpä.
23 Tsaycho runakuna qorikashqa kaykäyaptinmi Jehúwan Jonadabpis Baalpa templunman yaykuyarqan. Nirkurmi Jehú nirqan: “Baalta adoraqkunalla kaycho kayay. Pipis Tayta Diosta adoraqkuna kaycho kayaptinqa llapanta qarquyay”.
24 Baalta adorar sacrificiukunata rupatsiyänanpä templunman llapan runakuna yaykuskiyaptinnami Jehúqa templu ñöpankunaman puwaq chunka (80) soldädukunata churar yätsirqan: “Templu rurincho kaykaq runakunata wanutsiyänaykipämi makikikunaman llapanta churamushqä. Mayqanpis qeshpiyaptinqa kikikikunami wanutsishqa kayanki”.
25 Sacrificiuta rupatsiyta ushaskiyaptinnami templu ñöpanman churanqan soldädukunata Jehú nirqan: “Templuman yaykur llapanta wanutsiyay”.
Tsaynö niptinmi Jehú churanqan soldädukunaqa Baalpa templunman yaykur llapanta espädankunawan wanutsiyarqan. Nirkurmi ayakunata jukläman jitayarqan. Tsaypitanami templu ruricho kaq cuartuman yaykuykur 26 sagrädu rumita jipiskir rupatsiyarqan. 27 Sagrädu rumita rupaskatsirmi Baalpa templuntapis juchutsir ushayarqan. Tsaypita patsami tsay templuqa runakuna ishpakuyänanpä kananyaqpis raqällana kaykan.
28 Tsaynö wanutsir Jehú ushaskiptinmi Israel nacioncho pipis Baalta adorayarqannatsu. 29 Baalpa templunta ushakätsirpis Bet-elcho y Dancho kaykaq qoripita rurashqa torïtukunataqa Jehú manami ushakätsirqantsu. Tsaynöpami Nabatpa tsurin Jeroboam Israel runakunata jutsata ruratsinqannö jutsata ruratsirqan.†
30 Jehútami Tayta Dios nirqan: “Qamqa Acab casta runakunata wanutsir allitami rurashqayki. Tsaynö ruranqaykipitami Israel nacionpa trönuncho qampita aywaraqkuna hasta chusku generacionyaq rey kayanqa”.
31 Tsaynö nikaptinpis Israel runakunata Jeroboam jutsata ruratsinqannöllami Jehúpis jutsata ruratsirqan. Tsaynöpami Israel runakunata kuyaq Tayta Diospa mandamientunkunata cumplirqantsu.
32 Tsay witsanmi Siria nacionpa mandaqnin rey Hazaelta Tayta Dios yanaparqan Israel runakunapa markankunata y chakrankunata qechunanpä. 33 Tsaymi qechurqan Jordánman rupay yarqamunan kaqlächo kaykaq llapan Galaad partita. Galaadchöqa Gad trïbu, Rubén trïbu y Manasés trïbu runakuna chaskiyanqan herenciankunami karqan. Tsaynöllami qechurqan Arnón mayu ñöpancho kaykaq Aroer markapita Galaad y Basán partipa lindërunyaq.