Judá nacioncho Atalía reina kanqan
11
Atalíaqa wamran Ocozíasta Jehú wanutsinqanta musyaskirmi reina kayta munar Ocozíaspa wawqinkunata y tsurinkunata Judácho wanutsir qallaykurqan.† 2 Wanutsinqanta musyaskirmi Jorampa tsurin y Ocozíaspa panin Josaba juk sobrinunta wätaqnintinta juk cuartuman pakaskirqan.a Tsay wamrapa jutinmi Joás karqan. Tsaynöpami Joásta wanutsirqannatsu. 3 Soqta watami Tayta Diospa templun cuartucho Joásta pakarätsirqan. Tsayyaqmi Atalíaqa Judá nacionpa mandaqnin reina karqan.4 Tsaypita qanchis watachönami Tayta Diospa templunman qorikäyänanpä sacerdöti Joiada qayatsirqan soldädukunapa capitanninkunata, cereteo soldädukunata y templu cuidaq wardiakunatapis. Tsayman qorikäyaptinnami paykunawan pactuta rurar juratsirqan rey Ocozíaspa tsurin Joáspa janan shäriyänanpä. Tsaycho llapan juraskiyaptinnami Joásta pakarätsinqanpita reqiyänanpä jipimurqan.
5 Tsaypitanami sacerdöti Joiada yätsir nirqan: “Kaykunatami qamkuna rurayanki: Jamay junaq täpaq batallón kimsa grüpuman rakikäyanki. Juk grüpu kanqa palaciuta täpayänanpä. 6 Juk grüpumi kanqa Shur ninqan punkuta täpayänanpä. Juk grüpunami kanqa cuartel punkuta täpayänanpä. Tsaynöpami palaciuta mana kachaypa täpayanki. 7 Jamay junaq mana täpaq ishkay batallonkunanami templucho reyta cuidayanki. 8 Armaykikuna aptashqa llapayki reyta tumaypa cuidayanki. Pipis payta wanutsinanpä yaykuyta munaptinqa juklla wanutsiyanki. Reytaqa maypa aywaptinpis mana kachaypa cuidayanki”.
9 Sacerdöti Joiada mandanqankunata capitankuna rurarmi llapan täpaqkunata qoriyarqan reyta cuidayänanpä. Tsaymi turnunkuna cumpliq täpaqkunata y jamay junaqcho täpayänanpä yaykuqkunatapis qoriykur sacerdöti Joiadaman pushayarqan. 10 Tsay täpaqkunatami Joiada kamariparqan rey David ruratsinqan lanzakunata y escüdukunata. Tsaykunaqa templu rurinchömi churararqan. 11 Kamaripaskiptinmi reyman pipis wanutsiq mana yaykunanpä tsay täpaqkuna lanzan aptashqa tumaypa churanakuyarqan. Tsaynö churanakuyarqan templupa sur kaqläninpita qallaykur altar puntanpa tumar norti kaqläyaqmi.
12 Tsaypitanami Joiadaqa reypa tsurinta pushaykamur corönata jatitsirqan. Jatirkatsirnami Israel runakunawan Tayta Dios ruranqan Pactu Libruta† entregarqan y aceitita umanman wiñaparqan. Wiñapaskiptinnami tsaycho kaykaq llapan runakuna makinkunata taqllarnin niyarqan: “¡Viva mandamaqnintsik rey!” niyarqan.
13 Llapan soldädukuna y runakuna kushikur qayaykachäyanqanta wiyarmi Atalíaqa Tayta Diospa templunman aywarqan ima päsanqantapis musyananpä. 14 Chaykurnami reyta rikarqan costumbrinkuna kanqannö parador ñöpancho ichiraykaqta. Reypa ñöpanchömi mayor runakuna y cornëta tukaq runakuna kaykäyarqan. Tsaynömi entëru Judá nación runakunapis kushikur cornëtata tukayarqan. Tsaynö kaykaqta rikaykurmi Atalíaqa latsapanta rachiskir: “¡Traicionëru! ¡Traicionëru!” nirqan.
15 Sacerdöti Joiadanami soldädukunapa capitanninkunata nirqan: “Atalíata templupita jukläman jipiskir wanutsiyay. Pipis janan shäriptinqa paytapis espädawan wanutsiyay”.
Templupita jukläman apaykur wanutsiyänanpä niptinmi 16 Atalíata prësu tsariskir cawallukuna yaykukunan palaciupa punkunman apayarqan. Tsaychömi wanutsiyarqan.
17 Tsaypitanami Tayta Dioswan pactuta rurar runakunata y reyta Joiada awnitsirqan Tayta Diosta cäsukur kawayänanpä. Tsaynöllami reytapis awnitsirqan runakunata alli rikananpä y runakunatanami awnitsirqan reyta respitayänanpä. 18 Tsaymi llapan runakuna aywar Baalpa templunta juchutsiyarqan. Tsaynöllami Baal ïdulukunata y altarninkunata juchutsir ushayarqan. Juchutsiyanqan altarkunapa ñöpanchömi Baalpa sacerdötin Matánta wanutsiyarqan.
Tsaypita kutiykurnami Tayta Diospa templunta cuidayänanpä wardiakunata Joiada churarqan. 19 Nirkurnami capitankunawan, cereteo soldädukunawan, wakin soldädukunawan y llapan runakunawan rey Joásta templupita palaciuman pushayarqan. Palaciuman yaykaskatsiyaptinmi rey jamakunan trönuman Joás jamarqan. 20 Tsaymi llapan runakuna pasaypa kushikuyarqan. Atalíata palaciu punkucho espädawan wanutsiyanqanpitaqa llapanpis añawnami kawakuyarqan.
21 (12.1) Mandayta qallaykunqan witsan qanchis watayuqllarämi Joás kaykarqan.