Judá nacioncho Joás rey kanqan
12
(2) Israel nacioncho qanchis wata Jehú rey kaykaptinmi Judá nacioncho Joás rey kayta qallaykurqan. Payqa chusku chunka (40) watami Jerusaléncho rey karqan. Mamanqa Beerseba markapita Sibiami karqan. 2 (3) Sacerdöti Joiada yätsiptinmi Joásqa Tayta Dios munanqannö llapantapis rurarqan. 3 (4) Markakunacho altarkunatami itsanqa juchutsirqantsu. Tsay altarkunachömi sacrificiukunata imaypis rupatsiyarqan y inciensiuwan qoshnitsiyarqan.4 (5) Juk junaqmi sacerdötikunata rey Joás nirqan: “Tayta Diospa templunta allitsatsishun. Tsaypäqa Tayta Diospa templunman apayämunqan qellayta qoriyanki. Tsaynö qoriyanki censakuyanqanpita impuestu kaptinpis†, castanta Tayta Diosman entreganqanpita ofrenda kaptinpis† o kikinpa voluntäninpita apayämunqan ofrenda kaptinpis.† 5 (6) Tsay qellaytami encargädukuna entregayäshunki templuta allitsatsiyänaykipä”.
6 (7) Tsaynö niptinpis ishkay chunka kimsa (23) wata päsanqanyaq sacerdötikunaqa manarämi templuta allitsatsiyarqanrätsu. 7 (8) Tsaymi sacerdöti Joiadata y wakin sacerdötikunatapis rey Joás qayaykatsir nirqan: “¿Imanirtä templuta allitsatsiyashqaykirätsu? Kananpitaqa qoriyanqayki qellayta amana gastayaynatsu, tsaypa trokinqa templuta allitsatsiyänaykipäna katsun”.
8 (9) Tsaynö niptinmi sacerdötikuna awnir kikinkunapa gastunkunapä runakunapita qellayta chaskiyarqannatsu. Tsaynöllami templuta allitsatsinanpä juk runatana churayarqan.
9 (10) Tsaymi sacerdöti Joiadaqa babulta ruraskatsir tsapanan chawpinpa qellayta wiñayänanpä uchkurqan. Tsaypitanami altarpa derëchanman tsay babulta churarqan. Tsaymanmi runakuna apayämunqan qellayta templu cuidaq sacerdötikuna wiñayarqan. 10 (11) Tsay babulman juntaqnöna kaptinmi reypa secretariun y mandaq sacerdöti aywaykur tsay qellayta yupayaq. Nirkurmi llutalla pipis mana gastananpä shumaq sigurayaq. 11 (12) Tsaypitanami templuta allitsatsiyllanta pägananpä encargädu runakunata entregayarqan. Paykunanami aruyllanta pägayarqan carpintërukunata, contratistakunata, 12 (13) albañilkunata y rumi llaqllaqkunata. Tsaynöllami qellayta kamariparqan qerukunata y llaqllashqa rumikunata rantiyänanpä y wakin gastunkunapäpis.
13 (14) Tayta Diospa templunman apayämunqan qellayqa manami tazonkunata, mëchapa llipta jipikunanta, cornëtakunata, ni ima manëjutapis qellaypita ni qoripita rurayänanpätsu karqan, tsaypa trokinqa templuta allitsatsiyänanpämi karqan. 14 (15) Tsaymi tsay qellaytaqa churayaq Tayta Diospa templunta allitsatsiyänallanpä. 15 (16) Templuta arutsiqkunaqa mana suwakuypami llapantapis rurayaq. Tsaymi tapuyaqnatsu aruqkunata pägar aykata gastayanqantapis. 16 (17) Purificatsina sacrificiupä y consagratsina sacrificiupä apayämunqan qellayqa manami templuta allitsatsiyänanpätsu karqan, tsaypa trokinqa sacerdötikunapämi.†
17 (18) Tsay witsanmi Siria nacionpa mandaqnin rey Hazael soldädunkunawan Gat markata atacar vinciyarqan. Tsaypitanami Jerusalén markata atacayänanpäna aywayarqan. 18 (19) Atacayänanpä aywaykäyanqanta musyaskirmi Judá nacionpa mandaqnin rey Joásqa Tayta Diospa templuncho churaraykaq manëjukunata qorirqan. Tsay manëjukunataqa templuman churayarqan rey Josafat, rey Joram, rey Ocozías y kikin Joásmi. Tsaynöllami Tayta Diospa templuncho y palaciucho tarinqan kaq qoritaqa llapanta qoriskir Siria nacionpa mandaqnin rey Hazaelman apatsirqan. Tsayta chaskiskirnami Hazaelqa Jerusalénta atacarqannatsu.
19 (20) Joás imata ruranqanpis llapanmi qellqaraykan Judá nacionpa mandaqnin reykunapa acta libruncho. 20 (21) Joástaqa kikinpa soldädunkuna tikrapurmi Bet-milucho wanuskatsiyarqan. Tsayqa Silaman aywaq nänichömi karqan. 21 (22) Payta wanutsiyarqan Simeatpa tsurin Josacar y Somerpa tsurin Jozabadmi. Joás wanuykuptinmi Davidpa Markancho unay castankuna pamparäyanqanman pampayarqan. Paypa trokinnami tsurin Amasana rey karqan.