Israel nacioncho Joacaz rey kanqan
13
Ocozíaspa tsurin Joás ishkay chunka kimsa (23) wata Judá nacioncho rey kaykaptinmi Israel nacioncho Jehúpa tsurin Joacaz rey kayta qallaykurqan. Samariapitami chunka qanchis wata Joacaz mandarqan. 2 Joacazqa Tayta Diosta mana cäsukurmi Nabatpa tsurin Jeroboamnölla Israel runakunata jutsata ruratsirqan.† 3 Joacaz tsaynö ruraptinmi Tayta Dios pasaypa ajanarnin Siria nacionpa mandaqnin rey Hazaelta y tsurin Ben-adadta yanaparqan Israel nacionta atacar atska kuti vinciyänanpä.4 Siria soldädukuna pasaypa ñakatsiptinmi Joacazqa Tayta Diosta mañakurqan. Tsaynö mañakuptinmi Israel runakunata kuyapar Tayta Dios yanaparqan. 5 Tsaymi Siria nacionpa munaynincho kaykäyanqanpita jipinanpä juk runata churarqan. Tsaypitanami Israel runakunaqa ñöpata kawayanqannölla añaw kawayarqan. 6 Tsaynö salvaykaptinpis Jeroboampita aywaraq reykunanöllami Israel runakunata jutsata ruratsirqan. Tsaymi Samaria markacho Asera diösata imaypis adorayarqan.
7 Siria nacionpa mandaqnin reypa soldädunkuna guërracho wanutsiyanqanpitami rey Joacazpa wallkallana soldädunkuna quëdayarqan. Tsaymi quëdayarqan pitsqa chunka (50) cawallun muntashqa soldädukuna, chunka guërra carrëtakuna y chunka waranqa (10,000) chakillapa aywaq soldädukuna.
8 Rey Joacaz imata ruranqanpis llapanmi qellqaraykan Israel nacionpa mandaqnin reykunapa acta libruncho. 9 Joacaz wanuskiptinmi Samaria markaman pampayarqan. Paypa trokinnami tsurin Joásna rey karqan.
Israel nacioncho Joás rey kanqan
10 Kimsa chunka qanchis (37) wata Judá nacioncho Joás rey kaykaptinmi Israel nacioncho Joacazpa tsurin Joás rey kayta qallaykurqan. Chunka soqta watami Samariapita Joás mandarqan. 11 Joásqa Tayta Diosta mana cäsukurmi Nabatpa tsurin Jeroboamnölla Israel runakunata jutsata ruratsirqan.†
12 Rey Joás imata ruranqanpis y rey Amasíaswan pelyanqanpis llapanmi qellqaraykan Israel nacionpa mandaqnin reykunapa acta libruncho. 13 Joás wanuskiptinnami Israel nacionpa mandaqnin rey pamparanqan Samaria markaman pampayarqan. Paypa trokinnami tsurin Jeroboamna yaykurqan rey kananpä.
Profëta Eliseo wanunqan
14 Pasaypa antsa qeshyar profëta Eliseo ujuraykaptinmi Israel nacionpa mandaqnin rey Joás watukaq aywarqan. Chaykurmi Eliseuta makallakurkur waqar nirqan: “¡Ay taytallay, tayta! ¡Israel runakunapa guërra carrëtankunata y cawallunkunatami rikaykä!”†
15 Tsaymi Eliseo nirqan: “Juk ishkay flëchakunatawan flëchakunaykita aptay”.
Tsaynö niptinmi flëchakunatawan flëchakunanta aptarqan. 16 Tsaypitanami Eliseo nirqan: “Flëchanaykipä flëchakunaykita apuntay”.
Ninqannö apuntaraykaptinmi Eliseuqa reypa makin jananman makinta churaykur 17 nirqan: “Rupay yarqamunan kaqläpa ventänata kichay”.
Ventänata kichaskiptinnami Eliseo nirqan: “Kananqa flëchay”.
Tsaynö niptinmi reyqa flëchaskirqan. Flëchaptinmi nirqan: “Tsay flëchanqaykimi señal kaykan Siria soldädukunapa munayninpita Tayta Dios salvashunaykipä kanqanta musyanaykipä. Tsaymi Afecman aywar Siria soldädukunata vincir Israel runakunata munaynincho kaykäyanqanpita salvanki”.
18 Mastami Eliseo nirqan: “Wakin kaq flëchakunata aptay”.
Flëchakunata aptarkuptinnami nirqan: “Kananqa patsata takay”.
Niptinmi patsata kimsa kuti takaykurqan. 19 Kimsa kutilla takaykuptinmi profëta Eliseo pasaypa ajanarnin reyta nirqan: “Pitsqa kuti o soqta kuti patsata takarqa Siria soldädukunata llapantami ushakätsinkiman karqan. Kimsa kutilla takanqaykipitami kimsa kutilla Siria soldädukunata vincinki”.
20 Eliseo wanuskiptinnami pampayarqan.
Cada watami Moab nacionpita asaltantikuna runakunata asaltayänanpä Israel nacionman shayämuq. 21 Juk kutichömi ayata Israel runakuna pampayänanpä apaykäyanqancho rikayarqan tsay asaltantikuna shamuykäyaqta. Tsaymi apaykäyanqan ayata Eliseupa sepultüranman jitariykur qeshpir aywakuyarqan. Eliseupa tullunkunaman töpaskirmi jinan höra tsay ayaqa kawarimur sharkamurqan.
22 Joacaz rey kanqan witsanmi Siria nacionpa mandaqnin rey Hazael Israel runakunata pasaypa ñakatsirqan. 23 Tsaynö kaptinpis Abrahamwan, Isaacwan y Jacobwan pactuta rurashqa karmi Israel runakunata Tayta Dios imaypis kuyaparqan. Tsaymi kananyaqpis paykunata illakätsishqatsu ni ushakätsishqatsu.