Sunem warmi wayinta y chakranta qorinqan
8
Juk kutimi kawatsinqan wamrapa† mamanta Eliseo nirqan: “Qanchis wata alläpa muchuy kananpämi Tayta Dios nimashqa. Tsaynö kananpä kaykaptinqa kay markapita maypapis castaykikunawan aywakuyay”.2 Profëta Eliseo ninqanta cäsukurmi warmiqa llapan castankunawan filisteo runakunapa nacionninman aywakuyarqan. Tsay nacionchömi qanchis wata täyarqan.
3 Qanchis wata päsaskiptinnami markanman warmi kutikurqan. Chaykurmi wayinta y chakrankunata qorikunanpä rey kaqman rugakuq aywarqan. 4 Tsay warmi chänanpämi Eliseupa wätaynin Gieziwan rey parlaykarqan. Tsaychömi Giezita tapupaykarqan Eliseo milagru ruranqanta willananpä. 5 Tsaycho warmipa wamranta Eliseo imanö kawatsimunqanta willaykaptinmi wamran pushashqa tsay warmi charqan reyta rugakunanpä.
Tsay warmita y wamranta rikaskirmi Giezi nirqan: “¡Taytay, paypämi willaykashqä! ¡Eliseo kawatsimunqan wamranpis paymi kaykan!”
6 Tsaymi tsay warmita rey tapurqan wamranta imanö kawatsimunqanta. Tsaynö willaptinmi tsay warmipa wayinta y chakrankunata kutitsinanpä juk yanapaqninta rey nirqan. Tsaynöllami nirqan aywakur jaqinqan junaqpita patsa chakranta murunqanpita tsay warmita pägananpä.
Siria nacionpa mandaqnin rey kananpä Hazael yaykunqan
7 Tsaypitanami Eliseuqa Damasco markaman aywarqan. Tsaychömi Siria nacionpa mandaqnin rey Ben-adad pasaypa antsa qeshyaykarqan. Tsayman Eliseo chanqanta willayaptinmi 8 yanapaqnin Hazaelta rey Ben-adad nirqan: “Imallatapis qaranaykipä apakurkur profëta kaqman ayway. Chaykur ninki: ‘Tayta Diostashi tapukuykullanki rey alliyänanpä o mana alliyänanpä kanqantapis’ ”.
9 Tsaynö niptinmi Hazaelqa chusku chunka (40) camëllukunawan qarananpä kaqkunata apakurkur profëta kaqman aywarqan. Chaykurmi nirqan: “Siria nacionpa mandaqnin rey Ben-adadmi taytantanö respitashunki. Paymi kachamashqa qeshyaykanqanpita alliyänanpä o mana alliyänanpä kanqantapis willamänaykipä”.
10 Tsaynö niptinmi Eliseo nirqan: “Kanan aywaykur reyta willay qeshyaykanqanpita alliyänanpä kanqanta. Itsanqa tsay qeshyaykanqanpita alliyarpis wanunanpäna kanqantami Tayta Dios nimashqa”.
11 Tsaynö niskirmi Hazael pasaypa penqakunqanyaq profëta Eliseo rikararqan. Rikapaykanqanchömi Eliseuqa waqayta qallaykurqan.
12 Tsaynö waqaptinmi Hazael tapurqan: “¿Taytay, imanirtä waqaykanki?”
Eliseunami nirqan: “Musyämi Israel nacioncho murallashqa markakunata rupatsinaykipä kanqanta, chölukunata espädaykiwan wanutsinaykipä kanqanta, wamrakunata tsapiypa wanutsinaykipä kanqanta y qeshyaq warmikunapa pachantapis qashar ushanaykipä kanqanta. Israel runakunapa contran shärir tsaynö ruranaykipä kanqanta musyarmi waqaykä”.
13 Tsaynö niptinmi Hazael nirqan: “Taytay, mana väliq allqunö kaykarqa ¿imanöpatä tsaykunata ruräman?”
Tsaynö niptinmi Eliseo nirqan: “Tayta Diosmi musyatsimashqa Siria nacionpa mandaqnin rey kanaykipä kanqanta”.†
14 Tsaypitanami Hazaelqa Eliseupita despidikuskir reyman kutirqan. Chaykuptinnami rey tapurqan: “¿Imatatä Eliseo nishushqayki?”
Tsaynö tapuptinmi Hazael nirqan: “Alliyänaykipä kanqantami nimashqa”.
15 Tsaypita waraynin junaqnami Hazaelqa juk frazädata ushmaskatsir reypa umanta wankuskiptin jamaytsaypa wanurqan. Tsaynö wanuskatsirmi Hazaelna Siria nacionpa mandaqnin rey karqan.
Judá nacioncho Joram rey kanqan
16 Acabpa tsurin Joram pitsqa watana Israel nacioncho rey kaykaptinmi Judá nacioncho Josafatpa tsurin Joram rey kayta qallaykurqan. 17 Mandayta qallaykunqan witsanmi kimsa chunka ishkay (32) watayuq kaykarqan. Payqa puwaq watami Jerusalénpita mandarqan.
18 Rey Acabpa warmi tsurinwan tarmi Acabpa castankunanölla y Israel nacionpa mandaqnin reykunanölla Tayta Diosta mana cäsukur jutsata rurarqan. 19 Tsaynö kaptinpis sirviqnin Davidpita aywaraq runa Judácho imaypis rey kananpä pactuta rurashqa karmi Judá nacionta Tayta Dios ushakätsirqantsu.†
20 Judá nacioncho Joram rey kaykanqan witsanmi Edom nación runakuna Judá nacionpa munaynincho kayanqanpita yarquskir† kikinkunapa mandaqnin reyta churayarqan. 21 Tsaymi Joramqa guërra carrëtakunawan Edomcho Zair markaman atacayänanpä aywayarqan. Edomita soldädukuna pelyayänanpä yarqurmi rey Joramta y carrëtakunawan aywaq capitankunata tumaypa tsapaskiyarqan. Tsaynö tsapaskiyaptinmi Israel soldädukunaqa imaykanöpapis paqaspa qeshpir wayinkunaman aywakuyarqan. 22 Tsaypita patsami Edom nación runakunaqa kananyaqpis Judá nacionpa munayninchönatsu kayan. Tsay witsanllanami Libna marka runakunapis Judá nacionpa munayninpita yarqukuyarqan.
23 Joram imata ruranqanpis llapanmi qellqaraykan Judá nacionpa mandaqnin reykunapa acta libruncho. 24 Joram wanuskiptinmi Davidpa Markanman unay castankuna pamparäyanqan kaqman pampayarqan. Paypa trokinnami tsurin Ocozías yaykurqan rey kananpä.
Judá nacioncho Ocozías rey kanqan
25 Acabpa tsurin Joram chunka ishkay wata Israel nacioncho mandaq kaykaptinmi Judá nacionpa mandaqnin rey Jorampa tsurin Ocozías rey kayta qallaykurqan. 26 Mandayta qallaykunqan witsan Ocozíasqa ishkay chunka ishkay (22) watayuqmi kaykarqan. Payqa Jerusalénpita mandarqan juk watami. Mamanmi karqan Atalía. Atalíaqa Israel nacionpa mandaqnin rey Omripa willkanmi karqan. 27 Ocozíaspis Omripa tsurin Acab castawan tarmi Tayta Diosta mana cäsukur Acab y Acabpa castankuna jutsata ruranqannö jutsata rurarqan.
28 Ocozíasqa Israel nacionpa mandaqnin rey Joramwanmi Siria nacionpa mandaqnin rey Hazaelta atacayänanpä willanakuyarqan. Rey Joramqa Acabpa tsurinmi karqan. Atacayänanpä awniptinmi Galaadcho kaykaq Ramot markaman soldädunkunawan aywayarqan. Tsaycho pelyar Siria soldädukuna rey Joramta flëchaskiyaptinmi 29 jampikunanpä Jezreel markaman kutirqan. Qeshyar ujuraykaptinmi rey Ocozías payta watukaq aywarqan.