2 Jorampa wawqinkunami kayarqan Azarías, Jehiel, Zacarías, Azarías, Micael y Sefatías. Paykunaqa rey Josafatpa tsurinkunami kayarqan. 3 Tsay tsurinkunatami taytan rakiparqan qorita, qellayta y imaykatapis chanin cuestaqkunata. Tsaynöpis paykunata churarqan Judá nacioncho corralashqa markakunacho autoridäkuna kayänanpämi. Joramtami itsanqa mayor tsurin kaptin rey kananpä taytan churarqan.

4 Taytanpa trokin rey karnami pipis qarqunanta mana munar llapan wawqinkunata espädawan Joram wanutsirqan. Tsaynöllami wakin mandaq autoridäkunatapis espädawan wanutsirqan.

5 Joramqa kimsa chunka ishkay (32) watayuq kaykarmi rey kayta qallaykurqan. Payqa puwaq watami Jerusalénpita mandarqan. 6 Rey Acabpa warmi tsurinwan tarmi Acabpa castankunanölla y Israel nacionpa mandaqnin reykunanölla Tayta Diosta mana cäsukur jutsata rurarqan. 7 Tsaynö kaptinpis sirviqnin Davidpita aywaraq runa Judácho imaypis rey kananpä pactuta rurashqa karmi Joramta rey kanqanpita Tayta Dios qarqurqantsu.^†

8 Judá nacioncho Joram rey kaykanqan witsanmi Edom nación runakuna Judá nacionpa munaynincho kayanqanpita yarquskir^† kikinkunapa mandaqnin reyta churayarqan. 9 Tsaymi capitankunata rey Joram qayaykatsir guërra carrëtankunawan Edomman aywayarqan atacayänanpä. Edomita soldädukuna pelyayänanpä yarqurmi rey Joramta y carrëtakunawan aywaq capitankunata tumaypa tsapaskiyarqan. Tsaynö tsapaskiyaptinmi Israel soldädukunaqa imaykanöpapis paqaspa qeshpiyarqan. 10 Tsaypita patsami Edom nación runakunaqa kananyaqpis Judá nacionpa munayninchönatsu kayan.

Unay castankuna yärakuyanqan Tayta Diosta Joram mana cäsukuptinmi Tayta Dios kamakätsirqan Libna marka runakunapis Judá nacionpa munayninpita yarqukuyänanpä.

11 Jerusaléncho taq runakuna juk dioskunata adorayänanpämi Joramqa Judá jallqakunacho altarkunata ruratsirqan. Tsaynöpami Judá nación runakuna Tayta Diosta cäsukuyarqannatsu.

12 Tsay witsanmi rey Joramman profëta Elías cartakurqan. Tsay cartachömi nirqan: “Unay castayki rey David yärakunqan Tayta Diosmi nin: ‘Taytayki Josafat y awiluyki Asa cäsukayämanqannö ¿imanirtä cäsukamankitsu? 13 Tsaynö karqa Israel nacionpa mandaqnin reykunanöllami llutanta ruraykanki. Juk dioskunata adorayänanpä unay rey Acab parlapanqannömi qampis Judácho taq runakunata y Jerusaléncho taq runakunata parlapashqayki. Tsaynöpis qampita mas alli kaykäyaptinmi wawqikikunatapis wanutsishqayki. 14 Tsaynö kanqaykipitami nacionnikicho desgracia päsananpä kamakätsiptï tsurikikunata, warmikikunata y llapan imaykaykikunatapis apakuyanqa. 15 Qamtanami tukuy niraq qeshyakunawan castigashayki. Pacha nanaywan qeshyarmi qoyay qoyay antsanki oqitikipis yarqakämunqanyaq’ ”.

16 Tsaypitanami filisteo runakunapa y Arabia runakunapa yarpayninman Tayta Dios churarqan rey Jorampa contran shäriyänanpä. Tsay Arabia runakunaqa täyarqan Etiopía runakuna täyanqan kaqläpami. 17 Judá nacionman chaykur atacarninmi reypa palaciuncho imayka riquëzankunatapis apakuyarqan. Tsaynöllami Jorampa tsurinkunatapis warminkunatapis apakuyarqan. Jerusalénchöqa Joramwan quëdarqan tapshi kaq tsurin Joacazllami.^a

18 Tsaypitanami rey Joramta Tayta Dios pacha nanaywan castigaptin ima jampipis alliyätsirqantsu. 19 Ishkay wata tsaynölla qeshyaptinmi oqitin tikrakarqan. Tsaynöpami pasaypa llakipaypä ñakaykanqancho wanurqan. Wanuskiptin marka mayinkuna yantallatapis manami waykayarqantsu unay reykuna wanuptin rurayanqannö.

20 Joramqa kimsa chunka ishkay (32) watayuq kaykarmi rey kayta qallaykurqan. Jerusalénpita puwaq watallami mandarqan. Wanuskiptin manami pipis lüturqantsu ni waqarqantsu. Davidpa Markanman pamparpis manami reykuna pamparäyanqan kaqmanqa pampayarqantsu.