Moabita y amonita runakunata Josafat vincinqan
20
Tsaypita juk tiempu päsaskiptinnami moabita, amonita y meunita runakuna willanakuskir Josafatta atacayänanpä aywayarqan. 2 Tsaynö aywaykäyanqanta rikaykurmi rey Josafat kaqman aywayarqan willayänanpä. Chaykurmi niyarqan: “Kachi Lamar wak tsimpan Edompitami atska soldädukuna shamuykäyan qamta atacayäshunaykipä. ¡Paykunaqa Hazezon-tamarchönami kaykäyan!”(Hazezon-tamarqa En-gadi niyanqan partillami kaykan.)
3 Tsaymi Josafat pasaypa mantsarir Tayta Diosta mañakurqan yanapananpä. Tsaynöpis llapan Judá runakunamanmi willakatsirqan ayunayänanpä. 4 Tsaymi Judá nacioncho kaykaq llapan markakunapita Jerusalénman runakuna qorikäyarqan Tayta Diosta mañakuyänanpä. 5 Llapan Judá runakuna qorikaykuptinmi Tayta Diospa templuncho kaykaq mushuq patiu yaykunaman ichiykur 6 Tayta Diosta mañakur Josafat nirqan: “Unay castäkuna yärakuyanqan Tayta Dios, ciëlutapis y kay patsacho kaq llapan nacionkunatapis qamllami munaynikicho tsararanki. Llapanpä munayyuq kaptikimi michäshunaykipä ni pipapis kallpan kantsu.
7 “Tayta Diosllä, unay castäkuna kay nacioncho täyänanpä kikikimi kaycho taq unay runakunata qarqushqayki. Amïguyki Abrahampita aywaraq kayaptïmi imayyaqpis kaycho täyänäpä churayämashqayki.†
8 “Unay castäkuna kay nacioncho tarmi qamta adorayäshunaykipä kay templutapis shäritsiyarqan. Nirkurmi niyäshurqayki: 9 ‘Ima desgraciapis chämuptin, atacayämänanpä runakuna shamuptin, qeshya o muchuy chämuptin kay täkunqayki templuman shamuykur mañakayämuptï wiyayämarnin salvaykayällämay’.
10 “Egiptupita yarqayämuptinmi unay castäkunata nirqayki amonita y moabita runakuna täyanqanman y Seir jallqakuna kinran taq runakuna täyanqanmanpis mana yaykuyänanpä.† Tsaymi juk nänipa päsakurnin ninqaykinölla paykunata ushakätsiyarqantsu. 11 Tsaynö alli rikaykäyaptïmi paykunapita aywaraqkuna churayämanqayki nacionpita qarqayämänanpä shamuykäyan.
12 “Tayta Diosllä, paykunata castigaykullay. Atska soldädukuna shamur atacayämaptin michaytapis manami kamäpakuyäshätsu. Manami ima ruraytapis mayayätsu. Tsaymi qamllaman yärakamur mañakayämü”.
13 Llapan Judá runakunami warmintin wamrankunantin Tayta Diospa ñöpancho ichiraykäyarqan. 14 Tsaychömi Benaíapa willkan y Zacaríaspa tsurin Jahazielpis kaykarqan. Jahazielpa awilun Benaíaqa Jeielpa tsurin y Mataníaspa willkanmi karqan. Paykunaqa Leví trïbu Asafpita aywaraq runakunami kayarqan.
Jahazielmi Tayta Diospa Espïritun parlatsiptin 15 nirqan: “Rey Josafat, Jerusaléncho taq runakuna y Judá nación wakin markakunacho taq runakunapis, shumaq wiyayämay. Tayta Diosmi nin: ‘Atska soldädukuna shamuykäyanqanta musyar ama mantsariyaytsu ni llakikuyaytsu. Kay pelyachöqa manami qamkunatsu pelyayanki, sinöqa kikïmi pelyashä.
16 “ ‘Waray junaq uräyay paykunata atacayänaykipä. Contraykikunaqa Sis cuestapami witsaykäyämunqa. Paykunawanmi tinkuyanki Jeruel tsunyaq jirkaman chaq raqra ñöpancho. 17 Qamkunapa trokikikunami paykunawan noqa pelyashä. Tsaynö kaykaptinqa contraykikuna kanqan kaqman chaykur ama atacayankitsu, sinöqa imanö salvanqäta rikayänaykipä churakäyanki. Jerusaléncho y Judácho taq runakuna, ama mantsariyaytsu ni llakikuyaytsu. Qamkunawan kaykaptïqa paykunata ichipäyänaykipä waray aywayay’ ”.†
18 Tsaynö niptinmi rey Josafat y tsaycho kaykaq llapan runakunapis patsaman lätakaykur Tayta Diosta adorayarqan. 19 Coatpita y Corépita aywaraq levitakunami ichiykur Israel runakunata kuyaq Tayta Diosta llapan shonqunkunawan jinchi alabayarqan.
20 Waraynin tutanami tsaka tsakalla Tecoa tsunyaq jirkapa aywayänanpä llapan qorikäyarqan. Yarquyänanpäna kaykaptinmi rey Josafat nirqan: “Jerusaléncho y Judácho taq runakuna, Tayta Diosnillantsikman yärakushqaqa salvamäshunmi. Profëtakuna niyanqanta criyishqaqa manami imapis päsamäshuntsu”.
21 Runakunawan willanakuskirmi Tayta Diosta alabayänanpä cantaqkunata Josafat churarqan. Tsay cantaqkunami sagrädu latsapankunata jatikurkur Tayta Diosta alabaraykar soldädukunapa puntanta aywayarqan. Cantarmi niyarqan:
“¡Allillata ruraq kanqanpita Tayta Diosta agradëcikuyay!
¡Kuyakuq kayninqa imaypis manami ushakantsu!”†
22 Alabayta qallaykunqan hörami amonita runakunata, moabita runakunata y Seir jallqakunacho taq runakunata Tayta Dios pantakätsirqan kikinkunapura wanutsinakuyänanpä. 23 Tsaymi Seir jallqakunapita aywaq runakunapa contran shärir amonita runakuna y moabita runakuna chipyaq wanutsiyarqan. Nirkurmi kikinkunapura atacanakur wanutsinakuyarqan.
24 Judá runakuna rikachakuna törriman charmi rikayarqan contrankunapa ayankuna tsunyaq jirkacho jitaraykaqta. Manami ni jukllayllapis kawaykar quëdayarqantsu. 25 Josafatnami llapan runakunawan aywayarqan contrankunapa imaykankunatapis qoriyämunanpä. Chaykurmi tariyarqan atska uywakunata, armakunata, latsapakunata y chanin cuestaq alhäjakunata. Llapan tariyanqantami kikinkunapä qorikuyarqan. Imaykapis atska kaptinmi kimsa junaqtarä qoriyta ushayarqan.
26 Tsaypita chusku kaq junaqchömi juk pampaman qorikar Tayta Diosta alabayarqan. Tsay pampatami jutitsiyarqan Beracaa jutin kananpä. Kananyaqpis tsay jutillami kaykan. 27 Contrankunapita Tayta Dios salvashqa kaptinmi Jerusaléncho y Judácho taq runakunata pushakurkur Jerusalénman rey Josafat kushishqa kutikurqan. 28 Jerusalénman chaykurmi salteriukunata, arpakunata y cornëtakunata tukaraykar Tayta Diospa templunman aywayarqan.
29 Israel runakunapa contrankunawan Tayta Dios pelyanqanta musyaskirmi maytsay nacionkunacho taq runakuna pasaypa mantsariyarqan. 30 Ñöpancho kaq nación runakunawan alli kawayänanpä Tayta Dios yanapaptinmi rey Josafat mandanqan nacioncho añaw kawayarqan.
Rey Josafat wakin ruranqankuna
31 Josafat kimsa chunka pitsqa (35) watayuq kaykarmi Judá nacioncho rey kayta qallaykurqan. Payqa ishkay chunka pitsqa (25) watami Jerusalénpita mandarqan. Mamanmi Silhipa tsurin Azuba karqan.
32 Josafatqa taytan Asanöllami Tayta Dios munanqannö kawarqan. 33 Tsaynö kaptinpis Judácho taq runakunaqa unay castankuna yärakuyanqan Tayta Diosta mana cäsukurmi markakunacho kaq altarkunata juchutsiyarqantsu.
34 Josafat ruranqankunaqa qallaykunanpita ushananyaq qellqaraykan Jehúpa tsurin Hanani qellqanqanchömi. Tsay qellqanqanqa kaykan Israel reykunapa acta librunchömi.
35 Guërracho vincinqanpita qepatanami Judá nacionpa mandaqnin rey Josafat Israel nacionpa mandaqnin rey Ocozíaswan yanapanakuyänanpä willanakuyarqan. Ocozíasqa pasaypa jutsa ruraq runami karqan. 36 Paywan Josafat willanakurmi Tarsisman aywayänanpä büquikunata Ezión-gebercho ruratsiyarqan. 37 Maresa runa Dodavapa tsurin Eliezermi Tayta Dios ninqanta willar Josafatta nirqan: “Yanapanakuyänaykipä Ocozíaswan willanakuyanqaykipitami büqui ruratsiyanqaykita Tayta Dios ushakätsinqa”.
Ninqannöllami büquinkuna pakir ushakaptin Tarsismanpis aywayarqannatsu.