Profëta Jehú Josafatta ollqutupanqan
19
Judá nacionpa mandaqnin rey Josafat Jerusaléncho kaykaq palaciunman yamaylla guërrapita kutiykaptinmi 2 Hananipa tsurin profëta Jehú tinkupaykur nirqan: “¡Imanirtä mana alli runata yanapar pelyaq aywashqayki! ¡Imanirtä Tayta Diospa contran runakunapa amïgun kaykanki! Tsaynö ruranqaykipitami Tayta Dios pasaypa ajanashqa kaykan. 3 Imanö kaptinpis Asera diösapä jawiyanqan raku qerukunata kay nacioncho ushakätsinqaykiqa allimi kaykan. Tayta Diosman yärakur payta ashinqaykipis allimi kaykan”.Juezkunata Josafat churanqan
4 Josafatqa Jerusaléncho tarpis Beersebapita qallaykurmi Efraín jallqakunayaq markan markan purirqan runakunata yachatsiraykar. Yachatsirmi runakunata parlaparqan unay castankuna yärakuyanqan Tayta Diosta cäsukuyänanpä.
5 Tsaynöllami Judá nacioncho jinchi murallashqa cada markakunaman juezkunata Josafat churarqan. 6 Tsay juezkunatami nirqan: “Shumaq tantiyaykur pitapis juzgayay. Manami runakunatsu juez kayänaykipä churayäshushqayki, sinöqa Tayta Diosmi. Paymi yanapayäshunki munanqannö arreglayänaykipä. 7 Payqa ajananmi pitapis penqakuyman churayaptiki, mayqanpapis janan shäriyaptiki y chaskipakuyaptiki. Tsaynö kaykaptinqa pïmaypis quejakuq shamuptin Tayta Diosnintsikpita mantsapakur shumaq arreglayay”.†
8 Tsaynöllami Jerusalénchöpis juezkunata Josafat churarqan Tayta Diospa leyninta cumplitsiyänanpä y runakuna demandakuyanqanta arreglayänanpä. Tsay churanqan juezkunami kayarqan sacerdötikuna, levitakuna y Israel castakunapa mandaqnin runakunapis. 9 Paykunata yätsirmi nirqan: “Qamkunaqa Tayta Diospita mantsapakur llapan demandukunata pay munanqannö mana chaskipakuypa arreglayay. 10 May markapitapis qamkunaman demandakuq shamuptin mana cäsukuqkunata yätsiyanki Tayta Diosta cäsukuyänanpä. Tsaynö yätsiyanki runa mayinta wanutsishqa kayaptinpis o Tayta Diospa mayqan leyninkunata o mandamientunkunata mana cäsukuyaptinpis. Tsaynö yätsiyaptikimi Tayta Dios ajananqanatsu qamkunawan ni paykunawanpis. Tsaynö rurarqa manami jutsayuqtsu kayanki.
11 “Qamkuna arreglayanqaykita pipis mana cäsukuptinqa mas munayyuq autoridämi kaykan paykunata arreglananpä. Ley religiösataa mana cäsukuqkunataqa mandaq sacerdöti Amaríasmi arreglanqa. Ley civiltab mana cäsukuqkunataqa Ismaelpa tsurin Zebadíasmi arreglanqa. Zebadíasqa Judá trïbu mandaq runami kaykan. Mana qelanaypa runakunata shumaq atiendiyanki. Tayta Diosmi yanapanqa pay munanqannö juzgaq kaqtaqa”.