2 Reyta yanapaq runanami profëta Eliseuta nirqan: “Ciëlu punkuta kichaskir bendicionninta Tayta Dios kachamuptinpis ¡tsaynöqa manachi kanmantsu!”

Tsaynö niptinmi Eliseo nirqan: “Ninqäta mana criyinqaykipitami rikarpis mikunkitsu”.

3 Tsay tardimi leprawan qeshyaykaq chusku runakuna marka yaykuna punkucho jamaraykäyarqan. Paykunami parlar niyarqan: “Janantsikchöna wanuy kaykaptinqa ¿imatatä kanan rurashun? 4 Markacho pasaypa muchuy kaykaptinqa tsayman yaykur wanushunchi. Y kayllacho jamararpis wanushunchi. Imanö kaptinpis Siria soldädukunapa campamentunman yaykushun. Mana wanutsimashqaqa kawashunchi. Wanutsimashqaqa jina wanutsishqachi kashun”.

5 Tsaynö willanakuskirmi patsa tsakanaykaptin Siria soldädukunapa campamentunman aywayarqan. Tsayman chäyänanpäqa manami pipis kanätsu. 6 Manarä chäyaptinmi Siria soldädukunata Tayta Dios wiyapakatsirqan carrëtakunawan cawallukunawan tsaytsika soldädukuna atacayänanpä yaykuykaqta. Tsaynö wiyapakurmi Siria soldädukuna yarpäyarqan heteo soldädukunata y Egipto soldädukunata Israel nacionpa mandaqnin rey yanapayänanpä minkakuptin yaykuykäyanqanta. 7 Tsaymi toldunkunata, cawallunkunata y ashnunkunata jaqiriykur wanuyta mantsar tsay tsakay qeshpir aywakuyarqan.

8 Leprösukunanami campamentuman chaykur juk tolduman yaykur tariyanqan kaqta mikuyarqan y upuyarqan. Tsaynöllami qellaytapis, qoritapis latsapatapis tariyanqan kaqta jukläman apaykur pakayarqan. Tsaynöllami kutiykur juk toldumanna yaykuskir jukaq toldupita apayanqannölla apakuyarqan. 9 Tsaynö apaykäyanqanchömi yarpachakuskir ninakuyarqan: “Kikillantsikpä aparqa llutantami ruraykantsik. Campamentucho pipis mana kanqanta juklla willakushun. Warayyaq mana willakurqa jutsayuqmi rikakushun. Kanan juklla reyta musyatsishun campamentucho pipis mana kanqanta”.

10 Willanakuyanqannö aywarmi marka punku täpaq runakunata qayaykur willar niyarqan: “¡Siria soldädukunapa campamentuncho manami pipis kantsu! ¡Cawallunkuna y ashnunkunallami wataraykäyan! ¡Toldunkunapis shäritsiyanqannöllami kaykan!”

11 Paykuna willakuyanqanta punku täpaq runakuna willakuskiptinnami palaciucho kaykaq runakunapis musyayarqan.

12 Tsayta musyaskirmi punuykanqanpita shäriskir capitanninkunata rey nirqan: “Siria soldädukunaqa pasaypa mallaqaypita wanunaykanqantsikta musyarmi campamentunkunapita jukläman pakakuyashqa kanqa. Yarqushqaqa tsariykamarnintsikmi markantsikman yaykayämunqa”.

13 Juk capitannami nirqan: “Rikapakayämunanpä pitsqaq runakunata kachashun. Paykuna aywayätsun quëdaq kaq pitsqa cawalluntsikkunata muntakurkur. Llapantsik wanunantsikpäna kaykaptinqa rikapakuqkunata Siria soldädukuna wanutsiyaptinpis imanäshunnatä”.

14 Tsaynö willanakuskirmi runakunata rey kacharqan cawallu qarachanqan ishkay carrëtakunawan rikapakuq aywayänanpä. 15 Tsay rikapakuq aywaqkunaqa Jordán mayuyaq aywaykurmi shumaq rikapakayämurqan. Tsaymi Siria soldädukuna qeshpir latsapakunata y imatapis jaqiyanqanta nänicho tariyarqan. Tsaypita kutiykurmi reyta willayarqan llapan rikayanqanta. 16 Tsaymi Samaria markapita runakuna aywaykur Siria soldädukunapa campamentunpita imaykatapis tariyanqan kaqta apakuyarqan. Tayta Dios ninqannöllami qanchis kïlu jarinata y chunka pitsqa kïlu cebäda jarinatapis rantikuyarqan juk qellayllacho.

17 Runakuna markapita yarqur campamentuman aywayaptinmi mas yärakunqan runata rey churarqan marka punkuta cuidananpä. Markapita tanqanakurrä yarqurmi tsaycho ichiraykaq runata tanqarnin lanqur ushayarqan. Tsaynö päsananpämi wayinman rey aywaykaptin profëta Eliseo nirqan. 18 Reytami profëta Eliseo nishqa karqan: “Waray junaq kaynö hörami Samaria marka punkucho qanchis kïlu trïgu jarinata y chunka pitsqa kïlu cebäda jarinata juk qellayllacho rantikuyanqa”.^†

19 Tsaytsika mikuy kananpä niptinmi wanuq capitán nishqa karqan: “Ciëlu punkuta kichaskir bendicionninta Tayta Dios kachamuptinpis ¡tsaynöqa manachi kanmantsu!”

Tsaynö niptinmi Eliseo nirqan: “Ninqäta mana criyinqaykipitami rikarpis mikunkitsu”.^†

20 Eliseo ninqannöllami marka punkucho runakuna jaruptin tsay runa wanurqan.