Yakupita jächa aynamunqan
6
Juk kutimi profëta mayinkuna Eliseuta niyarqan: “Taytay, kay taykanqantsik sitiuqa pasaypa kichkimi. 2 Jordán mayu kuchunman aywaykur qeruta mutuyämushä wayita tsaycho ruraskir tänantsikpä”.Tsaynö niptinmi Eliseo nirqan: “Aywayay ari”.
3 Eliseutanami juk profëta nirqan: “Taytay, qamwanpis aywashun”.
Tsaynö niptinmi Eliseo nirqan: “Aywashun ari”.
4 Paykunawan Eliseo aywarmi Jordán mayuman chaykur qeruta mutuyarqan. 5 Juk profëta qeruta mutuykaptinmi jächan jipikaskir mayuman unyaskirqan. Tsaymi nirqan: “¡Taytay, kayrächi kayllaqa! ¡Kay jächaqa mañakuyllami kashqa!”
6 Eliseunami tapurqan: “¿Mayninmantä unyashqa?”
Tsaynö tapuptinmi rikatsirqan mayninman unyanqantapis. Tsaymi takshalla qeruta mutuskir jächa unyanqan kaqpa jitaykuptin jächa aynarkamurqan. 7 Tsaymi Eliseo nirqan: “Juklla tsariy”.
Tsaynö niptinmi llamkaykur jächata jipiskamurqan.
Siria nación soldädukunapa ñawinkunata pantakätsinqan
8 Siria nacionpa mandaqnin reyqa Israel nacionwan guërracho karmi soldädunkunapa capitanninkunawan willanakuyarqan mayqan partichöpis campamentunta rurayänanpä. 9 Tsayta musyaykurmi profëta Eliseuqa Israel nacionpa mandaqnin reyta willakatsir nirqan: “Siria soldädukunami tsayman shamuykäyan. Tsaypaqa ama päsayaytsu”.
10 Profëta Eliseo kutin kutin tsaynö willaptinmi Israel nacionpa mandaqnin reyqa ñöpancho markakunaman soldädunkunata kacharqan Siria soldädukuna mana yaykuyänanpä. Tsaynöpami atska kuti Israel runakuna salvakuyarqan.
11 Tsaynö päsaptinmi Siria nacionpa mandaqnin rey pasaypa ajanar capitanninkunata qayaykur nirqan: “¿Mayqaykikunatä maypa atacanantsikpä willanakunqantsikta Israel nacionpa mandaqnin reyta willaykäyanki?”
12 Tsaynö niptinmi juk capitán nirqan: “Taytay, noqakunaqa manami pitapis willayashqätsu. Israelcho kaykaq profëta Eliseumi cuartuykicho pakayllapa ninqaykitapis mandaqnin reyta willan”.
13 Tsaynö niptinmi nirqan: “Tsay runa maycho kanqantapis musyayämuy prësu tsaritsimunäpä”.
Tsaynö niptinmi Dotán markacho profëta Eliseo kaykanqanta willayarqan.
14 Tsaymi cawallunkunawan y carrëtankunawan atska soldädunkuna paqaspa aywarnin Eliseo tanqan Dotán markaman chaykur jiruruypa tsapaskiyarqan. 15 Patsa waraskiptinmi Eliseupa wätaynin waqtapa yarqunqancho rikarqan atska soldädukuna cawallun muntashqa y carrëtankunawan markata tumaypa jiruruparaykäyaqta.
Tsaymi Eliseuta nirqan: “¡Taytay, imanötä kaykullantsik! ¡Kanan imatatä rurashun!”
16 Eliseunami nirqan: “Ama mantsariytsu. Tayta Dios kachamunqan angelkunaqa paykunapa soldädunkunapita mas atskami kaykäyan”.
17 Tsaynö niskirmi Tayta Diosta mañakur Eliseo nirqan: “Tayta Dios, wätaynïta yanapaykullay kachamunqayki angelkunata rikananpä”.
Tsaynö mañakuptinmi Eliseupa wätayninta Tayta Dios rikatsirqan tsaytsika angelkunata. Tsay angelkunami cawallunkunawan y ninanö atsikyaykaq carrëtankunawan Eliseuta tsapäyänanpä jirkancho kaykäyänä.
18 Siria soldädukuna prësu tsariyänanpä aywayaptinmi Eliseuqa Tayta Diosta mañakur nirqan: “Tayta Dios, kay soldädukunata qaprayaykatsillay”.
Tsaynö nir mañakuptinmi jinan höra soldädukunata Tayta Dios qaprayätsirqan. 19 Tsaymi tsay soldädukunata Eliseo nirqan: “Qamkunaqa llutan nänipami shayämushqayki. Ashiykäyanqayki runa manami kay markachötsu. Aku pay kaqman pushayäshayki”.
Tsaynö nirmi Samaria markaman pusharqan. 20 Samaria markaman chaykatsirnami Tayta Diosta mañakur nirqan: “Tayta Dios, kay soldädukuna rikayänanpä ñawinkunata alliyaykatsillay”.
Tsaymi ñawinkunata Tayta Dios alliyätsiptin tsay soldädukuna tantiyaskiyarqan Samaria pläzacho kaykäyanqanta.
21 Pläzacho Eliseo kaykätsiqta rikaykurmi Israel nacionpa mandaqnin reyqa Eliseuta tapurqan: “Taytay, kay soldädukunata ¿jukllaku wanutsishä?”
22 Tsaynö niptinmi Eliseo nirqan: “Ama wanutsiytsu. Manami imaypis guërracho tsarinqantsik prësukunata wanutsintsiktsu. Wanutsinaykipa trokinqa mikuytapis yakutapis qaraykur mandaqnin rey kaqman kutikuyänanpä despachay”.
23 Tsaynö niptinmi alli allita kusinaskatsir qararqan. Mikur upur ushaskiyaptinnami mandaqnin reyman kutikuyänanpä despacharqan. Tsaypitaqa Israel nacionta Siria nación runakuna mananami atacayarqannatsu.
Samariacho muchuy kanqan
24 Tsaypita juk ishkay wata päsaskiptinnami Siria nacionpa mandaqnin rey Ben-adad llapan soldädunkunawan qorikaskir Samaria markata atacayänanpä aywayarqan. Chaykurmi soldädunkunawan tumaypa tsapaskiyarqan. 25 Tsaymi Samaria markacho pasaypa muchuy kaptin ashnupa umanta rantikuyarqan puwaq chunka (80) qellaycho. Tsaynöllami palumapa wänunta juk pucilluwan tupuskir rantikuyarqan pitsqa qellaycho.
26 Juk junaqmi Israel nacionpa mandaqnin rey murälla jananpa puriykaqta rikaykur juk warmi qayakur nirqan: “Taytay, yanapaykallämay”.
27 Tsaynö qayaptinmi rey nirqan: “Manami trïgüpis ni vïnüpis qaranäpä kantsu. Tayta Dios mana yanapashuptikiqa ¿imanöpatä noqa yanapaman?”
28 Tsaypita mastami nirqan: “¿Imachötä yanapaman?”
Tsaynö niptinmi nirqan: “Kay warmiwanmi willanakuyarqä wamräkunata mikuyänäpä. Tsaymi nimarqan noqapa wamräta puntata mikuyänäpä nirkur paypa wamrantana mikuyänäpä. 29 Tsaynö nimaptinmi wamräta mikuyashqä.† Waraynin junaq paypa wamrantana mikuyänäpä willanakushqa kaykäyaptïmi payqa wamranta pakashqa”.
30 Warmi tsaynö ninqanta wiyarmi reyqa pasaypa llakikur latsapanta rachirqan. Murälla jananpa puriptinmi runakuna rikayarqan latsapan rurincho qachqa latsapan jatishqa kaykanqanta. 31 Puriykanqanchömi jinchi nirqan: “¡Tayta Dios castigamätsun Safatpa tsurin Eliseupa umanta kanan junaq mana roqutsiptïqa!”
32 Tsaynö nirmi Eliseuta wanutsinanpä juk runata kacharqan.
Tsayyaqmi Israel mayor runakunawan Eliseo wayincho jamaraykäyarqan. Rey kachanqan runa Eliseupa wayinman manarä chaptinmi Eliseo nirqan: “Mandamaqnintsik rey wanutsikuq karmi wanutsimänanpä runata kachaykämun. Maya mayalla kaykäyay. Tsay runa chaykämuqta rikar punkuta jinchi trancayanki. Paypa qepantanami patronninpis shamuykan”.
33 Tsaynö parlaykäyaptinmi rey kachanqan runa Eliseupa wayinman chaykur nirqan: “Tsayläya desgraciaman Tayta Diosmi jitarpamashqantsik. Tsaynö kaykaptinqa ¿imapänatä payman yärakushunpis?”