2 Juk kutichömi Siria nación soldädukuna Israel runakunata atacar vinciyarqan. Tsaypitami juk jipashta Naamán aparqan warminpa wätaynin kananpä. 3 Tsay jipashmi patrönanta nirqan: “Samariacho kaykaq profëtaman patronnï aywar rugakuptinqa lepra qeshyanpita alliyätsinmanmi”.

4 Tsaymi Naamánqa reyman aywaykur jipash ninqanta willarqan. 5 Willaptinmi rey nirqan: “Tsaynö kaptinqa juklla ayway. Chaptiki jampishunaykipä Israel nacionpa mandaqnin reyman cartata apanaykipä qellqashä”.

Tsaymi qarayta apananpä kamarikurqan kimsa chunka waranqa (30,000) yuraq qellayta, soqta waranqa (6,000) qori qellayta y chunka tünicakunatapis. Tsayta apakurkurmi Israel nacionman aywarqan. 6 Chaykurnami apanqan cartata Israel nacionpa mandaqnin reyta entregarqan. Tsay cartachömi nirqan: “Kay cartata cartakaykämü soldädükunapa capitannin Naamánta leprawan qeshyanqanpita alliyaykatsinaykipämi”.

7 Entreganqan cartata liyiskirmi Israel nacionpa mandaqnin reyqa pasaypa mantsarir latsapanta rachir yanapaqninkunata nirqan: “Noqaqa manami Tayta Diostsu kä runata kawatsinäpä o wanutsinäpä. ¿Imanirtä tsay reyqa leprawan qeshyaykaq runata alliyätsinäpä kachamushqa? ¡Shumaq tantiyakushun! ¡Niq tumpallami ëllu wajupaykämantsik!”

8 Tsaynö pasaypa mantsarir latsapanta rachinqanta musyaskirmi Eliseuqa kachakurqan ninanpä: “¿Imanirtäshi alläpa mantsarinki? Eliseumanshi tsay runata kachanki Israel nacioncho Tayta Diospa profëtan kanqanta musyananpä”.

9 Tsaynö willatsiptinmi Naamánqa carrëtanwan y cawallunkunawan aywaykur Eliseupa wayi punkunman ichiskirqan. 10 Tsaynami chaskiq yarqunanpa trokin wätayninwan Eliseo willatsir nirqan: “Jordán mayuman aywaykurshi qanchis kuti bäñakunki. Tsaynö bäñakuskirqa lepra qeshyawan qeshyanqaykipita alliyankishi”.

11 Tsaynö niptinmi Naamánqa pasaypa ajayanashqa aywar nirqan: “Noqaqa yarparqä shumaq chaskimar Tayta Diosninta mañakurnin leprä jananpa makinta kuyutsirnin alliyätsimänanpä kanqantami. 12 Damascuchöpis Abana y Farfar mayukuna kaykanmi. Tsay mayukunaqa Israelcho llapan mayukunapitapis mas allimi kaykan. Mayucho bäñakunqalläwan alliyänä kaptinqa Damascuman kutikushun tsaycho bäñakunäpä”.

Tsaynö nirmi pasaypa ajanashqa aywakurqan.

13 Tsaynö ajanashqa aywaykaptinmi wätayninkuna niyarqan: “Alliyänaykipä mayjina aja kaqta ruranaykipä profëta nishuptikipis ¿manatsurä rurankiman karqan? Taytay, Jordán mayullacho bäñakunaykipä nikäshuptikiqa bäñakuy”.

14 Tsaynö niyaptinmi Naamánqa Jordán mayuman aywaykur profëta ninqannölla qanchis kuti tullpukar bäñakurqan. Tsaynö tullpukaptinmi pishi wamrapa qarannö llapan cuerpun sänu rikakurqan.

15 Tsaymi llapan wallkiqninkunawan Eliseo kaqman kutiykur nirqan: “Kananmi itsanqa musyä Israel runakuna adorayanqan Tayta Dioslla kay patsacho Dios kanqanta. Taytay, qaranäpä apamunqäkunata chaskiykallämay”.

16 Tsaynö niptinmi Eliseo nirqan: “Sirvinqä Tayta Diospa jutinchömi nï: Manami ima pägutapis chaskïmantsu”.

Tsaynö nirmi Naamán mayjina rugakuptinpis qaray apanqanta Eliseo chaskirqantsu.

17 Mana chaskiptinmi Naamán nirqan: “Taytay, tsaynö kaptinqa ishkay muläkunawan kaypita allpata apakulläshä. Kananpitaqa mananami imaypis juk dioskunapä rupatsina sacrificiukunata ni wakin sacrificiukunatapis rupatsishänatsu. Tsaypa trokinqa Tayta Diosllatanami adorashä. 18 Itsanqa markäman kutiptï Rimón diospa templunmanmi rey pushamanqa. Tsaycho rikräpita tsarikuykur qonqurpakuptin noqapis qonqurikuptï Tayta Dios perdonaykallämätsun”.

19 Tsaynö niptinmi Eliseo nirqan: “Tsaypita llakikunaykipa trokinqa añaw kutikuy”.

Tsaynö kutikur karutana aywaykaptinmi 20 profëta Eliseupa wätaynin Giezi yarpachakur nirqan: “Naamán apamunqanta mana chaskir patronnï perdishqami. Kanan qepankunata aywar capazchi imallatapis tarimüman”.

21 Tsaynö nirmi Gieziqa Naamánpa qepanta aywarqan. Qepankunata cörriykaqta rikaykurmi Naamánqa carrëtanpita yarpuskir Giezita shuyararqan. Chaykuptinmi tapurqan: “¿Imatä kashqa shamunaykipä?”

22 Tsaynö niptinmi nirqan: “Taytay, llapanpis allimi kaykan. Efraín jallqakunapitami ishkay chölu profëtakuna chäyämushqa. Paykunapämi patronnï munan kimsa waranqa (3,000) qellayta y ishkay trukana latsapakunata”.

23 Tsaynö niptinmi Naamán nirqan: “¡Aw, allimi kanman! Tsayllata apanaykipa trokinqa soqta waranqa qellayta (6,000) apay”.

Tsaynö nirmi ishkay bolsakunaman qellayta y ishkay trukana latsapata wiñaparqan. Nirkurmi ishkay wätayninkunata kacharqan yanapar aywayänanpä. 24 Eliseo tanqan jirkanman chaykurnami ishkay yanapar aywaqkunata kutikuyänanpä Giezi nirqan. Tsaypitanami apayanqankunata wayinman churarqan.

25 Tsaypita aywar Eliseo kaqman yaykuskiptinmi Eliseo tapurqan: “¿Maypitatä kutiykämunki?”

Giezinami nirqan: “Manami maypapis aywashqätsu”.

26 Eliseunami nirqan: “Tsay runa chaskishunaykipä carrëtanpita yarpunqan hörami espïritü tsaycho kaykarqan. Manami qellayta, latsapata, chakrata, üshata, wäkata ni wätaykunata chaskiy höratsu kaykan. 27 Tsaynö ruranqaykipitami Naamánpa lepran shukushunki. Tsay leprawanmi qampita aywaraqkuna imayyaqpis qeshyayanqa”.

Ninqannöllami Eliseupa ñöpanpita yarquskiptin Giezipa qaran rashtanörä leprawan yuraqaskirqan.