3 Mandayta qallaykunqan witsanmi Uzíasqa chunka soqta watayuq kaykarqan. Payqa pitsqa chunka ishkay (52) watami Jerusalénpita mandarqan. Mamannami Jerusalénpita Jecolías karqan.

4 Uzíasqa taytan Amasíasnömi Tayta Dios munanqannö kawarqan. 5 Tayta Diosman yärakur kawananpämi Uzíasta Zacarías yätsirqan. Zacarías kawanqanyaqqa Tayta Dios munanqannömi Uzías kawarqan. Tsaynö kawaptinmi llapanchöpis Tayta Dios yanaparqan.

6 Tayta Dios yanapaptinmi Filistea nacioncho kaykaq Gat markata, Jabnia markata y Asdod markata soldädunkunawan vincir murällankunatapis juchutsir ushayarqan. Tsaynö vincirmi filisteo runakuna täyanqan Asdod particho juk markakunatana shäritsirqan. 7 Filisteo runakunata vincinanpä yanapanqannöllami Gur-baalcho taq Arabia runakunata y meunita runakunatapis vincinanpä Tayta Dios yanaparqan. 8 Tsaynöllami amonita runakunapis impuestuta Uzíasta pägayarqan. Uzías munayyuq kanqanqa Egipto nacionpa lindërunyaqmi musyakarqan.

9 Tsaynöllami marka täpaqkuna rikachakuyänanpäpis Jerusaléncho törrikunata Uzías ruratsirqan. Tsay törrikuna karqan Esquïna punku janancho, Raqra punku janancho y esquïna tumarkuna janancho. Tsay törrikunataqa shumaqmi siguratsirqan tsaypita washäkuyänanpä. 10 Tsaynöllami tsunyaq jirkakunachöpis rikachakuna törrikunata ruratsirqan.

Tsaypitanami Sefelachöpis y pampakunachöpis uywankuna atska kaptin yakutsiyänanpä pözukunatapis uchkutsirqan. Uzíastaqa alläpami gustarqan chakracho aruy. Tsaymi üva chakrankunacho y wakin chakrankunachöpis aruyänanpä aruqninkuna atska karqan. Chakrankunaqa jirkankunachöpis y pampakunachöpis karqanmi.

11 Uzíaspa soldädunkunapis atskaqmi kayarqan. Paykunapa capitanninmi Uzíaspa yanapaqnin Hananías karqan. Cada soldädupa jutintami reypa secretariun Jehiel y yanapaqnin Maasías juk listaman qellqayarqan. Tsay soldädukunami según lista grüpu grüpu guërraman aywayaq. 12 Tsay soldädukunapa capitanninkunami kayarqan ishkay waranqa soqta pachak (2,600) castakunapa mandaqninkuna. Paykunaqa pelyayta yachaq alli chölukunami kayarqan.

13 Tsay capitankunapa munayninchömi kayarqan kimsa pachak qanchis waranqa pitsqa pachak (307,500) soldädukuna. Paykunami reypa contrankunawan pelyayaq. 14 Tsay soldädukunatami Uzías kamariparqan escüduta, lanzata, cascuta, bronci chalëcuta, flëchakunata y warakata.

15 Jerusalénchömi yachaq runakunawan Uzías ruratsirqan washäkuyänanpä tukuy niraq mäquinakunata. Tsaykunatami churatsirqan törrikunaman y marka murälla jananmanpis. Tsay mäquinakunawanmi jatusaq rumikunata y flëchakunata jitatsiyaq. Tayta Dios yanapaptinmi rey Uzías munayyuq kanqan maytsaychöpis musyakarqan.

16 Munayyuq karmi rey Uzíasqa runa tukurqan. Juk junaqmi mana cäsukuypa Tayta Diospa templunman yaykurqan inciensiuwan altarcho qoshnitsinanpä. 17 Tsayman yaykuptinmi qepanta sacerdöti Azarías yaykurqan puwaq chunka (80) alli chölu sacerdöti mayinkunawan. 18 Paykunami reyta niyarqan: “Tayta Uzías, Tayta Diospä inciensiuwan qoshnitsinaykipäqa manami qamtatsu churashushqayki. Tsayta rurayänanpäqa Aarónpita aywaraq sacerdötikunallatami Tayta Dios churashqa.^† Inciensiuwan templucho qoshnitsirqa jutsatami rurashqayki. Tsaynö ruranqaykipita Tayta Dios manami yanapashunkitsu. Kaypita ras yarquy”.

19 Tsaynö michäyaptinmi inciensiu qoshnitsikunan aptashqana kar Uzías pasaypa ajanarqan. Tsaymi sacerdötikuna rikaykaptin reypa urkuncho jinan höra lepra yuriskirqan. Tsaynö päsarqan templu rurincho inciensiuwan qoshnitsikuna altar ñöpancho ichiraykaptinmi. 20 Rey Uzíaspa urkuncho lepra kaykanqanta rikaykurmi sacerdöti mayinkunawan mandaq sacerdöti Azaríasqa jinan höra templu rurinpita jipiyämurqan. Tayta Dios castiganqanta tantiyaskirmi kikillanna yarqukurqan.

21 Wanunqanyaqmi rey Uzíasqa lepra qeshyawan qeshyarqan. Tsaynö qeshyarmi palaciupita juklächöna tarqan. Tayta Diospa templun patiuman yaykunantapis manami munayarqannatsu. Tsaymi tsurin Jotamna paypa trokin nacionta mandarqan.

22 Uzías ruranqankunataqa qallaykunanpita ushananyaqmi Amozpa tsurin profëta Isaías qellqarqan. 23 Uzías wanuskiptinnami unay castankuna pamparäyanqanman pampayarqan. Lepra qeshyawan wanushqa kaptinmi reykuna pamparäyanqan panteón ñöpallanman pampayarqan. Paypa trokinnami tsurin Jotamna rey karqan.