Judá nacioncho Ezequías rey kanqan
29
Mandayta qallaykunqan witsanmi Ezequías ishkay chunka pitsqa (25) watayuq kaykarqan. Payqa ishkay chunka isqun (29) watami Jerusalénpita mandarqan. Mamanmi karqan Zacaríaspa tsurin Abías. 2 Tayta Diosta cäsukur unay castan David kawanqannömi Ezequíaspis kawarqan.3 Paymi mandaq kayman yaykur punta kaq watacho y punta kaq killacho Tayta Diospa templun patiuman yaykuna punkukunata kichaskatsir allitsatsirqan. 4 Tsaypitanami sacerdötikunata y levitakunata qayatsirqan rupay yarqamunan kaqlä patiuman. 5 Paykuna qorikaskiyaptinnami nirqan: “Levitakuna, purificakuyänaykipä llapaykikuna bäñakuyay. Nirkur unay castantsikkuna yärakuyanqan Tayta Diospa templuntapis purificayay. Tsaycho tariyanqayki impüru kaqkunata waqtaman jitariyay.a
6 “Tayta Diosnintsikta mana cäsukurmi castantsikkuna jutsasapa rikakuyashqa. Tsaynö karmi Tayta Diosta manana adorar tanqan templutapis manakaqman churayashqa. 7 Templu patiupa punkunkunatapis wichqatsiyashqami. Templu rurincho tsariykaq lamparakunatapis upitsiyashqami. Inciensiuwanpis manami qoshnitsiyashqanatsu. Rupatsina kaq sacrificiutapis kuyamaqnintsik Tayta Diospä manami rupatsiyashqanatsu. 8 Tsaynö kayanqanpitami Tayta Dios pasaypa ajanar Jerusaléncho taqkunata y Judácho kaykaq wakin markakunacho taqkunatapis castigarqan. Tsaymi pasaypa mantsakashqa, turbashqa y penqakuyman churashqa kawayarqan. Tsaynö kanqantaqa kikintsikmi musyantsik. 9 Mana cäsukuq kayanqanpitami wakin castantsikkunapis guërracho wanuyashqa. Wakin warmi tsurinkunata, ollqu tsurinkunata y warminkunatapis prësumi apakuyashqa.
10 “Tsaymi yarpachakushqä kuyamaqnintsik Tayta Dioswan pactuta ruranantsikpä. Tsaynöpami ajanaynin qallquptin castigamäshunnatsu. 11 Taytakuna, mana qelanaypa Tayta Diosta templuncho yapay sirviyay. Qamkunatami akrayäshushqayki templuncho sirviyänaykipä, adorayänaykipä y inciensiuwan qoshnitsiyänaykipä”.
12 Tsaynö niptinmi levitakuna juklla awniyarqan. Tsay runakunami kayarqan:
Amasaipa tsurin Mahat,
Azaríaspa tsurin Joel (Mahatwan Joel kayarqan Coat castami),
Abdipa tsurin Cis,
Jehalelelpa tsurin Azarías (Ciswan Azarías kayarqan Merari castami),
Zimapa tsurin Joa,
Joapa tsurin Edén (Joawan Edén kayarqan Gersón castami),
13 Simri,
Jehiel (Simriwan Jehiel kayarqan Elizafán castami),
Zacarías,
Matanías (Zacaríaswan Matanías kayarqan Asaf castami),
14 Jehiel,
Simei (Jehielwan Simei kayarqan Hemán castami),
Semaías y
Uziel (Semaíaswan Uziel Jedutún castami kayarqan).
15 Paykunami castankunawan qorikaykur bäñakur purificakuyarqan. Tsaypitanami templupa patiunman yaykuskir tsaycho kaqkunata purificayarqan. Llapantapis rurayarqan Tayta Diospa mandamientuncho qellqaraykanqannö y rey ninqannömi.
16 Tsaypitanami Tayta Diospa templunman sacerdötikunapis yaykuskir purificayarqan. Tsaycho imatapis impüru kaqkunata patiuman jipiskayämuptinmi levitakuna Cedrón raqraman apayarqan. 17 Tayta Diospa templunta purificar qallaykuyarqan wata qallaykunan punta kaq junaqchömi. Tsaypita puwaq junaqmi templupa patiunta purificayta ushayarqan. Tsaypita puwaq junaq mastami templu rurintapis purificayta ushayarqan. Tsaynöpami llapanta purificar chunka soqta junaqta ushayarqan.
18 Tsaypitanami palaciunman aywaykur rey Ezequíasta levitakuna niyarqan: “Templuta purificayta ushayashqänami. Tsaymi purificayashqä sacrificiuta rupatsina altarta, altarpa manëjunkunata, sagrädu tanta churakuna mësata y mësapa manëjunkunatapis. 19 Tayta Diosta mana cäsukur rey Acaz jitarinqan manëjukunatapis purificaskirmi Tayta Diospa altarnin ñöpanman kutitsiyashqä”.
20 Tsaynö willayaptinmi waraynin tuta tsaka tsakalla marka autoridäkunata rey Ezequías qoriskir paykunawan Tayta Diospa templunman aywayarqan. 21 Aywarmi purificatsina sacrificiupä† apayarqan qanchis torïtukunata, qanchis carnërukunata, qanchis carnishkunata y qanchis chïvukunata. Tsay uywakunata Tayta Diospa altarnincho rupatsiyänanpämi Aarónpita aywaraq sacerdötikunata rey ordenarqan. Tsaykunata rupatsiyarqan rey castakuna y Judá runakuna purificashqa kayänanpämi. Tsaynöllami rupatsiyarqan templu purificashqa kananpäpis.
22 Tsaypitanami torïtukunata pishtarnin yawarninta qoriskir altarpa ñöpankunata sacerdötikuna tsaqtsupäyarqan. Tsaynöllami carnërukunapa y carnishkunapa yawarninwanpis tsaqtsupäyarqan. 23 Tsaypitanami purificatsina sacrificiupä apayämunqan chïvukunata reypa ñöpanman y autoridäkunapa ñöpanman apayarqan. Chïvukunapa umanman makinta churaskiptinmi 24 chïvukunapa kunkanta sacerdötikuna roquyarqan. Nirkurmi purificatsina sacrificiupä tsay uywakunapa yawarninwan altarpa ñöpankunata tsaqtsupäyarqan. Rey ninqannöllami altarcho rupatsiyarqan llapan Israel runakuna jutsata rurayanqanpita perdonashqa kayänanpä.
25 Tsaypitanami rey Ezequíasqa levitakunata churarqan platïllukunata, salteriukunata y arpakunata Tayta Diospa templuncho tukayänanpä. Tsaynö tukayänanpämi rey Davidpa yanapaqnin profëta Gadwan y profëta Natánwan rey Davidta Tayta Dios willakatsirqan.†
26 Levitakunaqa templu patiuchömi ichiraykäyarqan David ruratsinqan instrumentunkuna aptashqa y sacerdötikunanami ichiraykäyarqan cornëtankuna aptashqa. 27 Tsay hörami Ezequías nirqan rupatsina kaq sacrificiuta altarcho rupatsiyänanpä. Rupatsir qallaykuyaptinmi Tayta Diosta alabar qallaykuyarqan y cornëtakunatapis tukar qallaykuyarqan. Tsaynöllami David ruratsinqan instrumentukunatapis tukayarqan.
28 Sacrificiu rupayta ushanqanyaqmi cantaqkuna alabayarqan, cornëtata sacerdötikuna tukayarqan y juntaraykaq llapan runakuna Tayta Diosta adorayarqan. 29 Rupar ushaskiptinmi rey y tsaycho kaykaq llapan runakunapis qonqurikuykur Tayta Diosta adorayarqan. 30 Tsaypitanami rey Ezequías y autoridäkuna levitakunata niyarqan David y Asaf qellqanqan salmukunata cantar Tayta Diosta alabayänanpä. Tsaymi pasaypa kushishqa cantarnin qonqurikuykur adorayarqan.
31 Nirkurnami runakunata rey Ezequías nirqan: “Tayta Diosta sirviyänaykipä awnishqana kaykarqa uywakunata templunman apayämuy rupatsir payta adoranantsikpä. Tsaynölla payta agradëcikur alli päsakuy sacrificiupäpis apayämuy”.
Tsaynö niptinmi runakunaqa Ezequías ninqannölla apayarqan. Wakinkunaqa alli shonqu karmi rupatsina kaq sacrificiukunapäpis apayarqan. 32 Rupatsina kaq sacrificiupä apayanqan uywakunami kayarqan qanchis chunka (70) torïtukuna, juk pachak (100) carnërukuna y ishkay pachak (200) carnishkuna. 33 Tsaycho llapan rupatsiyanqan uywakunami karqan soqta pachak (600) torïtukuna y kimsa waranqa (3,000) üshakuna.
34 Wakin kaq sacerdötikuna mana purificakushqa kayaptinmi purificashqa kaq sacerdötikunaqa wallkaqlla kayarqan uywakunata pishtar sacrificiuta rupatsiyänanpä. Wakin sacerdötikuna mana purificakuyaptinpis levitakunaqa jinan hörami purificakuyarqan. Wakin sacerdötikuna purificakuyanqanyaqmi uywakunata pishtar levitakuna yanapayarqan.
35 Tsaytsika uywakunatami pishtayarqan rupatsina kaq sacrificiuta rupatsiyänanpä. Alli päsakuy sacrificiupä pishtayanqan uywakunapa wiranpis atskami karqan. Tsaynöllami atska vïnupis sacrificiu rupaptin jananman wiñayänanpä karqan.