Pascua fiestata Ezequías ruranqan
30
Tsaypitanami Tayta Diospa templunman qorikaykur Pascua fiestata rurayänanpä† rey Ezequías entëru Israel nacionman y Judá nacionman willakuqkunata kacharqan. Tsaynöllami tsay fiestaman shayämunanpä Efraín trïbu runakunaman y Manasés trïbu runakunamanpis cartakurqan. Tsay fiestaqa Israel runakunata kuyaq Tayta Diosta adorayänanpämi karqan.2 Autoridäninkunawan y Jerusaléncho taq runakunawanmi rey willanakuyarqan ishkay kaq killacho Pascua fiestata rurayänanpä. 3 Wakin sacerdötikuna manarä purificakushqa kayaptin y wakin runakuna Jerusalénman manarä qorikashqa kayaptinmi diyanchöqa Pascua fiestata rurayarqantsu.a
4 Qepallatapis Pascua fiestata rurayänanpä willanakurmi rey y llapan runakunapis kushikuyarqan. 5 Tsaypitanami Israel runakunata kuyaq Tayta Diosta adorar Pascua fiestata rurayänanpä willakatsirqan Beersebapita qallaykur hasta Danyaq. Pascua fiestata llapan runakuna rurayänanpä Tayta Dios nishqa kaptinpis atska watanami fiestata pay ninqannö rurayashqatsu kayarqan.
6 Tsaymi reywan autoridäkuna qellqayanqan cartata apakurkur willakuqkuna aywayarqan Israel runakuna y Judá runakuna täyanqan markakunaman. Cartakunata chätsirmi liyipar niyarqan:
“Israel runakuna, Asiria nacionpa mandaqnin reykunapa munayninpita qeshpiykarqa Tayta Diosta yapay cäsukuyay. Payqa Abraham, Isaac y Israel yärakuyanqan Diosmi kaykan. Cäsukuyaptikiqa pay yanapayäshunkimi.
7 “Unay castantsikkunanö y marka mayintsikkunanöqa Tayta Diospa contran ama shäriyaytsu. Contran shäriyanqanpitami marka mayintsikkunataqa rikanqantsiknöpis wakinta ushakätsiyänanpä y wakinta prësu apakuyänanpä Tayta Dios kachariykurqan.
8 “Unay castaykikunanöqa chukru shonqu ama kayaytsu. Tsaypa trokinqa Tayta Diosta cäsukur templunman shayämuy. Tsay templutami Tayta Dios akrarqan tsaycho imaypis tänanpä. Payta cäsukur sirviyaptikiqa ajanaynin qallqunqami.
9 “Tayta Diosta cäsukuyaptikiqa wawqikikunatawan tsurikikunata prësu apaq juklä nación runakunapis kuyaparmi kachäyämunqa nacionnintsikman kutiyämunanpä. Tayta Diosnintsikqa kuyapäkuq y yanapakuqmi. Jutsa rurayta jaqirishqaqa imaypis yanapamäshunmi”.
10 Willakuqkuna tsaynö willakurmi Efraín trïbu runakuna y Manasés trïbu runakuna täyanqankunapa markan markan puriyarqan hasta Zabulón trïbu runakuna täyanqanyaq. Willakuyanqanta wiyarmi runakuna asiparnin penqakuyman churayarqan. 11 Tsaynö asipäyaptinpis wakin runakunaqa Tayta Diosta cäsukurmi Jerusalénman aywayarqan. Jerusalénman aywaq runakunaqa kayarqan Aser trïbu runakuna, Manasés trïbu runakuna y Zabulón trïbu runakunami.
12 Tsay runakunata Tayta Dios shakyätsinqannömi Judá runakunatapis Tayta Dios shakyätsirqan mandanqannö Pascua fiestata rurayänanpä. Tsaymi reywan autoridäkuna willakatsiyanqannö 13 ishkay kaq killacho atska runakuna Jerusalénman qorikaykur Levadüraynaq Tanta Mikuna fiestatab rurayarqan. 14 Pascua fiestata rurar qallaykuyänanpäqa Jerusaléncho ïdulukunapä pirqayanqan altarkunata y inciensiuwan qoshnitsiyänan altarkunata Cedrón raqramanmi llapanta jitariyarqan.
15 Wakin kaq levitakuna y sacerdötikuna mana purificakushqa karmi penqakur jinan höra purificakuyarqan. Nirkurmi rupatsina kaq sacrificiukunata rupatsiyänanpä uywakunata Tayta Diospa templunman apayarqan. Ishkay kaq killa chunka chusku junaqcho Pascua fiesta sacrificiupä apayämunqan üshakunatami pishtayarqan. 16 Üshapa yawarninta altarman tsaqtsuyänanpämi levitakuna y sacerdötikuna Tayta Diosta sirviq Moisés qellqanqan leykunacho ninqannö churanakuyarqan. Tsaymi uywakunata pishtayllanta yawarninta sacerdötikunata levitakuna makyayarqan. Sacerdötikunanami tsay yawarwan altarpa ñöpankunata tsaqtsupäyarqan.
17 Uywakunata apamuq runakunaqa wakin manarämi purificakushqarätsu kayarqan. Tsaymi Pascua sacrificiupä paykuna apayämunqan uywakunata levitakunana pishtapäyarqan. Tsaynöpami uywata apamuq runakuna Tayta Diospä consagrädu tikrayarqan. 18 Manarä purificakuq runakunaqa Efraín trïbupita, Manasés trïbupita, Isacar trïbupita y Zabulón trïbupitami kayarqan.
Mana purificakushqa karpis Pascua mikuyta mikuyaptinmi rey Ezequías Tayta Diosta mañakur nirqan: “Tayta Dios, qamqa allillata ruraqmi kanki. Kay runakuna llapan shonqunkunawanmi ninqaykita cäsukur Pascua fiestata ruraykäyan. Tsaynö kaykaptinqa mana purificakuypa Pascua mikuyta mikuyanqanpita paykunata perdonaykullay. 19 Qamqa kanki unay castäkuna yärakuyanqan Tayta Diosmi. Tsaynöpis nirqayki purificakuskirrä Pascua mikuyta mikuyänäpä kanqantami. Taytay, tsaynö nishqa karpis perdonaykullay ari”.
20 Rey Ezequías tsaynö rugakuptinmi runakunata Tayta Dios perdonarqan. 21 Jerusalénman qorikaq Israel runakunaqa pasaypa kushikurmi Levadüraynaq Tanta Mikuna fiestata qanchis junaq rurayarqan. Sacerdötikuna y levitakunami instrumentuta tukarnin qoyay qoyay cantar Tayta Diosta alabayarqan. 22 Instrumentukunata tukar Tayta Diosta kushishqa alabayanqanpitami rey Ezequíasqa levitakunata felicitarqan.
Unay castankuna yärakuyanqan Tayta Diosta adorar y alli päsakuy sacrificiukunata rurarmi qanchis junaq fiestata rurar mikuyarqan. 23 Tsaypita llapan runakuna willanakuskirmi mas juk semäna fiestata pasaypa kushishqa rurayarqan.
24 Judá nacionpa mandaqnin rey Ezequíasmi tsay fiestapä churarqan juk waranqa (1,000) torïtukunata y qanchis waranqa (7,000) üshakunata y cabrakunata. Tsaynöllami autoridäkunapis churayarqan juk waranqa (1,000) torïtukunata y chunka waranqa (10,000) üshakunata y cabrakunata. Tsay fiestachöqa atska sacerdötikunami purificakuyarqan.
25 Tsay fiestachömi llapan Judá runakuna kushikuyarqan. Tsaynöllami kushikuyarqan sacerdötikuna, levitakuna, Israelpita shamuq runakuna, jukläpita shamuq jäpa runakuna y Judácho taq jäpa runakunapis. 26 Davidpa tsurin Salomón rey kaykar fiestata ruranqanpita patsa Jerusaléncho manami tsaynöqa fiestata rurayarqantsu. Tsaymi tsay fiestata rurar llapan runakuna pasaypa kushikuyarqan.
27 Fiesta ushaynami sacerdötikuna y levitakuna ichirkur Tayta Diosta mañakuyarqan runakunata bendisananpä. Tsaynö mañakuyaptinmi täkunqan ciëlupita patsa Israel runakunata Tayta Dios bendisarqan.