31
Fiesta rurayta ushaskirmi Jerusalénman qorikaq Israel runakuna Judá nacioncho kaq markakunaman aywar runakuna adorayanqan wankakunata chipyaq pakir ushayarqan. Tsaynöllami Asera diösapä jawiyanqan raku qerukunata tseqtaskir markakunacho kaykaq altarkunata juchutsir ushayarqan. Tsaynömi ushayarqan Judá trïbukuna täyanqancho, Benjamín trïbukuna täyanqancho, Efraín trïbukuna täyanqancho y Manasés trïbukuna täyanqanchöpis. Tsaynö llapanta pakir ushaskirmi markankunapa y wayinkunapa kutikuyarqan.Levitakunata y sacerdötikunata templucho aruyänanpä Ezequías churanqan
2 Tsaypitanami rey Ezequíasqa sacerdötikunata y levitakunata churarqan imatapis rurayta yachayanqanman tupu trukanakuypa templucho aruyänanpä. Paykunapitami wakinta churarqan rupatsina kaq sacrificiuta rupatsiyänanpä y wakintana churarqan alli päsakuy sacrificiuta rupatsiyänanpä. Tsaynöllami wakinta churarqan Tayta Diosta agradëcikurnin alabayänanpä y wakintana churarqan templu punkucho täpayänanpä.
3 Tsaynöpis rey Ezequíasqa kikinpa uywankunapitami churarqan rupatsina kaq sacrificiuta rupatsiyänanpä. Tsay sacrificiukunatami Tayta Diospa leyninkunacho ninqannö rupatsiyarqan cada tuta, cada tardi, cada jamay junaq, cada llullu killa y diyawardakunachöpis.†
4 Tsaypitanami Jerusaléncho taq runakunata rey Ezequías nirqan sacerdötikunapa y levitakunapa derëchunta apayämunanpä. Tsaynö nirqan sacerdötikuna y levitakuna Tayta Diospa leyninkunacho ninqannö turnun töcaptin templucho aruyänanta munarmi. 5 Apayämunanpä willakatsiptinmi Israel runakunaqa chakrankunapa punta wayuyninta llapan voluntäninwan apayarqan trïguta, vïnuta, aceitita, abëjapa mishkinta y wakin mikuytapis. Tsaynöllami cosechayanqankunapita diezmutapis atskata apayarqan.† 6 Wäkankunapita, üshankunapita y cabrankunapitami Israel runakuna y Judá runakuna diezmuta apayarqan. Tayta Diospä wakin rakiyanqan diezmukunatapis apayaptinmi muntun muntunta qoriyarqan.
7 Kimsa kaq killacho apar qallaykurmi qanchis kaq killachörä ushayarqan. 8 Runakuna apayanqanta rikaykurmi rey Ezequías autoridäninkunawan Tayta Diosta adorayarqan. Tsaynöllami Tayta Dios kuyanqan Israel runakunata kushishqa agradëcikuyarqan.
9 Tsaypitanami rey Ezequíasqa sacerdötikunata y levitakunata tapurqan imanir mikuy muntunaraykanqanta. 10 Tsaymi Sadoc castapita mandaq sacerdöti Azarías nirqan: “Bendicionninta Tayta Dios churamuptinmi templunman atskata apayämushqa. Apamuyta qallaykuyanqanpita patsami mikuyänäpä llapanpis ujükuna. Kay muntunaraykaqkunaqa sobraqkunami kaykan”.
11 Tsayta rikaykurmi rey Ezequías Tayta Diospa templun patiucho mikuy churakuna wayikunata ruratsirqan. Tsay wayikunamanmi 12 churayarqan qoriyanqan primiciakunata, diezmukunata y Tayta Diospä runakuna awniyanqankunata. Tsaykunata rikananpämi churarqan Leví trïbu Conaníasta. Payta yanapananpämi churarqan wawqin Simeita. 13 Conaníasta y wawqin Simeita yanapayänanpämi rey Ezequías y mandaq sacerdöti Azarías churayarqan Jehielta, Azazíasta, Nahatta, Asaelta, Jerimotta, Jozabadta, Elielta, Ismaquíasta, Mahatta y Benaíata.
14 Leví trïbupita Imnapa tsurin Corétami churayarqan runakuna voluntäninpita Tayta Diospä apayämunqankunata chaskinanpä. Tsay chaskinqankunatami templucho aruqkunata aypuq. Tsaynöpis Coréqa rupay yarqamunan kaqläpa punku kichaqmi karqan.
15 Coréta yanapananpämi kayarqan Edén, Miniamín, Jesús, Semaías, Amarías y Secanías. Paykunami sacerdötikuna täyanqan markakunacho qoriyanqankunata levita mayinkunata aypuyaq. Tsaymi trukanakuypa awkinkunatapis chölukunatapis aypuyaq. 16 Tsaynöpami padronashqa kaq levitakuna kimsa watayuqpita janaman kaqkuna chaskiyarqan runakuna apayämunqanta. Tsay aypukuqkunami Tayta Diospa templuncho qoyay qoyay töcanqan kaq aruykunata trukanakuypa aruyarqan.
17 Tsaypitanami sacerdötikunatawan levitakunata castanpa castanpa padronayarqan imacho arunqan tupu y turnun imay töcanqan tupu. Levitakunatami padronayarqan ishkay chunka (20) watayuqpita janaman kaqkunata. 18 Tayta Diosta sirviyänallanpä kayaptinmi cada castata padronayarqan warminkunatapis, pishi wamrakunatapis, ollqu wamrakunatapis y warmi wamrakunatapis. Tsaynöpami sacerdötikunatawan levitakunata y wayinkunacho llapan castankunata padronayarqan.
19 Tsaynöllami rey Ezequías cada markacho runakunata churarqan padronashqa kaq Aarón casta sacerdötikunata y levitakunata mikuykunata aypuyänanpä. Tsaymi chakracho taq levitakunapis mikuyta chaskiyarqan.
20 Entëru Judá nacioncho mikuyta tsaynö aypuyänanpämi runakunata Ezequías churarqan. Ezequías llapan ruranqankunaqa Tayta Dios munanqannömi karqan. 21 Tayta Diospa leyninkunata y mandamientunkunata cumplirmi templucho ima ruraykunatapis llapan shonqunwan ruratsirqan. Tsaynö ruratsiptinmi llapanpis alli karqan.