Jerusalénta atacananpä Senaquerib amenazanqan
32
Tayta Diosta cäsukur Ezequías llapanta ruraykaptinpis Asiria nacionpa mandaqnin rey Senaqueribmi Judá nacionman yaykurqan. Tsaynö yaykurmi jinchi murallashqa markakunata atacananpä soldädunkunawan jiruruypa tsapaskiyarqan.2 Jerusaléntapis atacananpä Senaquerib chanqanta musyaskirmi Ezequíasqa 3 autoridäninkunawan y soldädunkunapa capitanninkunawan willanakuyarqan marka waqtancho kaq yaku pözukunata tsapayänanpä. Llapanpis tsay yarpaylla karmi 4 atskaq runakuna qorikaskir pözukunata y sekyakunatapis tsapayarqan. Tsaynö rurayarqan Asiria nacionpa mandaqnin rey soldädunkunawan char yakuta mana tariyänanpämi.
5 Tsaynöllami juchushqa kaykaq marka murällakunata rey Ezequías allitsatsirqan. Nirkurmi murälla janancho ruratsirqan rikachakuna törrikunata. Tsaynöllami murälla waqtanpa mas juk murällatapis shäritsirqan. Davidpa Markancho kaq Milo niyanqan patak pirqatapis allitsatsirqanmi. Tsaypitanami espädakunata y pelyar tsapakuyänan escüdukunatapis atskata ruratsirqan.
6 Marka runakunata mandayänanpämi capitankunatapis churarqan. Markaman yaykunacho kaq pläzaman qayaykatsirmi paykunata parlapar nirqan: 7 “Asiria nacionpa mandaqnin rey atska soldädunkunawan shamuqta rikarpis ama mantsariyaytsu. Noqantsikta yanapamaqnintsikqa paykunapita mas munayyuqmi kaykan. 8 Asiria nacionpa mandaqnin reyqa soldädunkunamanmi yärakun. Noqantsikqa Tayta Diosnintsikmanmi yärakuntsik. Paymi guërracho vincinantsikpä yanapamäshun”.
Rey Ezequías tsaynö niptinmi mantsariyarqannatsu.
9 Tsay witsanmi rey Senaquerib llapan soldädunkunawan Laquis markata atacaykarqan. Nirkurmi capitanninkunata Jerusalénman kacharqan Judá nacionpa mandaqnin rey Ezequíasta y Jerusaléncho taq runakunata niyänanpä:
10 “Asiria nacionpa mandaqnin rey Senaqueribmi nin: ‘Jerusaléncho jiruruypa tsapashqa kaykarnaqa ¡piman yärakurtä yarpäyanki pipis mana vinciyäshunaykipä kanqanta! 11 ¿Manaku tantiyayanki rey Ezequías ninqanta cäsukur mallaqaypita y yakunaypita ushakäyänaykipä kanqanta? “Tayta Diosnintsikmi salvamäshun” nirqa llullapaykäyäshunkimi. 12 ¿Manaku tsay Diosnikikunapa altarninkunata Ezequías juchutsishqa?† ¿Manaku niyäshushqayki juk altarllachöna inciensiuwan qoshnitsir llapayki adorayänaykipä kanqanta?
13 “ ‘Qamkuna ¿manaku musyayanki Asiria nacionpa mandaqnin reykuna maytsay nacionkunatapis vinciyanqanta? Tsay nacionkunapa diosninkuna manami mayqanpis makïkunapita salvashqatsu. 14 Mayqan nacionpa diosninkuna makïkunapita mana salvashqa kaykaptinqa ¡imanötä Diosnikikunapis makïkunapita salvayäshunki! 15 Ezequías engañayäshunqaykita ama criyiyaytsu. Noqa ushakätsinqä nacionkunata diosninkuna manami salvayashqatsu. Tsaynöpis Asiria nacionpa wakin mandaqnin reykuna ushakätsiyanqan nacionkunata diosninkuna manami salvayashqatsu. Tsaynö kaykaptinqa Diosnikikunapis munaynïpita manami salvayäshunkitsu’ ”.
16 Asiria nacionpa mandaqnin rey kachanqan capitankunaqa mastapis Tayta Diospa contran y Diospa sirviqnin rey Ezequíaspa contranmi niyarqan. 17 Tsaynöllami Israel runakunata kuyaq Tayta Diospa contran qellqaykur rey Senaquerib cartata apatsirqan. Tsay cartachömi nirqan: “Wakin nacionkunapa diosninkuna makïkunapita mana salvayanqannömi Ezequíaspa Diosninpis makïkunapita salvayäshunkitsu”.
18 Senaquerib kachanqan capitankuna hebreo idiömacho jinchi tsaynö niyarqan Jerusalén markapa murällan janancho kaykaq runakunata mantsakatsir markaman mana mayaylla yaykuyänan raykuqmi. 19 Tsay capitankunaqa Jerusalén runakuna yärakuyanqan Tayta Diospa contran parlayarqan wakin nacionkunacho runa ruranqan dioskunanö kanqanta yarparmi.
20 Tsaymi rey Ezequías y Amozpa tsurin profëta Isaías Tayta Diosta mañakuyarqan yanapananpä. 21 Mañakuyaptinmi juk angelninta Tayta Dios kachamurqan Asiriapita shamuq soldädukunata y capitankunata ushakätsinanpä. Ushakätsiptinmi Asiriapita shamuq reyqa pasaypa penqakushqa nacionninman kutikurqan. Nacionninchönami diosninpa templunman yaykuskiptin kikinpa tsurinkunalla espädankunawan wanuskatsiyarqan.
22 Tsaynöpami Jerusaléncho taq runakunata y rey Ezequíasta Tayta Dios salvarqan Asiria nacionpa mandaqnin rey Senaqueribpita y wakin contrankunapitapis. Tsaynö salvaptinmi Israel runakuna ñöpancho kaykaq nacionkunawan añawna kawakuyarqan. 23 Tsaynöpami Judá nacionpa mandaqnin rey Ezequías maytsay nacionkunachöpis respitashqa karqan. Tsaymi atska runakuna rey Ezequíaspä qaraykunata Jerusalénman apayarqan y Tayta Diospä ofrendakunata apayarqan.
Qeshyanqanpita rey Ezequías alliyanqan
24 Tsay witsanmi rey Ezequías pasaypa antsa kaykar Tayta Dios alliyätsinanpä mañakurqan. Mañakuptinmi juk milagruta rurarqan alliyänanpä kanqanta tantiyatsinanpä. 25 Alliyaykätsiptinpis Ezequíasqa agradëcikunanpa trokinmi orgullösu rikakurqan. Tsaynö rikakunqanpitami Tayta Dios pasaypa ajanarqan Ezequíaswan, Judá nación runakunawan y Jerusalén runakunawanpis. 26 Tayta Dios ajananqanta tantiyarmi Ezequías orgullösu kanqanpita Jerusaléncho taq runakunawan perdonta mañakuyarqan. Tsaymi Ezequías kawanqan witsanqa Judá nación runakunata Tayta Dios castigarqantsu.
Ezequías imaykayuq kanqan
27 Ezequíasqa pasaypa imaykayuq karmi pïmaypitapis reqishqa y respitashqa karqan. Paypaqa atskami yuraq qellaynin y qorinpis karqan. Tsaynöllami karqan atska kuyayllapä ruminkuna, perfüminkuna, escüdunkuna y tukuyläya chanin kaqkunapis. 28 Tsaynöllami mikuy churakuna wayikunata shäriskatsir tsayman churatsirqan tsaki mikuyta, vïnuta y aceitita. Uywakuna punuyänanpä ramädakunata y üshakuna punukuyänan qenchakunatapis ruratsirqanmi. 29 Tsaynöllami markakunatapis shäritsirqan. Tayta Diospa bendicionninwan pasaypa imaykayuq tikraptinmi wäkankunapis, üshankunapis, cabrankunapis atska karqan.
30 Ezequíasqa tünilta ruraskatsirmi Gihóncho pashtaq yakuta Davidpa Markanyaq chätsirqan. Tsay yakuta chätsirqan markaman rupay jeqanan kaqläpami. Ezequías ruranqankunaqa llapanpis allimi karqan.
Babiloniapita aywaqkunata Ezequías chaskinqan
31 Judá nacioncho milagru† päsanqanta musyayämunanpämi Babiloniapita mandaq runakuna kachakunata Ezequíasman kachayarqan. Tsay kachakuyanqan runakuna chaykuyaptinmi Ezequíasta Tayta Dios kacharirqan. Tsaynö kacharirqan llapan shonqunwan payta cäsukunqanta o mana cäsukunqanta musyayta munarmi.
Ezequías wanunqan
32 Ezequías imata ruranqanpis y Tayta Diosman imanö yärakunqanpis qellqaraykan Amozpa tsurin profëta Isaías qellqanqan libruchömi. Tsaynöpis qellqaraykan Judá nacionpa y Israel nacionpa mandaqnin reykunapa acta librunchömi. 33 Ezequías wanuskiptinnami Davidpa castankuna pamparaykäyanqan panteoncho allinnin kaq sitiuman pampayarqan. Jerusaléncho taqkuna y Judá runakunaqa respëtuwanmi Ezequíasta shumaq pampayarqan. Ezequíaspa trokinmi tsurin Manasésna rey karqan.