Qeshyanqanpita rey Ezequías alliyanqan
20
Tsay witsanmi rey Ezequías pasaypa antsa qeshyar wanunaykarqan. Tsaymi Amozpa tsurin profëta Isaías watukaq aywar nirqan: “Tayta Diosmi nin: ‘Qamqa mananami alliyankinatsu. Llapan imaykaykitapis shumaq dispönir testamentuyki ruratsikuy’ ”.2 Tsaynö niptinmi Ezequías wayi pirqa kaqläpa tikrakuskir Tayta Diosta mañakur nirqan: 3 “Tayta Dios, llapan shonqüwan ninqaykita cäsukur munanqaykinö kawanqäta yarpaykullay”.
Tsaynö nir llakikurmi pasaypa waqarqan.
4 Ezequíasta watukanqanpita palaciu patiupa manarä päsaptinmi Isaíasta Tayta Dios nirqan: 5 “Kuyanqä runakunapa mandaqnin rey Ezequías kaqman kutiykur willanki: ‘Unay castayki David sirvinqan Tayta Diosmi nin: Wiyashqämi waqar mañakamanqaykita. Tsaymi qeshyanqaykipita alliyätsishayki. Kananpita kimsa junaqtami adoramänaykipä templuman aywanki. 6 Tsaynöpis chunka pitsqa wata masrämi kawanki. Kawanqaykiyaqqa qamta y Jerusalén markatapis Asiria nacionpa mandaqnin reypa munayninpita salvashaykimi. Tsaynö rurashä salvanqäpita runakuna alabayämänanpä y sirvimaqnï Davidta awnishqa karmi’ ”.
7 Tsaypitanami Isaíasqa hïgusta aqaskatsir rey Ezequíaspa qerinman lashtapurqan. Tsaynö lashtapaykuptinmi Ezequíasqa alliyaskirqan.
8 Manarä alliyarmi rey Ezequías Isaíasta tapur nirqan: “¿Imanöpatä musyashä Tayta Dios alliyätsimänanpä kanqanta? Tsaynöpis ¿imanöpatä musyashä kananpita kimsa junaqta Tayta Diospa templunman aywanäpä kanqanta?”
9 Tsaynö tapuptinmi Isaías nirqan: “Tayta Dios alliyätsishunaykipä kanqanta musyanaykipä juk milagrutami ruranqa. ¿Relojchoa llantuy chunka grädata päsanantaku munanki? ¿O chunka grädata qepaman kutinantaku munanki?”
10 Tsaynö niptinmi Ezequías nirqan: “Llantuyqa fäcilmi puntapa aywan, imaypis qepamanpa manami kutintsu. Tsaynö kaptinqa relojcho chunka grädata qepaman kutitsun”.
11 Tsaynö niptinmi profëta Isaías Tayta Diosta mañakuptin Acazpa relojnincho llantuyta chunka grädata qepaman Tayta Dios kutitsirqan.
Babiloniapita aywaqkunata Ezequías chaskinqan
12 Tsay witsanmi Babilonia nacionpa mandaqnin rey Merodac-baladán musyarqan rey Ezequías pasaypa antsa qeshyaykanqanpita alliyanqanta. (Merodac-baladánqa Baladánpa tsurinmi karqan.) Tsaymi cartakunata y qaraykunata apatsirqan.
13 Kachakuna chäyaptinmi Ezequías kushishqa chaskirqan. Paykunatami rikatsirqan yuraq qellayninkunata, qorinkunata, chanin cuestaq perfüminkunata, olïvuspita rurashqa aceitinkunata, armankunata y churakunan wayikunacho llapan imaykankunatapis. Palaciuncho kaqta y mandanqan nacioncho kaqtaqa llapantami rikatsirqan.
14 Tsaymi profëta Isaías rey Ezequíasman aywaykur nirqan: “Tsay runakunaqa ¿maypitatä shayämushqa? ¿Imatatä niyäshushqayki?”
Ezequíasnami nirqan: “Paykunaqa shayämushqa Babilonia nacionpitami”.
15 Tsaypitanami Isaías yapay tapurqan: “Palaciucho ¿imatatä rikayashqa?”
Tsaymi Ezequías nirqan: “Palaciucho kaqkunata y churakuna wayicho kaqkunatapis llapantami rikatsishqä”.
16 Tsaynö niptinmi Ezequíasta Isaías nirqan: “Kanan willashayki Tayta Dios ninqanta. 17 Tayta Diosmi nin: ‘Tiempu chämunqanami Babilonia nacionpita soldädukuna kay markata atacaskir palaciucho rikatsinqayki riquëzakunata apakuyänanpä. Paykunami apakuyanqa unay castaykikuna qoriyanqankunata y qam qorinqaykikunatapis. Tsaynö apakuyaptinmi kaycho imapis quëdanqanatsu.† 18 Qampita aywaraqkunatapis wakintaqa Babilonia nacionmanmi apakuyanqa. Tsayman chaykatsirmi ollqu kaqkunata capayanqa reypa wätaynin kayänanpä’ ”.†
19 Tsaymi rey Ezequíasqa Isaíasta nirqan: “Tayta Dios ninqanta allimi willamashqayki”.
Shonqullancho yarparmi nirqan: “Tsaynö kaptinqa kawanqäyaq imapis manami kanqarätsu”.
Rey Ezequías wanunqan