Qeshyanqanpita rey Ezequías alliyanqan
38
Tsay witsanmi rey Ezequías pasaypa antsa qeshyar wanunaykarqan. Tsaymi Amozpa tsurin profëta Isaías watukaq aywar nirqan: “Tayta Diosmi nin: ‘Qamqa mananami alliyankinatsu. Llapan imaykaykitapis shumaq dispönir testamentuyki ruratsikuy’ ”.2 Tsaynö niptinmi Ezequías wayi pirqa kaqläpa tikrakuskir Tayta Diosta mañakur 3 nirqan: “Tayta Dios, llapan shonqüwan ninqaykita cäsukur munanqaykinö kawanqäta yarpaykullay”.
Tsaynö nir llakikurmi pasaypa waqarqan.
4 Tsaynö rugakuptinmi Isaíasta Tayta Dios nirqan: 5 “Kutiykur Ezequíasta willar niy: ‘Unay castayki David sirvinqan Tayta Diosmi nin: Wiyashqämi waqar mañakamanqaykita. Tsaymi qeshyanqaykipita alliyätsishayki. Chunka pitsqa wata masrämi kawanki.
6 “ ‘Kawanqaykiyaqqa qamta y Jerusalén markatapis Asiria nacionpa mandaqnin reypa munayninpita salvashaykimi. 7 Tsay ninqäta cumplinäpä kanqanta musyanaykipä juk milagrutami rurashä. 8 Acazpa relojnincho señalanqan chunka grädatami llantuyta qepaman kutitsishä’ ”.
Ninqannöllami rupaypa llantuynin chunka grädata qepaman kutirqan.
9 Judá nacionpa mandaqnin rey Ezequías qeshyanqanpita kutikaskirmi kay cantuta qellqarqan:
10 Noqa yarparqä chölullarä kaykar wanunäpä kanqantami.
Tsaynöllami yarparqä wanushqakuna kanqanman aywakur imaypis atsikyay patsata manana rikanäpä kanqanta.
11 Tsaynöllami yarparqä kay patsacho Tayta Diostapis ni runakunatapis manana rikanäpä kanqanta.a
12 Tayta Dios, üsha täpana tsukllata ushakätsiqnömi ushakäratsimanki.
Awaq runa telarcho awata rutuskir jitariqnömi jaqiramashqayki.
Atsikyay patsatapis ni paqastapis manana rikanäpämi illaqpita apakamayta munashqayki.
13 Tullükunata león kapchumaptin nanaywan qayaraqnömi warat qamta rugakushqä.
Paqaspapis junaqpapis pasaypami ñakatsimashqayki.
14 Grüllakuna wayanïtukunab waqaqnömi nanätsikur waqashqä.
Paluma waqanqannörämi nanaywanpis waqashqä.
Ñawïpis utikanqanyaqmi mañakamur ciëlupa rikarämushqä.
Pasaypami ñakashqä. Tayta Dios, ¡kuyapaykallämay!
15 Kikiki castigamaptiki alfin imanäshärä.
Wanunqäyaqpis pasaypa llakikurmi umpuräkushä.
16 Tayta Dios, runakunaqa corrigiptikirämi munanqaykinö kawayänanpä tantiyakuyan.
Noqapis corrigimaptikirämi munanqaykinö kawanäpä tantiyakushqä.
Kananqa alliyätsimarmi kawayta qaramashqayki.
17 Tsaymi ñakanäpa trokin allina kawaykä.
Llapan jutsata ruranqäpitami perdonamashqayki.
Wanukunäpäna kaykaptïmi salvamashqayki.
18 Wanushkunaqa mananami alabayäshunkinatsu.
Pampashqa kaqkunaqa awninqaykita cumpliptikipis manami rikayannatsu.†
19 Kawaqkunami itsanqa alabayäshunki.
Tsaynöllami noqapis kanan qamta alabaykä.
Awninqaykita cumpliq kanqaykitami tsurinkunatapis taytankuna willayan.
20 Tayta Dios, qammi wanuypita salvamanki.
Tsaymi templuykicho arpata tukar qoyay qoyay imayyaqpis alabayäshayki.
21 Ezequías alliyänanpämi Isaías nirqan: “Hïgusta aqaskir reypa qerinman emplastuta churayay. Tsay emplastuwanmi alliyanqa”.
22 Tsaymi rey Ezequías Isaíasta tapur nirqan: “¿Imanöpatä musyashä Tayta Dios alliyätsimaptin templunman aywanäpä kanqanta?”