2 Kachakuna chäyaptinmi Ezequías kushishqa chaskirqan. Paykunatami rikatsirqan yuraq qellayninkunata, qorinkunata, chanin cuestaq perfüminkunata, olïvuspita rurashqa aceitinkunata, armankunata y churakunan wayikunacho llapan imaykankunatapis. Palaciuncho kaqta y mandanqan nacioncho kaqtaqa llapantami rikatsirqan.

3 Tsaymi profëta Isaías rey Ezequíasman aywaykur nirqan: “Tsay runakunaqa ¿maypitatä shayämushqa? ¿Imatatä niyäshushqayki?”

Ezequíasnami nirqan: “Paykunaqa shayämushqa Babilonia nacionpitami”.

4 Tsaypitanami Isaías yapay tapurqan: “Palaciucho ¿imatatä rikayashqa?”

Tsaymi Ezequías nirqan: “Palaciucho kaqkunata y churakuna wayicho kaqkunatapis llapantami rikatsishqä”.

5 Tsaynö niptinmi Ezequíasta Isaías nirqan: “Kanan willashayki llapanta mandaq Tayta Dios ninqanta. 6 Tayta Diosmi nin: ‘Tiempu chämunqanami Babilonia nacionpita soldädukuna kay markata atacaskir palaciucho rikatsinqayki riquëzakunata apakuyänanpä. Paykunami apakuyanqa unay castaykikuna qoriyanqankunata y qam qorinqaykikunatapis. Tsaynö apakuyaptinmi kaycho imapis quëdanqanatsu. 7 Qampita aywaraqkunatapis wakintaqa Babilonia nacionmanmi apakuyanqa. Tsayman chaykatsirmi reypa wätaynin kayänanpä ollqu kaqkunata capayanqa’ ”.^†

8 Tsaymi rey Ezequíasqa Isaíasta nirqan: “Tayta Dios ninqanta allimi willamashqayki”.

Shonqullancho yarparmi nirqan: “Tsaynö kaptinqa kawanqäyaq imapis manami kanqarätsu”.