Jerusalén runakunata Tayta Dios shoqanqan
40
Tayta Diosnintsikmi nin:“Kuyanqä runakunata shoqaykuyällay.
2 Jerusalén mana llakikunanpä alli shimillaykikunapa willar niyay.
Alli cösa llëvaykatsirmi jutsankunapita perdonashqä”.
3 Juk runami qayakuypa willakur nin:
“Tayta Dios shamunanpä tsunyaq jirkacho nänita allitsayay.
Wenqu nänikunata derechayay.†
4 Raqrakunatapis pampatsayay.
Jirkankunatapis parijayay.
Wiksu nänikunatapis derechayay.
Uchku uchkukunatapis pampatsayay.
5 Tayta Dios shamurnami munayninwan salvanqa.
Tsaytaqa maytsaycho taq runakunami rikayanqa.†
Kikin Tayta Diosmi tsaynö kananpä nishqa”.
6 “Jinchi qayakuy” nimaqtami wiyarqä.
Tsaymi tapurqä: “¿Imatatä qayakur nishä?”
Tsaynö tapuptïmi nimarqan:
“Llapan runakunapis qewanö ushakaqllami.
Munayyuq kayninpis waytanö päsaqllami.
7 Achaq wayrata Tayta Dios pükaramuptinqa qewapis tsakiskinmi, waytapis wanupaskinmi.
Runakunaqa rasunpaypami qewanölla kaykäyan.
8 Qewapis tsakinmi y waytapis shushunmi.
Tayta Diosnintsikpa palabranmi itsanqa imayyaqpis kaykanqa”.†
9 Siónman alli willakuyta apaq runa, jirkanman witsarkur pïmaypis wiyashunaykipä jinchi qayakuy.
Jerusalénman alli willakuyta apaq runa, mana mantsariypa jinchi qayakuy.
Judá markakunacho taqkunata willar niy:
“¡Tayta Diosnintsik kaychönami!”
10 Pasaypa munayninwanmi Tayta Dios shamunqa.
Munayyuq karmi chikiqninkunata vincir kuyanqan runakunata qorimunqa.
11 Üsha mitsiq runa ashkashta marqakurkur apaqnömi apamunqa.†
Tsayrä wachashqa üshakunatanömi alli rikanqa.
Tayta Dios munayyuq kanqan
12 ¿Pirä Tayta Diosnö maki paltallanwan lamar yakuta tupunman?
Ciëlutapis Tayta Dios cuartaypa tupunqannö ¿pirä tupunman?
Kay patsacho allpatapis ¿pirä Tayta Diosnö llapanta pësanman?
Jirkakunatapis jirkankunatapis ¿pirä Tayta Diosnö balanzawan pësanman?†
13 Tayta Dios yarpanqankunata ¿pillaqa musyantsurä?
Yachaq kananpä ¿pillaqa payta yachatsintsurä?†
14 Tayta Dios ¿pitapis mañakuntsurä tantiyatsinanpä?
Tayta Diosta ¿pillapis tantiyatsinmantsurä alli kanqanta mana alli kanqantapis?
Yachaq kananpä ¿pillaqa payta yachatsinmantsurä?
15 Juk jutuy yakunöllami llapan nacionkunapis Tayta Diospäqa kaykäyan.
Balanzacho polvunöllami llapanpis kaykäyan.
Islakunacho kaykaq nacionkunapis juk aptay aqushanöllami kaykäyan.
16 Entëru Líbano muntita altarman churar rupatsishqapis y tsaycho kaq uywakunata pishtashqapis manami aypanmantsu Tayta Diospä sacrificiuta rupatsinantsikpä.
17 Tayta Diospäqa llapan nacionkunapis manakaqnöllami kaykäyan.
18 Tayta Diosta ¿imamanrä tinkutsishwan?
¿Ima ïdulutarä pay niraqta rurashwan?
19 Ïdulutaqa moldiwanmi rurayan.
Yachaq runami qoriwan laqan.
Qoripita ruraskirmi wallqatapis wallqatsiyan.
20 Qorita mana tarirqa mana puyuq qerutami llaqllayta yachaq runaman apapan.
Tsay runanami shumaq ichiraq ïduluta rurapan.†
21 Tayta Diospäqa ¿manaku wiyayarqayki?
¿Manaku unaypitana niyäshurqayki?
¿Manaku kay patsata kamanqanpita patsana willakuyarqan?
22 Tayta Diospa trönunqa ciëlu jananchömi kaykan.
Tsaypita patsami chukllushtanölla runakunata rikamun.
Tolduta runa mashtaqnömi ciëlutapis mashtarin.
23 Munayyuq runakunatapis penqakuymanmi churan.
Kay patsacho reykunatapis ushakäratsinmi.
24 Ushakätsiptinmi imaypis mana plantashqanö, imaypis mana murushqanö y imaypis mana michïkushqanö illakäyan.
Tayta Dios pükariptin qewa wanukäkuqnöllami paykuna wanuyan.
Oqshata wayra apaptin illakaqnömi illakäkuyan.
25 Santu Tayta Diosmi tapumantsik:
“Qamkuna ¿imamanrä tinkutsiyämankiman?
¿Pirä noqaman tinkunman?”
26 Ciëluta rikärir tantiyakushun qoyllurkunata pï kamanqantapis.
Llapan qoyllurkunata Tayta Diosmi yupan.
Llapantapis jutinpa jutinpami reqin.
Tayta Dios pasaypa munayyuq y kallpasapami kaykan.
Tsaymi tsay qoyllurkuna jukllayllapis oqrakantsu.
27 Jacobpita aywaraq runakuna, ¿imanirtä niyanki Tayta Dios mana kuyapäshunqaykita?
Israel runakuna, ¿imanirtä niyanki mana cäsuyäshunqaykita?
28 Tayta Diosqa imayyaqpis kawaqmi kaykan.
¿Manaku tsayta musyayanki?
¿Manaku tsayta wiyayarqayki?
Paymi kay llapan patsata kamarqan.
Pay manami aywapakantsu ni ajayantsu.
Pay yarpanqanqa mana tantiyaypämi.
29 Pishipashqa runakunatapis paymi yanapan.
Aywapakaykaqkunatapis paymi kawaritsin.
30 Chölukunapis chölullarä kaykarmi pishipäyan.
Kallpasapakunapis aywapakarmi ishkiyan.
31 Tayta Diosman yärakuqkunami itsanqa kallpasapa kayan.
Paykunaqa anka pajaqnömi aywayan.†
Mayjina cörrirpis manami pishipäyantsu.
Mayjina aywarpis manami bëtayantsu.