Israel runakunata yanapananpä ninqan
41
Tayta Diosmi nirqan:“Costacho kaq nación runakuna, wiyayämay.
Maytsay nacionkunacho taq runakuna, kallpata tsariyay.
Washäkuyänaykipä shayämuy.
Qamkunata juzgayänäpä qorikäyämuy.
2 “Rupay yarqamunan kaqläpita llapantapis vinciq reyta yuritsimunqäta ¿manaku tantiyayanki?a
¿Manaku tantiyayanki munayyuq kananpä tsay reyta noqa churanqäta?
Tsaymi wakin nacionkunata y reykunatapis makincho tsararaykan.
Espädanwanmi runakunata chipyaq ushakätsin.
Flëchaptinmi runakuna wakpa kaypa päjanöpis mashtakäyan.
3 Contrankunata qatikacharmi pajarrä aywan.
Qatikacharninmi imaypis mana purinqan nänipa mana mantsariypa aywan.
4 “Tsaynö kananpä pï kamakätsinqantapis ¿manaku tantiyayanki?
¿Manaku tantiyayanki qallaykunanpita patsa pï kamakätsinqantapis?
Noqa Tayta Diosmi qallanan y ushanan kaykä.†
5 “Imayka ruranqäta musyarmi costacho kaykaq nación runakunapis pasaypa mantsariyan.
Maytsay nacionkunacho taqkunapis tsuktsukyäyanmi.
Pelyayänanpämi qorikäyan.
6 Mana mantsariyänanpämi kikinpura shakyätsinakuyan.
7 Ïduluta ruraq runapis qellaywan laqaq runatami shakyätsin.
Martilluwan takaqpis yunkicho takaqtami shakyätsir nin: ‘¡Allitami rurashqayki!’
Rurayta ushaskirmi ïdulu mana kuyunanpä clävuwan sigurayan.
8 “Jacobpita aywaraq Israel runakuna, qamkunaqa sirvimaqnïmi kayanki.
Qamkunata noqami akrakushqä.
Qamkunaqa amïgü Abrahampita aywaraqmi kaykäyanki.†
9 Mayläya karupitami qamkunata qorimushqä.
Maytsaycho kaykaqtami qayamushqä.
Qamkunatami nirqä: ‘Sirvimaqnïmi kayanki.
Akranqä kayaptikimi jaqiriyäshaykitsu’.
10 Qamkunawan kaykaptïqa ama mantsariyaytsu.
Diosnikikuna kaykaptïqa ama llakikuyaytsu.
Kallpaykikuna kananpämi imaypis yanapayäshayki.
Derëcha kaq makïwanmi imaypis jancharäyäshayki.
11 “Contrayki shäriqkunaqa llapanmi penqakur ima ruraytapis kamäpakuyanqatsu.
Achäquita ashipäshuqnikikunaqa chipyaqmi ushakäyanqa.
12 Guërrata rurar atacayäshuqnikikunataqa manami pipis yarpanqanatsu.
Paykunata ashirpis manami tariyankitsu.
13 Tayta Diosniki karmi qamkunata makipita jancharaykä.
Tsaymi nï: ‘Ama mantsariyaytsu. Yanapayäshaykimi’.
14 “Jacobpita aywaraq Israel runakuna, manakaqnölla karpis ama mantsariyaytsu.
Wallkaqlla karpis ama llakikuyaytsu.
Noqami qamkunata yanapayäshayki.
Israel runakunapa santu Diosnin karmi salvayäshayki.
15 Alli afilashqa atska kiruyuq trilladöranö kayänaykipämi qamkunata churashqä.
Jirkakunata trillarmi allpallatana jaqiyanki.
Jirkankunatapis trillarmi päjallatana kachaykuyanki.b
16 Jurquitawan jitayaptikimi tsay päjata wayra apanqa.
Shukukuy shamurmi wakpa kaypa mashtanqa.
Qamkunata tsaynö yanapaptïmi pasaypa kushikuyanki.
Israel runakunapa santu Diosnin kaptï kushishqami alabayämanki.
17 “Imaynaqkuna yakuta mana tarir shiminkuna tsakiptin noqata mañakayämätsun.
Noqa Tayta Diosnin karmi mañakayämaptin yanapashä.
Israel runakunapa Tayta Diosnin karmi jaqirishätsu.
18 Yaku mana kanqan jirkakunachöpis mayukunatami yuritsimushä.
Yunka pampakunachöpis pukyukunatami pashtatsimushä.
Tsunyaq jirkakunatapis sinigamanmi tikratsishä.
Yaku mana kanqanpapis mayunörämi yaku aywanqa.†
19 Tsunyaq jirkakunamanmi cedru, acacia, arrayán y olïvu jachakunata plantashä.
Tsaki jirkakunachömi ciprés, pïnu y abëtu jachakunata wiñatsimushä.
20 Tsayta rikarmi pïmaypis noqa ruranqäta tantiyayanqa.
Tsaynöllami tantiyayanqa Israel runakunapa santu Diosnin kanqäta”.
Tayta Dioslla rasunpaypa Dios kanqan
21 Jacobpita aywaraqkunapa mandaqnin rey Tayta Diosmi nin:
“Ïdulukuna kawaq kaptinqa washäkuyänanpä mä apayämuy.
Imata kamayanqantapis mä niyämätsun.
22 Shamuq watakunacho imanö kananpä kaqtapis mä willakuyätsun.
Unay watakunacho ima kanqantapis qallananpita patsa willakuyätsun.
23 Rasunpaypa Dios kanqan musyakänanpä waray warantinkuna ima päsananpä kanqantapis mä willakuyätsun.
Imallatapis allita mana allitapis mantsakaypä kaqkunata mä rurayätsun.
24 Ïdulukunaqa manami ima ruraytapis kamäpakuyantsu.†
Manami imapäpis väliyantsu.
Ïdulukunaman yärakuqkunaqa noqapä pasaypa melanaypämi kaykäyan.
25 “Rupay yarqamunan kaqläpitami juk runata jutinpa qayashqä.
Paymi norti kaqläpa shamunqa.
Manka ruraq runa mituta jaruqnömi reykunatapis chipyaq ushakätsinqa.
26 Tsay runa shamunanpä kanqanta manami mayqan ïdulupis willakushqatsu.
Unaypita rasunpaypa willakushqa kaptinqa tsay ïdulu musyaq kanqanta tantiyashwanmi karqan.
Manami imaypis willakushqatsu.
Manami ni mayqanpis musyatsishqatsu.
27 “Sión runakunata yanapanäpä kaykanqäta noqaqa mas ñöpatami willakatsirqä.
Tsay willakuytami Jerusalénman willakatsirqä.
28 Mayjina ashirpis manami mayqan ïdulutapis noqanö willakatsiqta tarïtsu.
Ïdulukunaqa tapuptïpis manami imatapis parlayantsu.
29 Ïdulukunaqa manami Diostsu.
Ima ruraytapis manami kamäpakuyantsu.
Ïdulukunaqa manami imapäpis väliyantsu”.