Sirviqninpä Tayta Dios ninqan
42
Tayta Diosmi nin:“Sirvimaqnï imanö kanqanta tantiyayay.
Payta noqami yanapaykä.
Payta noqami akrashqä.
Paypitami kushikü.†
Espïritütami payman kachamushqä.
Tsaymi maytsay nación runakuna alli kawayänanpä shumaq rikanqa.
2 “Payqa manami ollqutupanqatsu ni qayapanqatsu.
Cällikunachöpis manami wajukur purinqatsu.
3 Llaktishqa shoqushtapis manami pakirinqatsu.
Upinaykaq aktsitapis manami upitsinqatsu.a
Payqa llapantapis allimi juzganqa.
4 “Kay patsacho alli kawayänanpämi shumaq yachatsinqa.
Tsayta manarä yachatsirqa manami jamaytapis tarinqatsu.
Karu nacioncho taqkunapis pay yachatsinqanta wiyaytami munayanqa”.†
5 Tayta Diosmi ciëluta kamaskir qoyllurkunata entëruman mashtamurqan.
Paymi kay patsata y kay patsacho wayuqkunatapis kamarqan.
Paymi runakunatapis kawayta qaran.†
Paymi sirviqninta nin:
6 “Noqa Tayta Diosmi qamta qayashqä munanqäta ruranaykipä.
Makipita janchashqa puritsirmi llapanchöpis yanapashayki.
Qamtami churashayki Israel runakunawan pactu ruranqäta cumplinaykipä.
Tsaynöllami churashayki maytsay nacionkunapäpis aktsi kanaykipä,†
7 qaprakunata alliyätsinaykipä,
prësukunata carcelpita jipimunaykipä
y tsakäpakushqanö kawaqkunata aktsiman jipinaykipä.
8 “Noqapa jutïqa Yahwehmi.
Noqallata runakuna adorayämänantami munä.†
Manami ima ïdulutapis adorayänanta munätsu.
9 Ñöpata willakatsinqänöllami llapanpis kashqa.
Kananqa yapaymi imapis kananpä kaqkunata willakaykätsï.
Pipis manarä musyaptinmi qamkunata musyaykätsï”.
Salvakuq kanqanpita Tayta Diosta alabanqan
10 Mushuq cantuwan Tayta Diosta alabayay.
Mayjina karucho taqkunapis payta alabayätsun.
Lamar jananpa büquiwan päsaqkunapis alabayätsun.
Lamar rurincho kawaqkunapis alabayätsun.
Costacho taqkunapis alabayätsun.†
11 Tsaki jirkacho kaykaq markakunapis alabayätsun.
Cedar runakunapis alabayätsun.
Sela markacho taq runakunapis alabayätsun.
Jirka puntanman witsarkur maytsayman wiyakaqpä alabayätsun.
Kushikur alabayätsun.
12 Costacho kaykaq markakunachöpis Tayta Diosta alabayätsun.
13 Tayta Diosqa alli chölu soldädunömi guërrata rurananpä shamunqa.
Qayaykachar atacarmi contrankunata ushakäratsinqa.
14 Tayta Diosmi nin:
“Atska watami upällakur kuyanqä runakunata salvashqätsu.
Chikiqninkuna ñakatsiyaptin mañakayämaptinpis manami imatapis nishqätsu.
Kananmi itsanqa kuyanqä runakunata contrankunapita salvashä.
Qeshyakuq warmi qayaranqannömi qayaräshä.
15 Paykunata salvar nacionninman kutitsinäpämi jirkakunatapis jirkankunatapis ushakätsishä.
Tsaycho wiñaq jachakunatapis llapantami tsakitsishä.
Mayukunatapis tsunyaq jirkamanmi tikratsishä.
Qochakunatapis tsaki allpamanmi tikratsishä.
16 “Qaprakunatapisb mana reqiyanqan nänipami pushashä.
Imaypis mana puriyanqan nänipami puritsishä.
Paykuna aywayänanpämi paqastapis atsikyaqman tikratsishä.
Mana alli nänitapis shumaqmi pampatsashä.
Tsaykunata rasunpaypami rurashä.
17 “Tsayta musyarmi ïdulukunaman yärakuqkuna penqakuyanqa.
Ïdulunkuna diosnin kanqanta yarparpis pasaypa penqakurmi aywakuyanqa.†
Israel runakuna mana tantiyakuq kayanqan
18 “Israel runakuna, upanö y qapranömi kaykäyanki.
Upanö karpis ninqäta cäsukuyay.
Qapranö karpis shumaq rikayay.
19 Sirvimaqnï karpis qamkunaqa qaprapitapis mas qaprami kaykäyanki.
Willakuqnï karpis qamkunaqa upapitapis mas upami kaykäyanki.
20 Ima päsanqanta rikarpis manami yarpachakuyankitsu.
Ima ninqäta wiyaykarpis manami tantiyakuyankitsu”.
21 Salvakuq karmi Tayta Dios munan kuyanqan runakuna leyninkunata shumaq yachakur cäsukuyänanta.
22 Tsaynö kaptinpis manami cäsukuyashqatsu.
Tsaymi Tayta Dios castigar chikiqnin runakunata mandarqan paykunata suwapäyänanpä.
Kananqa contrankunata mantsarmi machaykunaman pakakuyan.
Wakinnami calapösucho wichqaräyan.
Prësu apakuyaptin manami pipis kashqatsu washänanpä.
Llapan imaykanta apakuyaptinpis manami pipis kashqatsu qechur yanapananpä.
23 Tsaynö kaykaptinpis ¿mayqallaykiqa imapita ñakayanqaykita tantiyakuyankitsurä?
Waray warantinkuna ima päsananpä kanqanta tantiyakur ¿mayqallaykiqa wiyakuyankitsurä?
24 ¿Pitä kamakätsishqa chikimaqnintsikkuna vincimarnintsik imaykantsikkunatapis apayänanpä?
Tsaynö päsamänantsikpä Tayta Diosmi kamakätsishqa.
Jutsata rurarmi payta ajanätsishqantsik.
Yätsinqankunatapis mandamientunkunatapis mana cäsukuypami kawashqantsik.
25 Tsaymi pasaypa rabyanar soldädukunata Tayta Dios kachamushqa atacamänantsikpä.
Tsay soldädukuna ninata tsariskatsiyaptinmi imaykatapis rupar maytsayyaqpis ushashqa.
Tsaynö kaptinpis manami tantiyakushqantsiktsu.
Nina ushamashqapis manami cäsukushqantsiktsu.